2006年12月29日星期五
「精制失修」既「官曹亂估」
寸盡「圖表派」既笑話
一個寸盡「圖表派」既笑話:一個圖表,三個人分析,四個結論。
三個人分析,有三個結論,第四個結論係實際結果,即係寸話三個唔同既分析都唔中。寸係寸左D,不過個笑話幾有智慧,亦都反映左部份既事實。圖表冇錯,分析既人會錯。圖表唔會講大話,大戶呢,經紀呢,你信邊個多D?所以筆者不斷強調,圖表分析唔易掌握。坊間,信圖者信錯,不信圖者亦錯。
「精制失修」既「官曹亂估」
筆者見最近財經雜誌「精制失修」,增「官曹亂估」一欄,極不願置評,都忍唔住,評左喇。多多得罪,請原諒在下的見識少,唔明佢地點解會搵D咁既野黎講。不過大家可以好似觀察筆者既分析一樣,睇下佢地所提及既股份今週既走勢,參考參考。
評亂今週「官曹亂估」(23 Dec - 29 Dec 2006)
招金所呈既唔係「雙飛烏鴉」,括都括錯 (括住兩枝陽燭,點會係呢?聰明既讀者都諗到:「烏,黑也」),筆者猜佢係想括最後果三枝。就算係咁,都錯,黎個頂多似係「雙鴉」,唔同「雙飛烏鴉」。就算修正番做「雙鴉」,都錯!根本就唔成立,既唔係「雙鴉」亦唔係「雙飛烏鴉」。「雙飛烏鴉」,之所以「飛」,指既係裂口升,裂口升既陰燭,連續兩枝,「雙飛烏鴉」也。「雙鴉」,一枝大陽燭,然後「飛」第一隻烏鴉,第二隻烏鴉回補裂口,深入第一枝陽燭之實體。「雙飛烏鴉」與「雙鴉」,冇錯,係利淡訊號。
恆地之前出現「島形頂」,以家下市況,冇謂為左粒毒蘑菰而放棄成個森林掛。就算係咩市況都好,都冇理由42.6支持位搏入抵押間廠,然後係44.4阻力位沽出賺粒糖,讀者都係小股民居多,唔好玩啦。
新濠,的確有機會反彈,但係「穿保歷加通道底部」理由唔充份!大跌既股票,可以貼住保歷加通道底部咁一齊跌。
港交所,超買之後大可以再超買,背馳之後可以再背馳,尤其係大升市中。
筆者認真睇唔過眼,日後再同大家講多D圖表分析既準則。黎編已經夠晒反思喇。
大市升勢,本網誌捧場者預左啦...掛...
大市如筆者上月推測咁發展,不過升勢之急卻冇意想過 (筆者本來話升勢要殺上20,300點,但於12月內完成唔到,見文。今日係最後交易日,雖然都有機會講中 (指12月內去唔到20,300),不過真係冇諗過可以於12月內企係20,000點樓上,重多一點咁頂癮)。如今筆者預言已應驗左八成,只剩餘最後一部份,就係「到時要殺到落一月」。本文該於上星期五寫成,但係只係做好左o的圖,就放假去也,點知放完返黎又,唉... 冇緊要,好多野筆者一早都不斷同大家跟開 (如MACD線一路既發展),其實冇乜surprise。今週升勢其實先兆早已於圖表呈啟示。下圖為上星期五 (2006年12月22日) 為止之恆指走勢圖。

筆者於恆指展開升勢前,已不斷提及MACD的指標。MACD(12,26)為一些專家建議分析港股的參數,筆者認為反應較慢。筆者還是喜歡使用MACD(8,17)來捕足升勢。如於上星期五觀察MACD指標,可見MACD(8,17)已明顯升越EMA(9) (所謂訊號線),而且可以確認為「非糾纏」形態 (筆者於12月14日提及要觀察是否只屬糾纏,見文)。反應較慢既MACD(12,26)亦升穿EMA(9)。
上圖中,筆者特別以橙色及籃色線指出一處該注意既地方。MACD線升穿訊號線於0.00以下為跌勢中出現之反彈,有機會反身。MACD線要於0.00以上升穿訊號線才可以正式確認為大市向好。
2006年12月20日星期三
Ho ho ho。泰國沒收淡友玩具
筆者昨日提過地產股冇係賣地績前炒上,反而正路。今見健健康康。黎種模式其實重演過好多次。明知賣地績前好卻先跌,績後回升。好似上次咁績前大升,績後反而出現反高潮。最近兩次賣地前筆者都有同大家簡單提及過,畀大家作為參考。
