底部十字胎

今日出現了底部十字胎，為跌勢中轉向之利好形態。美中不足既係：

(一) 底部十字胎出現之前一個交易日出現了十字星，
(二) 及之前兩三日亦出現了較接近十字星形態之陀螺 (即較接近好淡實力均等之局面)

出現這兩個情況，底部十字胎效力有減，始終響咁既市況，暫時好難有靚既轉勢訊號出現。且看這過底部十字胎可以帶股民去到邊。

大戶就係咁可怕

大戶就係咁可怕，咁既市況，佢地買貨黎掟。一面賺認沽既工具，一面迫到D貨有咁賤得咁賤，然後慢慢買番個港股組合。作為散戶，只能睇住佢地表演。

玖紙可以被好多不知所謂既理由一次又一次咁壓殘。筆者現時見頭半部份既圓底收集已經出現左，黎緊睇下個圓底收集既後半成唔成形，如果係既話，又一次可以欣賞到大戶既力量。遲D再同大家跟進。

市況壞加大戶做野，威力驚人，19蚊入貨，然後見14蚊，14蚊再入，又可以見10.9，冇所謂，到下一個水平又可以再吸。之所以「增持」係一步步黎，黎種市況，應該一注大過下一注，因為第一注係特別細，留好多力，但如果個市升左上去，就算數唔追，小注就小注，賺少D，好過蝕大左，反之大市再向下既話，又可以大注些少買更平既貨。而每一步入貨位唔可以定得太近，否則冇意思。溝起貨上黎，要做到效應大。

第一步增持 (續)

筆者進行第一步增持，黎D位入市，分分鐘要捱價，不過部份股份已十分抵買，係可以吸納。同樣投資唔摸頂，亦唔應該摸底；摸頂多數得個吉，甚至倒頭蝕，摸底結果乜都買唔到。故筆者自己雖然肯入貨，但唔會推介其他人入。如玖紙19元入完，可以見14元，14元入完，第二日低見13.38，介紹人買，自己心裏重唔安樂。

至於大市，幾乎未聽過有財經分析員話唔會再跌，個個都話要試250天線 (亦即牛熊分界線)。筆者恐怕咁既情況，一係就唔試畀你睇，一係一試就要試過龍，黎個牛轉熊。

筆者入了新地，試九倉，試中電訊，吼實中移動，增持玖紙，繼續搏中壽同工行。本來地產方面，望美國有所行動，但係似乎冇乜料到。星期一分分鐘又要捱下，分分鐘又唔係，唔顧得咁多住。

第一步增持

筆者今日再入貨，敢入貨，但唔敢建議人入。
香港地產類。中資電訊類，如中移、中電訊，甚至中通都OK。中壽、工行都入得過。

筆者預測雖然準...

恆指並沒有完全走在筆者於一個月前的預測路軌，中間反彈時乏力，「撻」左落去，但向下既走勢，同破位時間奇準，就係咁橋。

筆者唔係黎領功，反而係想指出筆者有咁既睇法，但卻成日身痕入市搏，加上睇錯又冇走人，繼續搏黎樣，搏果樣，終致損手，認真抵打。筆者多次自己唔信自己既技術分析，衰過再衰，盡顯人性軟弱：貪、耐力唔夠。更枉有讀者錯愛，留言稱讚，甚至以「師傅」稱之，筆者受之有愧。投資之道，心理質素要高，筆者曾經自以為做到，實質上有排都未出得山。

講番大市，糾纏的MACD急急拋離訊號線，顯示大市繼續疲弱。反觀DI+奇怪地急升觸及DI-，RSI(14)亦觸及30，大市反彈。大市冇咁快脫險，重有第二個Mistake要Correct (參看輪都輪到恆指...)，大市反彈後好大機會要向下再試。世事難料，下下摸底吸貨亦不可取，故筆者進行第一步入貨。於第一個關口初步只尋找過份拋售既股份，如玖紙，指數敏感股應還有低位可吸，唔使心急。

大市隨筆者12月17日之預測而行

見文：輪都輪到恆指... (12月17日)

