走在旗幟之內

在此先要解釋清楚「旗形」是甚麼。

旗形有分上升旗形及下降旗形，在此只解釋上升旗形，讀者醒目，自然明白下降旗形係咩一回事。股價出現利好因素，經一輪買入，形成升幅，成交量上升，是為旗竿，亦構成了最小量度升幅。經一輪熱炒，高位有回套，股價出現下滑通道，是為旗幟。沽壓最終消化，可見成交量萎縮 (此乃重要的一點) ，再炒，向上突破下降軌，展開新一輪升勢，成交量始增，升幅將達至旗竿所構成之最小量度升幅。

睇番恆指，心想咁次發達！當旗竿由20,000點起計，最高去到32,000點，有成12,000量度升幅，成交量於該階段見上升。其後出現旗幟，成交量亦明顯見萎縮，今番突破，豈非要由約27,000點水平最小升至39,000點！嘩，早排大叫08目標40,000點，唔係亂講。

聰明既讀者都知有下文。旗形有好幾個變種，分別在於旗幟，可以係下跌三角形、下跌楔形、又或者對稱三角形。其中下跌三角形同下跌楔形只係指旗幟本身，但整體係上升格局，同基本旗形一樣，三者皆屬上升旗形。但係對稱三角形既旗幟就基本上同純「對稱三角形」走勢冇分別，就係可以向上突破，又可以向下突破，之所以形成對稱三角形，就係整固格局，整固後先再出方向。所以剛才打既如意算盤打唔響。坊間半桶水分析員解唔到畀人知，唔信可以試下打電話或寫信考下D分析員。


再睇番恆指，MACD(8,17)同MACD(12,26)都呈現紏纏不清既局面，同樣顯示大市方向未定。究竟向上還是向下突破，單純睇道指大跌而定都唔係咁可靠 (道指跌可引發港股星期一低開，但係可以係一開就接近最低點，結果星期一先黎做沽，一樣輸錢) 。國內投資氣紛又確實轉好。家下港股命運完全落響期指大戶手中。正如六叔所講，大市如今轉為賭場 (筆者曾經解釋過股市唔可以比諭為賭場，只係部份時間係賭場，符合六叔言論) ，完全推測唔到星期一係升係跌。

筆者抵打！

筆者近日不停聽不同分析員講解其對大市既睇法。好些分析員講類似以下既說話：「圖表派近日跌晒眼鏡，圖既走勢非常難睇。」筆者一方面聽入耳，一方面懶，故只花時間研究基本因素，居然冇拎過幅圖黎自己研究下。作為信圖者，筆者十分抵打。

由於市場上實在太多意見，筆者頭都暈，昨晚才想起：「不如都係睇下幅圖有咩啟示。」一研究就研天光。好耐都冇出過既「圖表分析實戰」，終於再次同大家見面。

最簡單一望10天、20天及50天線井井有條，走勢有幾難睇呢？然後見[1]，RSI(14)響十月份一直出現背馳既情況，的確唔係咁好，但用RSI背馳黎測市，唔係好有效，要配合指數跌穿20天線方可確認為利淡，但係到時又太遲啦。D分析員不學無術，講D唔講D，好多時誤用RSI，誤導人。背馳睇MACD會更可靠，見MACD(12,26)(紅線)於十月份始，係一個頂高於一個頂，並冇出現背馳。但某些分析員早於一星期前已經話：「圖既走勢好難睇，但係大市仍然大升。」家下睇番幅圖，上星期更加唔應該話走勢難睇，豈有此理！非常可惡，更可惡既係筆者自己，聽左就當係！你話抵唔抵打丫。

十月份MACD並冇出現背馳，但卻出現「熊差離」(見[5])，第一個Alert出現了，要開始步步為營。其實直至昨日才出現第一個「預沽訊號」：「牛熊沽貨訊號」(見[4])。 黎個係MACD既初次警示訊號，並未確認為利淡，響黎個位沽出有機會反應過快(見圖MACD於五月期間出現了長時間糾纏)，甚至會有轉向既機會。見到黎個訊號，視乎市況及經驗，才考慮沽出。響黎個時候決定減持係良策，到正式要全面沽貨，MACD會出另一個訊號，就係筆者約一年前解釋過既「MACD由正變負」。

至於從DMI圖睇，上星期四才出現第一個Alert，確認了趨先線ADX升穿+DI(有人稱+DM或DMI+)。應開始注意走勢，正式危險訊號係隨著+DI及-DI距離拉近，出現交差為利淡。

小總結：即係話以圖黎睇，筆者上兩星期就開始續步減持，其實係早左。早左已係不變既事實，錯有錯著，睇見今日江銅既表現就慶幸早走。現下未知MACD重可以糾纏幾耐，+DI同-DI尚有距離，超利淡既訊號其實圖上未出。不過等埋確認利淡訊號，有辣有唔辣，可能會錯過小許升幅，亦有可能遲左而蝕多些少。筆者都唔太後悔早走左，只怪自己居然冇去仔細研究過圖先至行動。市場上既分析員，睇錯市，唔係罪，但係對圖表既認識只係比散戶強少許，然後發表偉論，係可恥！(講開又講，有位人稱X Sir既，乜鬼野都叫圓底、圓頂，係唔係都畫個孤出黎，真係直都變孿，筆者難以理解。)

順便回顧一下，響7月尾MACD圖出現第一個Alert，「預沽訊號」，即「牛熊沽貨訊號」(見[2])。隨即出現跌勢，到8月頭出現MACD正變負，隨後跌得更慘！冇耐，至8月中後期，出現第一個Alert，但係今次係好野，調轉黎講係「預買」訊號 (見[3])。然後唔夠幾個交易日就出現埋MACD負變正既確認利好訊號，之後大市就飛昇！圖表厲害之處由此可見。只因不學無術財經分析員將咁好既野活埋，將事實扭曲，令人誤解圖表係冇用。

唔怕你話筆者煩，筆者再重申：大行出口術，消息唔可信，圖表係誠誠實實地將交易記錄，作出分析。雖存在有心人可以做走勢陷阱，但點都有個譜，只要豐富自己既技術同經驗，不忘以基本分析配合，就可以睇穿，可以避過。圖表分析係無往而不利既工具！升萬唔好是旦跟人講圖表係騙人。

給非信圖：MACD點解會Work呀！(續：玖龍紙業強勢再起！)

本文，見數學頭暈者不宜。

有朋友話唔服，唔buy技術分析，唔明點解D咩MACD(8,17)會有用。

Let's Get Technical!