諗起昨日某些人既言論,咩「中國有機會以泰國為借鏡」,今日泰國既表現,你話有咩藉得借鏡呢?中國一直已經有外匯管制,人民幣升值一直處理得非常到家,只見美國冇耐性,急住叫中國加快步伐。中國今非昔比,我國官員同美國財長門平起平坐,美國財長會談後,始終冇符,已且公開聲明確認「中國並沒有操控人民幣」。牛仔總統唯有做多D小動作,考慮向印度提供核技術。筆者唔明點解D評論人士將泰國一事講都咁嚴重 (好朋友告知今朝各大報章評論都係好concern咁),希望佢地係心懷不軌,否則真係冇乜料到。
建行今日創新高,今日「大魔」尾市出現買盤較多 (嗯,尾市高位入貨,遲下拎黎拋定喇)。
有人借泰國外匯管制措施制做恐慌
筆者今日聽到有機構投資專業人員藉傳播媒界向大家發其「偉論」。該專業人員說:「擔心中國會以泰國今次行動為借鏡,以嚴勵手法遏抑外資對人民幣的炒作活動,因近期人民幣同樣都升值得常當之多咁講。所以資金會避風頭,認為大市將會向下跌。」
此話實在混帳之極!大家千期唔好聽黎D人講野。唔知佢本人借題發揮,定係佢自己分析能力低受人唆擺。中國一直以成熟既手段阻止外資炒人民幣升值,而且一直取得成效。泰國股市值幾錢,D泰銖有幾值錢,同中國股市,人民幣值點比較,筆者唔使多講。中國經濟、政治地位係處於咩環境先?中國就算真係要打壓外資炒作,使唔使跟泰國、參考泰國既做法呀?佢知唔知自己講緊乜野架?
明明依家就係泰國堅守,堅決唔會讓歷史重演,對亞洲金融市場既穩定係件好事。雖然會趕走外資,但係外資暫時離開既係泰國,唔係亞洲喎。咁你話D資金會四散去邊先?咁咪重好,即係話如今亞洲資金充裕既地方就正正係有番實力既地方。健健康康,唔會做成泡沫。假設菲律賓、印尼真係會跟,咁同泰國咁做一樣,屬利好因素。家下有人發揮唔夠,想將個「既念」無限擴展?
筆者覺得該評論人員咁講野唔係戇居就係想制造恐慌。不過筆者總唔信大戶會中計,幫手拋下貨就會;散戶又冇乜幾多人,做唔低個市既,慳番啖口水啦。
2006年12月19日星期二
泰七招
泰七招
泰國央行要求金融機構今日起逢新造外幣存款交易額高於二萬美元者,扣起三成,持有有關款項的外國投資者,一年內若要求提取,須繳付三分之一金額作為罰款,藉此遏抑熱錢炒高泰銖。坊間現稱泰國措施為「泰七招」。筆者話應該叫「泰7+招」,冇話泰國遏抑泰銖炒風措施推行已告一段落。
當年金融風暴
97亞洲金融風暴,始於1997年7月泰銖失守,菲律賓棄守,8月印尼盾大瀉,10月開始影響到本港,11月南韓投降,98年4月日本經濟泡沫爆破。事件終結於美國插手救日本、本港「任三招」推出。
今時今日
今時今日亞洲各國,如南韓、新加坡、係咩環境先?經歷過97金融風暴既洗禮,亞洲各國既經濟體系都改革唔少,冇果陣咁跪弱。日本同香港股票及樓市均未見泡沫。會有幾大件事呢?
大市去向
不過筆者成日都話冇得同個市拗。咁好理由,淡友重唔乘機,等幾時?好友都會放下線。臨近聖誕,咁既市勢,好多人計數走人,睇好都等返黎先再算。策略方面,睇閣下所持既係咩貨,持「正當」股唔好亂走,炒緊恆指相關既產品,執生喇。
今日重多左個賣地既理由,地產股做淡。大家都知賣地成績會係點,今次地產股冇係績前炒上,其實反而屬正路。
其實熱錢唔入泰國,甚至要走人,香港係最好既資金避難所。
筆者認為眼前跌勢暫時係藉口多多。睇埋下午市會點發展。
談玖龍紙業
(一) 事發經過
11月23日,玖龍紙業於$14水平有回套壓力,於11月28、29日於$13水平有支持,回升.$13.78。11月30日再戰$14水平。就係黎個時候...
瑞信於12月1日公告給予玖龍紙業<2689.hk>評級「跑輸大市」(即「減持」),目標價$11.15。理由主要有兩個:
一、該股過去九個月累升324%,估值昂貴。
二、現價尚未反映供應急增風險。
玖龍紙業於當日回軟至$13.42。瑞信再出黎講野...