筆者預測，筆者自己亦沒有跟足黎做，期間搏黎搏路，認真心態差。

今日到預測之第一個關口，因而進行第一步增持。若然再到第二個關口，該再進行第二步增持。

玖紙平到離晒譜，筆者再入。

進行第一步增持

搏、搏、搏

道指跌249點，港股反而高開，都話估佢唔到，升萬唔好亂做淡。

一月份下半個月都係搏以下幾樣野：搏炒業績、搏大幅減息、搏國內炒上、搏大戶要炒上。
唔搏唔錯，但做淡就唔係咁妥。

繼續收於旗幟之內

雖曾經試穿旗幟頂部，但今日收市回歸旗幟之內，如此糾纏既局面係都要去到最盡。可見MACD(8,17)貼實訊號線，糾纏得緊。ADX趨勢線下降，繼續無趨勢現象。上升及下跌動力同樣向下。咁既技術走勢顯明炒上炒落都有機會輸，正正係近日市況，故筆者上星期未即使見道指大跌都好，都話做淡買put會輸。

美股今日該回穩

走在旗幟之內

在此先要解釋清楚「旗形」是甚麼。

旗形有分上升旗形及下降旗形，在此只解釋上升旗形，讀者醒目，自然明白下降旗形係咩一回事。股價出現利好因素，經一輪買入，形成升幅，成交量上升，是為旗竿，亦構成了最小量度升幅。經一輪熱炒，高位有回套，股價出現下滑通道，是為旗幟。沽壓最終消化，可見成交量萎縮 (此乃重要的一點) ，再炒，向上突破下降軌，展開新一輪升勢，成交量始增，升幅將達至旗竿所構成之最小量度升幅。

睇番恆指，心想咁次發達！當旗竿由20,000點起計，最高去到32,000點，有成12,000量度升幅，成交量於該階段見上升。其後出現旗幟，成交量亦明顯見萎縮，今番突破，豈非要由約27,000點水平最小升至39,000點！嘩，早排大叫08目標40,000點，唔係亂講。

聰明既讀者都知有下文。旗形有好幾個變種，分別在於旗幟，可以係下跌三角形、下跌楔形、又或者對稱三角形。其中下跌三角形同下跌楔形只係指旗幟本身，但整體係上升格局，同基本旗形一樣，三者皆屬上升旗形。但係對稱三角形既旗幟就基本上同純「對稱三角形」走勢冇分別，就係可以向上突破，又可以向下突破，之所以形成對稱三角形，就係整固格局，整固後先再出方向。所以剛才打既如意算盤打唔響。坊間半桶水分析員解唔到畀人知，唔信可以試下打電話或寫信考下D分析員。


再睇番恆指，MACD(8,17)同MACD(12,26)都呈現紏纏不清既局面，同樣顯示大市方向未定。究竟向上還是向下突破，單純睇道指大跌而定都唔係咁可靠 (道指跌可引發港股星期一低開，但係可以係一開就接近最低點，結果星期一先黎做沽，一樣輸錢) 。國內投資氣紛又確實轉好。家下港股命運完全落響期指大戶手中。正如六叔所講，大市如今轉為賭場 (筆者曾經解釋過股市唔可以比諭為賭場，只係部份時間係賭場，符合六叔言論) ，完全推測唔到星期一係升係跌。

對一半、錯一半

大市假後的確裂口高開209點，但係收市係倒跌。重要黎盤冷水，內銀股首當其沖，以建行跌得最勁。筆者搏唔到，就要睇位走人，錯左就要認輸。可能考慮觀望至期指結算後。


中資金融股今日跌得最甘係建行，筆者假前搏，都唔會搵番佢黎搏。之前提過建行形成左頭肩頂既形態，其實凶險非常，但筆者勸唔到人趁後抽沽出建行，避一避風險，但係後抽只會令投資者更加唔想放棄。後抽起初無力，但係假期前夕，可能同筆者一樣搏一搏，升勢轉急，大大穿出頸線，但今日乜都回番晒，成交亦增加，令人擔心。筆者當然都希望唔好太大鑊啦，若然所謂頭肩頂真係成效，都未必要跌至上次講既量度跌幅方休，希望下圖講既底部目標發揮效力：

亦可以寄望150天線有支持，不過，視佢為支持，即係話穿左既時候，係進一步利淡，拋壓會響黎個位加劇，因而「居然」可以將建行壓回5元水平。(用「居然」係因為D人唔信頭肩頂既利凶，唔信建行可以去番5元水平。)