MA (Moving Average) 與 EMA (Exponential Moving Average)
EMA(X)係指X日既Exponential Moving Average，比普通既Moving Average (又稱簡單平均線)既計法複雜。普通Moving Average，見十天線、二十天線等，係X天既平均價。但Exponetial Moving Average則是累進數，今天的EMA(X)=(昨天的EMA(X)*(X-1) + 今天收市價 * 2) / (X+1)。用人話講，例如，今日既EMA(8)既成份係：昨日EMA(8)佔7/9，及今日收市價佔2/9。

十個交易日前既股價對十天平均價既影響係零。但係十個交易日前既股價對EMA(10)依然有一定既影響 (例如該股價比平均價特別高或特別低)。如果有一日股票價格突然發癲大升，然後第二日又打回原形，以十天、二十天線作分析，即係話係十日內，十天平均價將反 映這個突變，但第十一日，卻只有二十天平均價反映這個突變，而第二十一日，該日股價則完全不在分析範圍內。反觀EMA，視乎該日價格急抽幾多及日後股價之表現，其影響 是慢慢淡化。

而且，即日收市價既成份比係較重，佔兩份，即係話EMA反映到當日既最新既變動。而MA則很平均地反映過去X日既股價表現，包括當日。

黃金交差的真義
黃金交差，即十天線升穿二十天線。即係話十天短期走勢強過二十天既走勢。又即係話十日平均價高過二十日平均價。

Let MA(X) = X天平均價。
Let F(X,Y) = MA(X) - MA(Y)。

F(10,20)就係十日平均價減二十日平均價。所謂十天線升穿二十天線，就係當F(10,20)由負值變為正值。

MACD(X,Y) = EMA(X) - EMA(Y)。

MACD(8,17)=EMA(8)-EMA(17)。所以，MACD(8,17)由正數變為負數代表EMA(8)升穿EMA(17)。用人話講，短期既累進平均走勢強過較長期既累進平均走勢。叫佢做「Exponential黃金交差」亦不為過。

細心實習研讀圖表既朋友不難發現好多時出現黃金交差時，股價走勢卻未見好，反而冇耐又出現番死亡交差，然後又冇耐見番黃金交差，十天、二十天線糾纏不清之情況。皆因如之前筆者所講，單日急變之股價於簡單平均價之影響可以突然唔見晒，所以「簡單」既黃金交差既訊息有誤導既機會。MACD誤導性較之低，Exponential黃金交差一係唔出，一出既話，訊息較明確。唔係話「簡單黃金交差」冇參考價值，始終都有佢既認受性，只不過唔排除會出現翻覆既情況。其「簡單黃金交差」反應較MACD快，所以都好有參考價值。圖表既野，反應快，就資料唔足，準確度降；準確度高，要集更多資料，而反應慢。所以某些數據係作長線用，某些則作短線用。圖表分析非常復雜，單係要掌握黃金交差已經非常唔簡單。真係唔好咁無知，輕言圖表分析只是一場笑話。

之所以有訊號線
參考番上面提到既F(10,20)，F(10,20)係正值，代表，10天線維持係20天線之上，數值越大，代表拋離越遠。但係F(10,20) = 2係冇代表性，因為如果講緊既係匯控，股價於$140水平，10天線唔算係點拋離條20天線，但係如果講緊既係信置(83)，股價於$19水平，就算係拋離得幾遠。MACD(X,Y)亦然，所以要加條訊號線做分析。

MACD(X,Y)反映 「短期走勢勝過(或差過)長期走勢」既程度。數值越大，程度越高，但係如上舉出，單睇數值，冇代表性。

訊號線EMA(9)比較令人攪唔清。黎個EMA(9)唔係講緊個股價既九天Exponential Moving Average，而係MACD既9日平均價。所以筆者都係鐘意叫佢做訊號線多D。MACD(8,17)升穿訊號線即係講緊，「短期走勢勝過(或差過)長期走勢之程度」有擴大既跡象。

MACD之解讀
之所以：
當MACD為正數，視股價處於升勢 (短期EMA跑贏較長期的EMA)。
當MACD為負數，視股價處於跌勢。
當MACD升穿訊號線被視為向好 (EMA既黃金交差麻)。
而分別當「升破」是出現於MACD為負數時，被視為股價有止跌回升、反彈之趨向，但並不視為強烈買入之訊號 (皆因MACD為負時，短期走勢還是遜於長期走勢)。
而當升破出現於MACD為正數時，被視為股價展開升勢，為強烈買入之訊號。

明白筆者既解釋，拎番玖龍紙業既圖黎睇番筆者所講既「簡單黃金交差」同「Exponential黃金交差」，會領略更多更多。

用咁既角度解釋MACD為筆者個人既心得，未見坊間有咁既解法，筆者唔想重複坊間有既資料，如果唔係大家不如買書睇，唔需要睇黎個Blog。如果覺得有所得益既話，請反映畀筆者知啦 (匿名也好)。又如果坊間有書籍以類同既手法講解，不仿同筆者及各位推介下啦。感激。

(P.S. 對圖多多懷疑既果位朋友，你畀得功課筆者做，筆者下次見到你一定問番你！嘿嘿！)