瑞信於12月4日公告將理文造紙<2314.hk>評級調低至「中性」。理由係:
三、兩大包裝紙龍頭將於07-08年計劃合共把年產能分別增加301萬噸及247萬噸,估計內地包 裝紙巿場將無法在2年內消化共年產550萬噸額外產能,屆時會導致包裝紙巿場出現供過於求局面。
玖龍紙業再展跌勢,上星期五 (12月15日) 單日急跌,由開市$12.88直插至$12.04收市。
(二) 分析瑞信言論
(二.一) 實質產量
按玖龍紙業集團 (2006年6月30日) 公佈07年詳能增幅為62.1%,即由330噸增至535噸。增加205萬噸,瑞信同大家玩數字遊戲,預計埋玖紙08年產能達727噸,先得出07及08年產能達301萬噸。
按理文造紙行政總裁李文俊 (2006年11月21日) 表示計劃未來18個月將包裝紙產能提升至380萬噸,即增加215萬噸。瑞信計既係07及08年,即係話佢估計理文造紙在6個月內再增64萬噸產能。
瑞信假設兩集團皆於08年再進一步提升產能,黎個假設成唔成立呢?過左07年,如果真係求過於供,兩集團係唔係都會再進一步增產而加劇供過於求既狀況呢?
(二.二) 實質供求
預計中國從05年至09年對包裝紙需求每年增長率達9.2%。而據瑞銀所指,全球包裝紙供求環境理想,全球包裝紙價格穩步上揚,自7月至10月期間,牛卡價格上升4.3%,瓦楞芯紙價格更上升13.2%。
中央鼓吹環保的政策, 令內地部分規模較小的造紙廠相繼倒閉或停止生產。90年代,中國紙及紙板企業6500戶。2005年只淨3600戶。相信06年會更少。花旗預期玖龍及理文於09年合計市佔率將達到30%。
(二.三) 實質前境
邊個話D包裝紙做出黎只准供應國內呢?據玖龍紙業集團主席表示,會尋求增加出口,藉以開拓選定的國際市場。筆者所知,埃及對紙品從海外進口之需求極大,而我國亦與埃及發展這方面的緊密合作,其中印刷品已達成拹議。據「中國造紙拹會」預計,今年包裝紙代表,箱板,其出口量亦增長了2.7培。
2004年全國紙消費量5439萬噸,2005年全國紙消費量5930萬噸。每年起碼有7%增長。冇人話個玖龍紙業永遠都只係造包裝紙。
(二.四) 結論
回應瑞信理由一:九個月升幅係勁左D,不過行業前境非常理想,而集團技術提升,產能又增加。貴得有理,30倍市盈率係可以接受。
回應瑞信理由二:咁講,現價都未反映筆者剛才提到既出口、新紙品發展啦。
回應瑞信理由三:數字未必係佢講咁多,可以重多D又得,咁要睇到時市況。依家只能睇07年既產能提升420萬噸 (而唔係佢所講既550萬噸) ,亦唔一定係要由內地食晒既。有420萬噸多左,其實亦由於有更多工廠倒閉,又會有約干噸少左。總之等埋06年有關紙業既佈告出左,先可以再下定論。筆者認為係樂觀既。
(三)走勢分析
筆者點樣有道理都好,冇得同市場拗。如果群眾係跟瑞信齊齊悲觀,股價就會跌,硬頸都冇用。股價表現脫離基本因素,唯有參考圖表睇下有咩啟示。

今 次所展開既跌勢,起碼要回補上個裂口。上星期五已完成。今日承接前收市價$12.04開市,回升,收$12.62。上星期五急跌時成交量達2千3百多萬, 今日回升時成交都有2千萬。重圖表睇,今日造左一個平底 (跟倒轉搥鎚頭),為轉勢訊號。平底出現於長期跌勢更有認受性,出現於玖紙既係短期跌勢,只可作轉勢看,未能作為再次進入長期升勢看。短期再睇其他指標會 否轉強,例如擺脫上星期四所形成之「死亡交差」而再次出現「黃金交差」、MACD回升訊號線、%K線重上%D線、或DMI+再次與DMI-分道揚標而 DMI+升穿ADX等 (夠喇,日後有機會再探討。)
10月10日花旗話短期存在配股風險。期後有人搧風點火,講到好實咁話玖紙配股集資約干億,由某某大行負責該項配股。引發女首富出來怒吼:「集團有充足資金,我要那些錢來幹嗎?」。玖紙再展升勢。今番「供過於求」既疑雲可以攪幾耐呢?