至於MACD(8,17)痴埋訊號線，還未升穿，即反彈訊號未出。

歷史將重現，聖誕假後裂口升

上年聖誕前夕，恆指為19,320，假後開市19,620，裂口高開了300點，以當時基數黎講，係多架，依家大家慣左，恆指基數亦變左，300點係小事。上年裂口高開，尤其係中資金融股，跳升得更利害，係因為國內A股響港人放假其間大幅做好，筆者預計將會歷史重現。主要原因係國內氣紛剛扭轉，之前弱勢既銀行股要發作。重圖表睇，形勢較好既係工行同交行，其次係，...令人唔開胃既中行。

輪都輪到恆指...

一絲希望都冇埋，補完11月尾反彈裂口都未能彈一彈。眼下唔係講緊咩100天線、150天線，而係下兩個裂口。回補裂口既意義就係回補過錯，要回補「亂喊直通車」既過錯。第一個關口係24,997至24,599。第二個關口係23,304至22,933。補回第二個關口為目標最為正路。樂觀D睇，100天線、150天線給予一個反彈既藉口。筆者預計一個旗形走勢，若然反彈唔出現，即穿旗形底部，就直接向25,000點水平進發，見150天線或回補裂口A方休。 MACD(12,26)已再渡由正變負，並穿了訊號線，各位於本網誌該已見識過，咁既跡象代表點樣冇運行法。DMI顯示下跌動力及下跌趨勢皆加強，而上升動力下斷下降。恆指如此走勢正中「任姓者」下懷。

玖紙情況暫時可以

筆者所見，大戶升方百計要壓低玖紙入貨，留意每次穿19元後，推至18元以後之買盤。除多次出現「長腳」外，「長腳」亦續漸縮上。玖紙將於一月完成有關上游交易，筆者懷疑有心人力壓玖紙入貨。經過一個月來，於大市氣紛欠佳情況底下，吸貨者該皆屬強者。建議持貨者既然之前忍得佢見18元，可嘗試忍耐多一會。MACD雖未見好，亦未見進一步轉壞。DI+將要升穿趨勢線，有些少運行。

建行形勢凶險

建行走勢形成了「頭肩頂」，現下已跌穿頸線，將要再向下發展，其走勢形態之所謂量度跌幅約為4.8。估計反彈在即，反彈將受制於頸線，但若升穿亦不代表轉勢，除非連續多個交易日 (最少三個) 企於頸線之上，若真的如此，到時再買入亦未遲，現下不該吃眼前虧。趁反彈要走人，唔反彈都走。MACD所示，短期唔使荒有好轉。

北海道壽司飯不知幾咁好味，香港金管局任總不知所謂

渡假期間，忘了港股，回來後，無事忙了一週，暫時未能完全掌握大市脈膊。懶懶閑閑，只有小許覺悟：渡假前抽的中鐵，星期四拋了。回來後，晴天霹靂的不是市況，而是「每週財經動向」要暫停，以後人生少了樂趣。

臨渡假前，筆者發現大市出現異動，將要作勢反彈，且認定是次反彈會歷時較長，卻殺出「聯儲局緊急會議」一流言，擔心睇錯市，但結果只屬短暫干擾，大市還是乖乖的反彈了好一段時間。闊別大市一輪，眼下又到了危險時刻，筆者需時與市場接軌，暫時對市況尚未有強烈心水。望下幅圖就唔多叫人開胃：

自MACD(8,17)於負值下升穿訊號線，顯示跌勢中出現反彈 (但並非轉勢) ，結果恆指亦真的展開反彈，30,000點前腳軟，現下MACD(12,26)回穿訊號線，形勢不妙。DMI顯示大市無趨勢可言，勉強可以話上升動力還在加強中，而下跌動力在減弱中。

現下形勢十分不妙，但卻有一絲生機，生機並非指大市會轉為向好，而是並不如市場人士睇得咁悲觀。反彈裂口於星期五完全補回，將會再次反彈，但反彈力度會弱過上次，筆者認為情況發展落去會做成一個旗形走勢，大市才進一步找方向。同時筆者認為可以繼續渡假，08年2、3月大市先見番好。