玖龍紙業強勢再起！

筆者於上個月同大家分析過玖龍紙業 (見上文)，研究過瑞信之言論，叫持貨者唔好畀人震走，而且於出現「平底」後，預測股價會止跌回升。結果股價回升至$13.45水平受阻，以弧形急下，至上次「平底」位置，支持再現。筆者今早已狂寫，推介此股，可惜日間事務煩擾，一路寫，佢一路升，故決定盡早出文推介左先，詳細分析依家先同大家討論。

技術因素見好
一月初雖出現黃金交差，但係快支持不住。MACD(8,17)升穿訊號線則更為可靠，而且MACD(8,17)快要由負數轉為正數，走勢見好 (至於究竟成日講MACD，點解會Work呢？密切留意下一篇文章)。DMI-代表沽壓DMI+代表上升動力，雖然兩者均見向下，但下跌勢力比上升動力向下發展較急，有機會發展為DMI+升穿DMI-及升穿ADX (趨勢線)。
若果達成此局面，走勢將更明朗。今日一枝大陽燭一拼升穿十天及二十天線，且成交量上升。

基本因素亦見好
得到花旗認同，評級由「持有」調高至「買入」，目標價則由9.8元，提升至14.5元。而且大股東張茵於12月31日增持股份，持股量由72.79%增至74.79%。12月31日增持，作價該於$13水平，唔講得笑。(筆者再按：其實早前已有大行實地考察過，不單止唔係好似瑞信所擔心既供過於求，玖紙既2007年定單已經完全接晒。黎D野，唔見有人周圍唱。[update:2007 Jan, 15, 21:52pm])

今日可見當初筆者勸大家唔好輕信大行報告，唔係亂黎。

上期「官曹亂估」

續「精制失修 既 官曹亂估」：

多人提出手上未有筆者所提之「精制失修」(23 Dec - 29 Dec 2006)。筆者當然不能轉載，但能類似地將其內容模擬一下... 以下綠色部份為筆者加入之備注：

佢話：「...招金出現雙飛烏鴉利淡訊號。料短線既沽壓會持續...」(注：筆者原汁原味跟佢括錯)

佢又話：「... 恆地STC同14天RSI未現反彈訊號 ... 支持位係$42.6，阻力位同目標價都係$44.4。」


佢又話：「... 新濠明顯低於保歷加通道底部，料短線既沽壓會減，$17係初步支持位。」

另一位話：「... 港交所RSI出現背馳，建議沽左先，等落番$70先入番貨。」

港交所自此每日創新高，星期五收$85.5。死未！

「精制失修」既「官曹亂估」

筆者特設圖表實戰分析一欄，希望大家可以對圖表有一個切實既了解。坊間關圖表分析既入門書籍，好多時用過往圖表作例子，令好多人懷疑其真確性，因為成個市場有咁多隻股票，好容易搵到隻走勢"fit"落去。所以筆者以本欄作一些圖表預測，讓大家親身體驗，而且相信一直以來，冇令讀者失望，由恆指走勢、個股如建行、玖紙、甚至得果幾日既建滔板都交足功課。

寸盡「圖表派」既笑話
一個寸盡「圖表派」既笑話：一個圖表，三個人分析，四個結論。

三個人分析，有三個結論，第四個結論係實際結果，即係寸話三個唔同既分析都唔中。寸係寸左D，不過個笑話幾有智慧，亦都反映左部份既事實。圖表冇錯，分析既人會錯。圖表唔會講大話，大戶呢，經紀呢，你信邊個多D？所以筆者不斷強調，圖表分析唔易掌握。坊間，信圖者信錯，不信圖者亦錯。

「精制失修」既「官曹亂估」
筆者見最近財經雜誌「精制失修」，增「官曹亂估」一欄，極不願置評，都忍唔住，評左喇。多多得罪，請原諒在下的見識少，唔明佢地點解會搵D咁既野黎講。不過大家可以好似觀察筆者既分析一樣，睇下佢地所提及既股份今週既走勢，參考參考。

評亂今週「官曹亂估」(23 Dec - 29 Dec 2006)
招金所呈既唔係「雙飛烏鴉」，括都括錯 (括住兩枝陽燭，點會係呢？聰明既讀者都諗到：「烏，黑也」)，筆者猜佢係想括最後果三枝。就算係咁，都錯，黎個頂多似係「雙鴉」，唔同「雙飛烏鴉」。就算修正番做「雙鴉」，都錯！根本就唔成立，既唔係「雙鴉」亦唔係「雙飛烏鴉」。「雙飛烏鴉」，之所以「飛」，指既係裂口升，裂口升既陰燭，連續兩枝，「雙飛烏鴉」也。「雙鴉」，一枝大陽燭，然後「飛」第一隻烏鴉，第二隻烏鴉回補裂口，深入第一枝陽燭之實體。「雙飛烏鴉」與「雙鴉」，冇錯，係利淡訊號。

恆地之前出現「島形頂」，以家下市況，冇謂為左粒毒蘑菰而放棄成個森林掛。就算係咩市況都好，都冇理由42.6支持位搏入抵押間廠，然後係44.4阻力位沽出賺粒糖，讀者都係小股民居多，唔好玩啦。

新濠，的確有機會反彈，但係「穿保歷加通道底部」理由唔充份！大跌既股票，可以貼住保歷加通道底部咁一齊跌。

港交所，超買之後大可以再超買，背馳之後可以再背馳，尤其係大升市中。

筆者認真睇唔過眼，日後再同大家講多D圖表分析既準則。黎編已經夠晒反思喇。

大市升勢，本網誌捧場者預左啦...掛...