(利益申佈:筆者持有玖龍紙業(2689)之股份。)
2006年12月17日星期日
大市走勢

(有關筆者之前所作既預測,請參考港交所搞搞陣,淡友走運。大市形勢需重新評估、跌莫悲、升莫喜「續」。)
今期「每週財經動向」既快活林提到一個睇法可以參考下,佢大意係話:「大戶想轉身,故下試承接力,但係個市一沽即散,唯有收手,死死地氣托番個市到更高位先再沽過。」
筆者一直都話「散戶一日唔動容,一日個市都重有得玩」(參考還有兩個大市分析之重要元素 與 近日市況、好友出動、淡友惡夢)。散戶一直畏高,先一排對中資銀行股發癲,近日就落晒去玩新股。個市高位唔夠散戶接貨,低位一嚇就散水。又如筆者提過「試50天線」好吸引大戶,但係50天線係重要心理關口,有機會震過龍 (參考該文章)。黎一切睇法都好配合快活林既講法。多口講多句,大戶除左可以好似「快」所講,炒番高大市先再沽,其實眼下班散戶玩得最開心既地方應該都好吸引佢地喎。
唔講大戶陰謀,講番大市。筆者之前提及過參差見頂、參差見底 (見近日大市的一些技術形態),亦可以為最近市況作解釋。大市一開始升勢,最先偷步既係中移動,期後匯控加入,但長和系及地產股一直落後。然後中移動最先調整,期後匯控加入,但地產股慢慢發力,長和系亦追上,所以疲弱既中移動、匯控未令大市大跌。參差不齊既情況不能永遠持續,偷步上既要落番黎,落後既要追番上黎,大家要排好係一線,先再黎過。黎個亦反影左大市自十月至今所見既現象。
2006年12月14日星期四
大市走勢
恆指10天線依然係20天線底下。50天線繼續攀升,現處於18,599。昨日恆指一度接近50天線,有驚無險。如筆者講左兩星期,跌莫悲、升莫喜,恆指呈長方形走勢橫行左頭半個月。而且上唔過19,200,下唔過50天線,至今一直應驗。若超出該兩個範圍,就會出現升勢或跌勢,所以至今未見明顯走勢。筆者亦於上月預測今月接近後期才出現升浪 (即係話,若突破此長方形牛度格局,將會係向上突破),希望黎部份都應驗埋就皆大歡喜喇。

國企指數靚仔得多,筆者不厭其煩咁提住島形底、島形底。國企五條平均線整整齊齊,順序排列。昨日急跌,但島形底守得非常靚,所以出現一枝「錘頭」。

總括,國企指數非常靚仔,今日國內滬深A股指數創新高。相對恆指依然處於筆者所講既「跌莫悲、升莫喜」格局。筆者提過期指大戶有機會嘗試制造恐慌,試穿50天線。不過大多數投資機構皆認為穿50天線就代表要中期調整,唔知係唔係因為咁,期指大戶都唔敢玩到咁大呢?但係隨住條50天線一路攀升,期指大戶會係高D位試下條50天線都唔奇,不過暫時筆者未見會咁做住,唔使驚。
2006年12月13日星期三
陰陽燭圖簡介 (給初學者) 及 即時應用:建滔積層板

建滔積層板(1888)上板短短四日,無走勢線分析之可能,更不足日數以作計算MACD、Slow STC、DMI、RSI等指數。但係陰陽燭圖卻對賣買去向有所啟示,雖然四日新股,難以作推測,都即管試下、玩下,做下實例都唔錯:

上圖所見,已反影高位暫時推盡,由招股價至現價已見鑊利,散戶回套再抽新股唔奇。
「射擊之星」出現於上升趨勢,實體極短,陰陽不拘,上影線長,無下影線 (或甚短之下影線,故筆者稱上圖第三枝燭為「近似射擊之星」)。出現「射擊之星」,反影上升持久力弱,後市將見頂回落。結果第二日已出現回落,且形成下一個唔靚仔形態!