任總不知所謂
響政府入股港交所見光、及市場亂傳直通車消息時，冇見任總出黎講過D咩以正視聽，任由個市亂咁飛。一直出現次按問題，佢都同大家講對香港金融體系及銀行體系影響唔大，但係響個市走下坡時，又突然加多腳話有銀行業績可能要見紅。只屬「可能」既野係唔係要同大家講呢？佢咁講會有好大影響，佢會唔會唔知呢？所講既係邊間銀行先？講埋D咁既野有咩作用呢？有咩居心呢？

筆者覺得明顯成件事係班友一開始誤以為行直通車，既可托高香港個市，制造回歸十年一遍繁華，又可以幫忙祖國排洪。好大喜功，亂估阿爺喜好。結果阿爺開聲回應先知攪爛錯晒。其中一個要點就係要直通車成事，港股就唔可以過貴。所以佢地要先收拾番個殘局，要港股回到未癲時，如果唔係就唔使旨意開到車，咁港交所就唔會值咁多錢，政府就入錯市。只有咁，筆者先解得通阿任總何以出口「干預市場」。由政府入股港交所見光、到華哥一陣又話互換，一陣又話直通車就快開，到任總出口干預市場，配合中央既講話，同埋後期先見任總同銀行界人士上京深入溝通，可見佢地不知所謂，估錯阿爺心意，攪到港股發展至如斯田地。就放長雙眼睇下佢地點攪落去。

筆者外出渡假，12月9日回港，網誌期間可能未能更新，抱歉,，抱歉。

港股反彈未完。純睇圖，MACD(8,17)與訊號線剛好匯合，顯示恆指低位會有反彈，但未算轉勢。

美國感恩節消費出奇跡既可能

筆者認為美國感恩節既消費將出現奇跡既原因有三個：

一、美國人鐘意消費果條根係香港成年人、中、老坑所無法能夠明白，但係時下香港年青人就好明白，傾家蕩產、欠債累累、都要買野！

二、上年Walmart 既 Black Friday Sales唔好(見上年一文：解讀美國數據) ，今年Walmart應該會好識做，而且美國人既策略應該唔同左，唔會等Christmas last minutes，反而會盡早出擊。

三、純筆者陰謀論，美國部份人見信貸將越黎越緊縮，部份人甚至面臨信貸崩潰，實行盡地一煲，有咁大買咁大，趁有一息尚存，狂簽咭掃貨，買定聖誕節所需又何妨。

趁勢的真理

星期二早上既動向究竟係：
一、大市短暫見底
二、大戶入貨去炒聯儲局流料
到黎一刻筆者都無法確定。

今日再次出現類似星期二早上既動向。玖紙今日都見過18.00，建行見6.85，濰柴見55.5，筆者始終認為，黎D價位入第一批貨其實唔錯，但係以為星期二下午果下已經反彈起動，黎part就睇錯。若果星期二早上大市屬挫底撈賤貨，可以話正要起革命之際，因日本股市突然炒上，然後有心人傳消息話係聯儲局開緊急會議，下午才急急炒上，破壞整個續步吸貨既形勢。消息告吹，加上壞消息一堆，反而做就左另一個機會畀大戶再挫D賤價貨出黎。今日賤貨已成功被挫出，大戶暗地吸，接近尾市，個別股份出現大戶急不及待掃貨。有智慧不如趁勢，筆者唔識，但筆者只知道，有財勢先可趁勢，大戶確實今番趁勢執多左次平貨。

筆者既錯，唔會因為黎個反彈最終做左出黎而可以抹出。筆者黎下的確係出現過情緒亂晒既情況，因而對星期二下午突然三分鐘內急升既異動完全未有想清想楚，甚至星期三早上還未有行動，的的確確係犯晒大錯。能夠洞察星期二下午勢色唔對路，即日鑊利走人觀望，到今日大圍覺得冇晒希望，先入番貨，咁樣先至係高手。

其實筆者大可以黎兩日炸炸帝帝，搏過骨，相信只要忍到聽日就已經攪掂，但係去營造一個不敗既記錄唔係筆者寫黎個Blog既目的，亦唔係筆者既作風。鬧人鬧得激，鬧自己要更激，有錯就要想辦法令自己有咁深刻得咁深刻。