放假加地震，久遺了。趁朝早網路交通冇咁擠塞，快快寫。

大市如筆者上月推測咁發展，不過升勢之急卻冇意想過 (筆者本來話升勢要殺上20,300點，但於12月內完成唔到，見文。今日係最後交易日，雖然都有機會講中 (指12月內去唔到20,300)，不過真係冇諗過可以於12月內企係20,000點樓上，重多一點咁頂癮)。如今筆者預言已應驗左八成，只剩餘最後一部份，就係「到時要殺到落一月」。本文該於上星期五寫成，但係只係做好左o的圖，就放假去也，點知放完返黎又，唉... 冇緊要，好多野筆者一早都不斷同大家跟開 (如MACD線一路既發展)，其實冇乜surprise。今週升勢其實先兆早已於圖表呈啟示。下圖為上星期五 (2006年12月22日) 為止之恆指走勢圖。


筆者於恆指展開升勢前，已不斷提及MACD的指標。MACD(12,26)為一些專家建議分析港股的參數，筆者認為反應較慢。筆者還是喜歡使用MACD(8,17)來捕足升勢。如於上星期五觀察MACD指標，可見MACD(8,17)已明顯升越EMA(9) (所謂訊號線)，而且可以確認為「非糾纏」形態 (筆者於12月14日提及要觀察是否只屬糾纏，見文)。反應較慢既MACD(12,26)亦升穿EMA(9)。

上圖中，筆者特別以橙色及籃色線指出一處該注意既地方。MACD線升穿訊號線於0.00以下為跌勢中出現之反彈，有機會反身。MACD線要於0.00以上升穿訊號線才可以正式確認為大市向好。

談玖龍紙業

玖龍紙業經瑞信唱衰後展開跌勢。

（一) 事發經過

11月23日，玖龍紙業於$14水平有回套壓力，於11月28、29日於$13水平有支持，回升.$13.78。11月30日再戰$14水平。就係黎個時候...

瑞信於12月1日公告給予玖龍紙業<2689.hk>評級「跑輸大市」(即「減持」)，目標價$11.15。理由主要有兩個：

一、該股過去九個月累升324%，估值昂貴。
二、現價尚未反映供應急增風險。

玖龍紙業於當日回軟至$13.42。瑞信再出黎講野...

瑞信於12月4日公告將理文造紙<2314.hk>評級調低至「中性」。理由係：

三、兩大包裝紙龍頭將於07-08年計劃合共把年產能分別增加301萬噸及247萬噸，估計內地包 裝紙巿場將無法在2年內消化共年產550萬噸額外產能，屆時會導致包裝紙巿場出現供過於求局面。

玖龍紙業再展跌勢，上星期五 (12月15日) 單日急跌，由開市$12.88直插至$12.04收市。

(二) 分析瑞信言論

(二．一) 實質產量
按玖龍紙業集團 (2006年6月30日) 公佈07年詳能增幅為62.1%，即由330噸增至535噸。增加205萬噸，瑞信同大家玩數字遊戲，預計埋玖紙08年產能達727噸，先得出07及08年產能達301萬噸。

按理文造紙行政總裁李文俊 (2006年11月21日) 表示計劃未來18個月將包裝紙產能提升至380萬噸，即增加215萬噸。瑞信計既係07及08年，即係話佢估計理文造紙在6個月內再增64萬噸產能。

瑞信假設兩集團皆於08年再進一步提升產能，黎個假設成唔成立呢？過左07年，如果真係求過於供，兩集團係唔係都會再進一步增產而加劇供過於求既狀況呢？

(二．二) 實質供求
預計中國從05年至09年對包裝紙需求每年增長率達9.2%。而據瑞銀所指，全球包裝紙供求環境理想，全球包裝紙價格穩步上揚，自7月至10月期間，牛卡價格上升4.3%，瓦楞芯紙價格更上升13.2%。

中央鼓吹環保的政策, 令內地部分規模較小的造紙廠相繼倒閉或停止生產。90年代，中國紙及紙板企業6500戶。2005年只淨3600戶。相信06年會更少。花旗預期玖龍及理文於09年合計市佔率將達到30%。

（二．三） 實質前境
邊個話D包裝紙做出黎只准供應國內呢？據玖龍紙業集團主席表示，會尋求增加出口，藉以開拓選定的國際市場。筆者所知，埃及對紙品從海外進口之需求極大，而我國亦與埃及發展這方面的緊密合作，其中印刷品已達成拹議。據「中國造紙拹會」預計，今年包裝紙代表，箱板，其出口量亦增長了2.7培。

2004年全國紙消費量5439萬噸，2005年全國紙消費量5930萬噸。每年起碼有7%增長。冇人話個玖龍紙業永遠都只係造包裝紙。

(二．四) 結論
回應瑞信理由一：九個月升幅係勁左Ｄ，不過行業前境非常理想，而集團技術提升，產能又增加。貴得有理，30倍市盈率係可以接受。

回應瑞信理由二：咁講，現價都未反映筆者剛才提到既出口、新紙品發展啦。

回應瑞信理由三：數字未必係佢講咁多，可以重多D又得，咁要睇到時市況。依家只能睇07年既產能提升420萬噸 (而唔係佢所講既550萬噸) ，亦唔一定係要由內地食晒既。有420萬噸多左，其實亦由於有更多工廠倒閉，又會有約干噸少左。總之等埋06年有關紙業既佈告出左，先可以再下定論。筆者認為係樂觀既。

（三）走勢分析

筆者點樣有道理都好，冇得同市場拗。如果群眾係跟瑞信齊齊悲觀，股價就會跌，硬頸都冇用。股價表現脫離基本因素，唯有參考圖表睇下有咩啟示。


今 次所展開既跌勢，起碼要回補上個裂口。上星期五已完成。今日承接前收市價$12.04開市，回升，收$12.62。上星期五急跌時成交量達2千3百多萬， 今日回升時成交都有2千萬。重圖表睇，今日造左一個平底 (跟倒轉搥鎚頭)，為轉勢訊號。平底出現於長期跌勢更有認受性，出現於玖紙既係短期跌勢，只可作轉勢看，未能作為再次進入長期升勢看。短期再睇其他指標會 否轉強，例如擺脫上星期四所形成之「死亡交差」而再次出現「黃金交差」、MACD回升訊號線、%K線重上%D線、或DMI+再次與DMI-分道揚標而 DMI+升穿ADX等 (夠喇，日後有機會再探討。)

