個市，筆者唔玩了‧解畫

今日果然如筆者10月4日所講咁發生 (見夠了，唔走了)，作狀要升上30,000點，但未到就撻鑊金。

今日正進行突然大跌既時候，就響果15分鐘入面，亦正正係日圓升既時候，咁樣係唔係巧合呢？對筆者黎講唔係，上文都早就同大家分享過美元兌日圓同港股幾乎同步。

今日最令筆者怕既係有部份分析員唔擔心，提出黎個情況響上次衝29,000，有所謂「單日轉向」時一樣，結果大市再創新高，所以叫投資者唔使驚。依筆者經驗，一有黎D咁既現象，往往會出大事。

國家外匯投資基金表示並未投資香港。行長話「直通車」唔o岩聽，係允許國內人投資到海外，咁，其實即係QDII... 港股有今日升幅，係謠言滿天飛所致。

「最後大升」隨之而黎既「似樣調整」，筆者冇乜點解釋過「似樣調整」係D咩，皆因之前唔成形。所謂「似樣」，唔單係幅度，重點係參與度。筆者估計近黎應該有足夠人受到「逢低吸納訓練」。當跌市開始時，每逢去到關鍵支持位，都會接貨。其實係派貨。當大家以為個市又頂得下既時候，再破位向下。由於大家習慣恆指不死，都唔捨得沽番出黎。然後又落到下一個支持位，然後又有人吸納，然後又以為冇事，點知又破下一個位，更加唔捨得沽。直到一個又一個希望都幻滅時，心碎沽貨，就響黎個時候沽干沽淨，跌市才完結。對筆者黎講，黎D先至係調整。黎D先係筆者最驚既跌市。但願筆者睇錯，今次唔會咁發生。

即使唔發生都好，加上G7會議在即，十七大就完，永遠當美國股市同經濟冇到係唔可能，而美市一D都唔樂觀。

個市令我好唔舒服，我想早D走。