10月10日花旗話短期存在配股風險。期後有人搧風點火，講到好實咁話玖紙配股集資約干億，由某某大行負責該項配股。引發女首富出來怒吼：「集團有充足資金，我要那些錢來幹嗎？」。玖紙再展升勢。今番「供過於求」既疑雲可以攪幾耐呢？

(利益申佈：筆者持有玖龍紙業(2689)之股份。)

大市走勢

恆指今日升1%，但成交量比昨日少左D。有島形底既國企今日繼續跑贏恆指，升2%，而且成交量理想。

恆指10天線依然係20天線底下。50天線繼續攀升，現處於18,599。昨日恆指一度接近50天線，有驚無險。如筆者講左兩星期，跌莫悲、升莫喜，恆指呈長方形走勢橫行左頭半個月。而且上唔過19,200，下唔過50天線，至今一直應驗。若超出該兩個範圍，就會出現升勢或跌勢，所以至今未見明顯走勢。筆者亦於上月預測今月接近後期才出現升浪 (即係話，若突破此長方形牛度格局，將會係向上突破)，希望黎部份都應驗埋就皆大歡喜喇。
用MACD分析恆指走勢都唔錯，筆者採用12，25，9作為參數。有關MACD，有機會再講。MACD及訊號線並排向下，差不多見負數。家下望就望 MACD明確升穿訊號線 (即紅線(MACD(12,25))在藍線(EMA(9))之上)。筆者在上圖亦特別指出MACD於訊號線上時恆指皆處於升勢。

國企指數靚仔得多，筆者不厭其煩咁提住島形底、島形底。國企五條平均線整整齊齊，順序排列。昨日急跌，但島形底守得非常靚，所以出現一枝「錘頭」。

國企MACD緊貼訊號線，大有機會升穿訊號線而再現升浪。

總括，國企指數非常靚仔，今日國內滬深A股指數創新高。相對恆指依然處於筆者所講既「跌莫悲、升莫喜」格局。筆者提過期指大戶有機會嘗試制造恐慌，試穿50天線。不過大多數投資機構皆認為穿50天線就代表要中期調整，唔知係唔係因為咁，期指大戶都唔敢玩到咁大呢？但係隨住條50天線一路攀升，期指大戶會係高D位試下條50天線都唔奇，不過暫時筆者未見會咁做住，唔使驚。

陰陽燭圖簡介 (給初學者) 及 即時應用：建滔積層板

筆者經常用到陰陽燭圖，應初學投資既朋友所示，在此簡介一下。傳統圖表用柱形圖 (或稱棒圖)。西人最常用既係OHLC (Open開市價、High全日最高價、Low全日最低價、Close收市價)，左邊橫柱為開市價、右邊則為收市價。OHLC之開市收市一左一右，唔夠「腦朋友」(brain-friendly)。要知當日收市高於還是低於開市，要於腦中作左右比較，個別一兩日走勢還不覺怎麼，但一幅一年期既日線圖就會睇死人。而發源於日本人既陰陽燭圖就簡單直接得多，陽燭代表收市高於開市，陰燭代表收市低於開市。見下圖：


建滔積層板(1888)上板短短四日，無走勢線分析之可能，更不足日數以作計算MACD、Slow STC、DMI、RSI等指數。但係陰陽燭圖卻對賣買去向有所啟示，雖然四日新股，難以作推測，都即管試下、玩下，做下實例都唔錯：


上圖所見，已反影高位暫時推盡，由招股價至現價已見鑊利，散戶回套再抽新股唔奇。

「射擊之星」出現於上升趨勢，實體極短，陰陽不拘，上影線長，無下影線 (或甚短之下影線，故筆者稱上圖第三枝燭為「近似射擊之星」)。出現「射擊之星」，反影上升持久力弱，後市將見頂回落。結果第二日已出現回落，且形成下一個唔靚仔形態！

「黃昏之星」出現於上升趨勢，以三枝燭成立，結構較複雜，此不作詳細解，總之類似上圖之形態，第二枝唔一定要係「射擊之星」，只要實體短便成立。加上以下加強形態之因素，淡上加淡：

1. 「黃昏之星」第一枝 (12/08)同第二枝 (12/11)實體之間有裂口。
2. 「黃昏之星」第三枝 (12/12)之收市價深入第一枝 (12/08)既實體區間。

不幸中之大幸係「黃昏之星」第三枝 (12/12)既成交量係減少左，即係話第一枝陽燭(12/08)都有番D料到，短暫跌得咁上下，將會有番D支持。

悶市Highlight

觀望美國聯儲局議息結果，大市成交淡薄，好淡勢力均等，即月期指冇起亦冇跌，非常經典。美國星期五公佈消費物價指數，觀望持續至本週最後交易日唔奇。

國企指數有島形底，走勢果然唔同D，今日升。

中移動(941)回穩，但從圖表觀察，未見樂觀，險境未脫。當市況無乜明顯方向，基本因素未能有所指導，圖表分析大派用場。筆者並冇持有中移動，見得閒，幫大家分析下：

很多時候，甚麼RSI、Slow STC、MACD、DMI等分析，都唔及最簡單既走勢線分析。見上圖，多次短期上升軌(紅色線)都急回，而且一浪頂低過一浪頂。中期上升軌(藍色B線)已破。長期上升軌(綠色A線)重頂得住。長線睇，重可以。

短線睇，下跌軌未突破 (紫色平衡線)。12月初出現較強烈既死亡交差，即10天線(藍曲線)跌穿20天線(綠曲線)。其中20天線形成下跌通道既頂部 (真係會咁發展，好有趣，當然持有股份既人唔多覺喇)。種種跡象(短期上升軌多次急回，一浪頂低過一浪頂，出現死亡交差，又破中期上升軌)都顯示中移動利淡。不過淡到家下，又可以咁睇：

從陰陽燭圖睇，下降通道頂部出現兩個「十字星」(紅圈處)，顯示兩次短暫上升勢中，皆出現見頂訊號。以b比a緩和。於下降通道底部，則出現三個「十字星」(1勉強算是吧)，顯示三次短暫下降勢中，皆出現見底訊號，而且一次比一次強烈，即回升力度越來越強。以第一幅圖中出現既長期上升軌有支持，加上短暫跌勢有減緩兆頭，睇埋黎兩日可唔可以突破下跌軌。情況有機會轉好。

匯控150天線有支持。$140既匯控，息率達4.5%，都幾吸引投資者；長線持有，唔理得咁多；12月11日中國銀行開放給外資銀行，內地方面既好消息將會慢慢會蓋過美國方面既壞消息。技術方面，則同樣係險境未脫。

筆者於11月14日始評論過五隻中資銀行股 (見還有兩個大市分析之重要元素 與 近日市況)，亦於11月20日再作稍深入既分析 (見恆指跌228點，但對大市維持看好)。今日以當時兩編文章發放日及今日之收市價回顧一下：

   11月14日 11月20日 12月12日 自11月20日  自11月14日
   收市價   收市價   收市價   錄得升/跌幅  錄得升幅
建  3.89    4.09     4.21     + 2.93%   + 8.23%
工  3.87    4.01     4.15     + 3.49%   + 7.24%
交  7.05    7.22     7.11     - 1.52%   + 0.85%
招  14.7   15.96    15.06     - 5.63%   + 2.45%
中  3.56    3.82     3.78     - 1.05%   + 6.18%

筆者睇好建行同工行，不過兩者間，選擇力捧建行，好明顯啦。唔多鐘意交行同招行，因為佢地細隻，較波動。中行最唔推，因為人民幣升值影響其盈利。觀乎依家各行之走勢，筆者想：對各位捧場既朋友，都總算有個交代掛。

(利益申佈：筆者持有建設銀行(0939)及其衍生工具，及匯豐控股(0005)。)

回顧建行

筆者於11月27日預測該星期建行應該要回補一個「唔補唔舒服」既裂口 (介乎$3.95至$3.88)，而且好難想象第一裂口($3.78)會跌穿 (參考「建行重係依然靚仔！？」一文)。結果第二天即應驗，回補第一裂口且於$3.78水平守住，當日收於$3.8。筆者亦首次畫公仔畫出腸，講明係入貨好時機，但深信大多數人都只會「觀望」。

筆者一直highlight埋「大魔」對建行既動作，來個回顧與跟進：
3月：降評級至「減持」，目標價$3.03。
6月：「減持」升至「與大市同步」，目標價$3.4。
8月：評級為「持有」，目標價$3.5。
11月20日：調高建行評級至「增持」，目標價調高至$4.62。
11月27、28日 ：活躍沽盤。建行一度由$4.2下跌至$3.8。
12月4、5日：活躍買盤重現。
12月7日：活躍買賣盤皆現。

現在建行比上次冇咁招搖，實屬好事。最好所有散戶都去晒新股度，建行更樂得清靜。如今建行處於所謂三角形走勢。見下圖：


三角形呈對稱，即向上或向下突破之機會均等。若走勢急些少，朝藍線走上，兩三日後便匯聚，決定向上還是向下突破。若向下突破藍線，要看成交，亦不代表走勢向壞，只屬脫離較急之上升趨勢。若走勢放緩，朝綠線走，十多日才匯聚，決定向上還是向下突破。當然，向上還是向下突破未必要等到匯聚時。形態屬對稱三角形即好淡角力。但從基本因素睇，有點偏好方面，暫時可看為消耗沽壓，而向上力度受早前過份急升後急跌所影響。持貨者值得睇埋日後發展。若能突破此三角形格局，將展開另一升勢。

(利益申佈：筆者持有建設銀行(0939)及其衍生工具。)

近日大市的一些技術形態

講一些技術方面既野：

恆指早前呈「參差見頂」，其後出現較大跌市。然後上週整體大市，卻呈「參差見底」，今週咁橋又見升勢。(「參差見頂」，整體指數經一輪升勢，但部份成份股卻跟不上，反而跌，或整體指數不斷創新高，但主要成份股卻沒有創新高。「參差見底」，整體指數大升，但部份股份卻未見跟隨，反而升。) 近期中移動炒得超高，但到最近3G熱卻唱反調回落，重黎埋股東減持消息；匯控落後多時，升唔夠不突止，最近頻出壞消息。兩位大哥佔恆指45.72%，卻經常玩唱反調，故大市於穩步上揚中卻出現近日古靈精怪狀況 (見下圖最右邊圈著的部份，比較這半年圖表所形成之走勢，顯而易見，這個區域特別"污哩單刀"。這種情況出現於個股唔奇，出現係恆指就...)。

10天線現緊貼20天線，跌穿既話，為「死亡交差」，利淡也。(「黃金交差」即20天線升穿10天線，「死亡交差」即10天線跌穿20天線。)

另外借機會一提「島形底」，利好形態也。先由一個下跌裂口，然後一個差不多水平既上升裂口所造成。最好係由消耗性裂口造成下跌裂口，及由突破性裂口造成上升裂口 (左消耗、右突破)，這樣認受性會更強。尤其用於下跌勢中，作為轉勢訊號更為可靠。

(圖解：見「險」處乃「死亡交差」差點成形的階段。「好險」處，乃十天線跌穿二十天線後，即向上升，緊追二十天線，故「死亡交差」形態未成立。圖中亦見多處出現島現底的地方，尤其以6月中出現的島形底，乃5月初由17,400點水平插水至15,300點水平之轉勢位。之所以筆者常強調圖表分析的價值，不容給一些人三言兩語說得一文不值。)

國企股指數於十一月尾出現島形底，向上感該乃有支持。

日後再回顧這些技術形態是否乎合其指導性。希望大家得益。該比起看書更受用吧！

建行「重係」依然靚仔？！

好個建行，為大家製造了一個很有價值既實戰例子。今日建行終告跌破上一個升勢，重打回原形。筆者起初提及睇好建行時，都提及三個支持位，叫持有建行既忍一忍(參考前文第二段)。亦於該文章提及筆者本身預期要先補一補3.88至3.95既裂口後先再重拾升勢。可惜樹大招風，但凡股票招搖得濟，都係麻煩。結果再黎三個「樣衰」白兵，而唔能夠o係第一次三白兵後進入穩定上升(或牛皮)期。結果走勢走晒樣。按裂口理論，今番回落 (以跌破升軌為確認)，要試補裂口。一切重頭黎過。

筆者一D都唔擔心，可以咁老定，係因為：

第一，$3.88至$3.95裂口位係好強既支持，裂得靚，成交大。第一個裂口更加強，筆者好難想像短期內建行可以穿$3.78水平。坊間教人定止賺位，利用%比率來定。嚴格守這種止賺位既人會一定錯過好多機會。黎個係費事同投資經驗淺既講咁多既一個粗略投資策略，止賺其實並唔係咁定。大家應該聽過，傳媒一邊講「投資要定止賺位」，一邊又講「投資止蝕唔止賺」，聽落好矛盾。其實係因為止賺，唔應該用%比率去定一個位黎，然後當股價一穿果個位就沽出；而係應該出於確認升勢完結時先沽出股票。但係要確認升勢完絕對結唔容易，所以就用%比率黎定個所謂止賺位，然後叫觀眾或聽眾守住了事。冇法子啦，唔通逐個幫你研究咩。

第二，筆者一早於低位購入建行，而窩輪亦於$3.5水平搏入。低位入貨，訓得安落。所以筆者忍唔住回應左一篇有關Buy at bottom同buy on the rise既文章 (見「理論歸理論、實戰還實戰」一文)。

第三，筆者都預左佢試$3.88裂口，個果裂口唔補唔舒服架。建行都未穿心理關口$4.00，依家講都重早左D啦。加上RSI已離開超買區，睇下尋底尋到邊先再講。

自筆者提及建行，建行既圖表走勢甚巨參考價值，印證圖表正正係記載著大戶散戶既活動。所以話能夠參透圖表所提供既訊息，唔係睇書就得，係要睇多D實例，定下自己既理論，加以引證同印證。
出現三個「樣衰」白兵，真係冇好結果 (參考「三個白兵」一文中，中興通訊之例子)。又，保歷加通道突然不正常擴大，代表升勢即將結束，圖中所見乃保歷加通道不正常擴大 (藍線)。不過，筆者對建行看得遠一些，冇諗咁多，亦做唔出高位沽出之後又低位撈貨咁頻繁且高危動作。

大戶正式行動前都要一段準備期 (見圖)。如今散戶顛完一輪，可以再次進入準備期。之所以筆者一直期望有「穩步上升期」，不過筆者似乎有D低估散戶既瘋顛度。如今，筆者相信已一切差不多就緒，睇黎今週穿一穿$4.00既機會都好大。

有D人想筆者畫公仔畫出腸，好，今次我講：「咁即係話，今週實為入貨良機，至於閣下都係觀望下，定係會有所行動，當然筆者唔會負責，筆者唔係股神。不過，由這刻開始o係閣下心中所起既變化，就肯定係閣下認識自己既良機。」

(利益申佈：筆者持有建設銀行(0939)及其衍生工具。)

好友出動，淡友惡夢 (舊title：咁好彩？又講中？)

賺錢開心，自己既睇法同心得得以印證，就更加係錦上添花。

此網誌未開之前，筆者十月始已多番同朋友講，睇黎咩十月大跌市、工行抽水、工行上板資金離港，全部都係流既。十一月又講足成個月回調，某電視台，某雜誌，個個輪流出黎同大家講回喇，回喇。某電視台重攪笑，之前由朝早開市前，係咩現場話回調，開市冇耐又話回調，中午番黎又回調，中午清閒節目既一個財經環節又講，收市o係咩現場又講，新聞又講小小，夜晚今日XX又講，放假XX透視又講。 結果大家都有眼見，多數唔兌現，就算回都係回條毛。

筆者冇馬後炮，相信近期捧場既朋友都可以做證。見「恆指跌228點，但對大市維持看好」一文講得清清楚楚，其中提到：「...今日回落o係淡友搵到藉口，翻身減少虧損，好友則暫時放人，因為離期指結算尚有日子，未係殺淡友既時候，甚至係好友想去到盡既前奏...」。筆者亦多次批評過果o的同人唱資金流走既人。結果由噙日開始兌現，筆者亦有提過：「匯控落到145都冇支持？地產股o係弱勢？」，今日個市都答左大家。

恆指期貨，好友淡友血戰之地，大賭場既VIP房。睇唔通好友同淡友既行為同心態，唔好出黎測量大市走勢。坊間有一眾投資分析員，睇住o的恆指走勢線做背書一樣既分析，好難會準。

好易咋，其實，小朋友教下都識。當恆指跌穿條十天平均線，就講受壓，越穿得多，就畀多兩錢肉緊，而且見尾三個枝陰燭，俗稱「倒槌」，利淡形態，可以再講得落力o的。然後同大家講：「預測短期支持位係邊度邊度」，其實個短期支持位就係二十天線，之所以大家先兩日聽某o的講股佬會咁講：「大市需要回調，要去到18600點左右先有支持。」唉，真係咁易畀你睇到，大戶重使開飯。
唔係話圖表冇料到，而係果o的人冇料到。當大家好叻咁睇十天線，十天線就成為大戶玩野既手段。參考最近銀河娛樂(27)，見左圖。係十月尾，唔止穿十天線你睇，重穿埋條二十天線，問你怕未！之後既發展，大家有目共睹。係果o的位，大戶有好幾日入貨。又一次睇到明明股市係獲利甚豐既地方，但係偏偏唔係咁多人搵到大錢。其實係7.00位有裂口支持，如果唔係亂買股票，應該明白果個位係有機會試一試，一穿二十天線就嚇走，睇圖未睇得透或者睇圖比較單純。當然都有人嚇到唔識郁，然後又好好彩咁過到骨。所以筆者另一個圖表心得係，睇一兩樣野唔夠架，圖表分析，要理由多多先得。有關圖表分析，黎o的都重係冰山一角，今次講住咁多先。

噙日恆指回順，期指低水減縮，某講股佬居然話之前果日期指低水係反映匯豐派息。有冇攪錯！如果係咁，就唔使曾經低水成90點子。恆指低水左好耐，因為淡友唔信邪。星期一更加係好友放人，順便做陷井，引多o的淡友落答，而低水買入既期指，之後炒番高水，有撈多筆。淡友唔爭取o係星期一轉身，後悔莫及。今日恆指巳經由低水變高水。

筆者一路話住大市向好，唔係是旦講。因為筆者認為好友唔會咁順攤o係今個月唔挾死淡友，咁好既機會，依家唔挾，等幾時？好友手上太多王牌：落後既地產股、落後既長和系、衰到盡左既匯控。淡友呢？中移動之前畀佢地郁得太多、其他果o的唔夠大份、地產同長和系都唔使諗、美國又冇壞消息、日本當冇到、之前見佢地搏命切公用股，點知都返番晒黎，睇唔見佢地有咩文章可以做喎。最叻就係大叫「回調有理」。回唔到架大佬，筆者講到口水乾，資金強勁喇。淡友做淡，要將正貨減價推畀人，人地要埋你o的平貨，再炒番上黎，期指連貨兩樣都賺盡你，你話我知淡友點翻身呢？筆者真係唔明，講出黎大家都明，點解o的講股佬唔講，點解重有人走去做淡個市呢？

至於幾時好友先挾完淡友呢？只能夠講係期指結算左近啦。筆者既經驗係好友唔係一定等到結算日先收手，佢地收手係冇路捉架，以前o的人持恆指call輪到結算日結果結算日恆指重倒跌，鬼等埋你咩。期指幾時都可以平倉，坊間有好多講股佬都用埋結算日做測市，唔準架。多數情形係升勢強到不得了先殺到尾，但係都唔可以作準。

另外重有個現象要講，今個月好友係靜靜地托穩個市，如果太早出動，個市月中升到19500點，咁就畀機會淡友唱回調，調過頭，所以人地好友食大茶飯，都好有耐性，慢慢煲。大家睇埋最後發展再探討喇。

重有好多好多野可以講，講唔完。希望大家明白多o的點解筆者成日話o的講股佬冇料到，o的金融從業員係讀死書。唔係筆者自我膨脹，而係有根有據、有板有眼架。

三個白兵

好多人都唔信圖，筆者都好明白點解會有咁既情況。

圖表確確實實在反映市場活動，因為市場活動就係形成圖表既元素，圖表就是把市場活動abstract起來成為model方便研究，係市場既縮影、投資心態既投射。所以即使唔多信圖，都總唔能夠將佢講成一文不值。好多人覺得圖表唔可靠，主要係因為圖表分析唔容易，唔係隨便睇幾本書就掌握到，要認識得好深、好廣、同埋有好多實習先得，重要加埋不斷更新而變化先至做到贏家。師奶都進化過幾次啦，以RSI為例：

由唔識RSI ->
識講超買超賣 ->
識講RSI係咩區域就點點點 ->
超買可以再超買，超賣可以再超賣

師奶都識到黎個地步，重o係原地踏步就唔得架喇。今時今日起碼要知咩係RSI背馳先得架。

有關圖表分析日後有機會慢慢講 (要知反應係點先得麻。^_^!)。

見近期建行 (939) 出現左三個白兵，不妨講兩句啦。好多書本都只限話你知「三個白兵」係利好訊號。不過筆者發現通常三個白兵出現，都有回套，然後爭持一段時間，或者步入穩步上揚階段，先再蓄勢再升。參考近期升勢一度凌既中興通訊 (763)。見下圖：

點擊放大

其中見紅字區域，「假象」，情況比較特別：三個白兵之後重有第四、第五個，然後回起上黎唔係講笑，直情係回過龍。但係事出有跡可尋：

• 除「假象」所見既三白兵，其他三白兵出現時既成交量皆見明顯見突破。但「假象」所現之升勢，為獲利者先抽高後回套之現象。
• 此外有些人對三個白兵有更高既要求，可能都有o的啟示。有人要求三枝陽燭都特別長先算係利好。好明顯「假象」果三枝都唔合格。有人更要求三枝陽燭要一枝長過一枝先確認為「三個白兵」。黎個場面較為少見，就算近期四叔連環入煤氣都唔見有，有人見到記得單聲。
• 此外指導性較弱既係三個「假」白兵既上影線同實體差唔多長，唔夠靚。
  

至於建行既三白兵，中間果枝差些少啦。不過整體有其獨有特色：

一、三枝陽燭之間皆有裂口。
二、成交量除了見突破，重一個多過另一個。
三、三枝陽燭既上影線 (又稱手部) 都係短。

筆者皆視其為利好形態。不過關於燭間既裂口存在有兩種對立既睇法，一個講法係形成左強烈支持位，另一個講法係形成強烈回調補裂口既壓力。不過兩個講法都係對後市看好，只不過後者認為先有快速回調補其裂口後才重拾其升勢。點講都好，總之係好。觀察黎幾日建行既表現都似係步入穩步上升階段。