「黃昏之星」出現於上升趨勢,以三枝燭成立,結構較複雜,此不作詳細解,總之類似上圖之形態,第二枝唔一定要係「射擊之星」,只要實體短便成立。加上以下加強形態之因素,淡上加淡:
- 「黃昏之星」第一枝 (12/08)同第二枝 (12/11)實體之間有裂口。
- 「黃昏之星」第三枝 (12/12)之收市價深入第一枝 (12/08)既實體區間。
2006年12月12日星期二
悶市Highlight
國企指數有島形底,走勢果然唔同D,今日升。
中移動(941)回穩,但從圖表觀察,未見樂觀,險境未脫。當市況無乜明顯方向,基本因素未能有所指導,圖表分析大派用場。筆者並冇持有中移動,見得閒,幫大家分析下:


從陰陽燭圖睇,下降通道頂部出現兩個「十字星」(紅圈處),顯示兩次短暫上升勢中,皆出現見頂訊號。以b比a緩和。於下降通道底部,則出現三個「十字星」(1勉強算是吧),顯示三次短暫下降勢中,皆出現見底訊號,而且一次比一次強烈,即回升力度越來越強。以第一幅圖中出現既長期上升軌有支持,加上短暫跌勢有減緩兆頭,睇埋黎兩日可唔可以突破下跌軌。情況有機會轉好。
匯控150天線有支持。$140既匯控,息率達4.5%,都幾吸引投資者;長線持有,唔理得咁多;12月11日中國銀行開放給外資銀行,內地方面既好消息將會慢慢會蓋過美國方面既壞消息。技術方面,則同樣係險境未脫。
筆者於11月14日始評論過五隻中資銀行股 (見還有兩個大市分析之重要元素 與 近日市況),亦於11月20日再作稍深入既分析 (見恆指跌228點,但對大市維持看好)。今日以當時兩編文章發放日及今日之收市價回顧一下:
11月14日 11月20日 12月12日 自11月20日 自11月14日筆者睇好建行同工行,不過兩者間,選擇力捧建行,好明顯啦。唔多鐘意交行同招行,因為佢地細隻,較波動。中行最唔推,因為人民幣升值影響其盈利。觀乎依家各行之走勢,筆者想:對各位捧場既朋友,都總算有個交代掛。
收市價 收市價 收市價 錄得升/跌幅 錄得升幅
建 3.89 4.09 4.21 + 2.93% + 8.23%
工 3.87 4.01 4.15 + 3.49% + 7.24%
交 7.05 7.22 7.11 - 1.52% + 0.85%
招 14.7 15.96 15.06 - 5.63% + 2.45%
中 3.56 3.82 3.78 - 1.05% + 6.18%
(利益申佈:筆者持有建設銀行(0939)及其衍生工具,及匯豐控股(0005)。)
解讀美國數據
就業
上星期五美國出既就業數據其實唔係好,如一般人預測一樣,失業率上升、非農業新增職位亦升。但如筆者亦提及,美市升或趺,則視乎大戶門點樣「解讀」數據。(參考12月7日大市highlight一文)。
失業率升,新增職位亦升,即係話有好多人不惜辭職搵工,而勞工市場亦能夠滿足其需求。筆者了解到美國好些公司都渴求高級技術人員,而且找合資格人士填入空缺絕不容易。所以,好多人轉工,唔似亂吹,而這正反映美國經濟還是朝正面方向發展。
息口
經濟企穩,股市自然做好。不過經濟企穩,即係話聯儲局無須咁快減息,對樓市唔起刺激,但卻又減低美元頹勢,都會利好番個股市。對香港地產起唔到刺激作用,但美元暫離弱勢又有利港股 (不過,歐洲貨幣持續強勢,美元都係弱)。關係都算係複雜。
美國今日唔等聯儲局開會,大家都賭佢唔會加息、言詞溫和。美股星期一早段向好。
消費
雖然美國今年Black Friday(即Thanks Giving後一日)銷情唔理想,Wal-mart亦得來一個相當差的十一月。但筆者了解,美國有調查發現,有好多人都等到Christmas sales既last minuet先大舉掃貨。所以Black Friday銷情下滑唔係完全代表美國國民消費意欲下滑,只不過係美國國民都好精等到最佳時機先入貨。所以筆者認為十二月消費數據大有機會收回失地。
定單
波音既定單舉足輕重。上月為波音定單近期最少的月份,而之前定單數據理想亦是因為波音公司之業務十分理想所致。所以賣幾架飛機,天淵之別。中國對飛機既需求依然好大。
美國黎緊既市況好有機會持續理想。對港股有正面影響。如無意外,理應如此。
2006年12月11日星期一
回顧建行
筆者一直highlight埋「大魔」對建行既動作,來個回顧與跟進:
3月:降評級至「減持」,目標價$3.03。
6月:「減持」升至「與大市同步」,目標價$3.4。
8月:評級為「持有」,目標價$3.5。
11月20日:調高建行評級至「增持」,目標價調高至$4.62。
11月27、28日 :活躍沽盤。建行一度由$4.2下跌至$3.8。
12月4、5日:活躍買盤重現。
12月7日:活躍買賣盤皆現。
現在建行比上次冇咁招搖,實屬好事。最好所有散戶都去晒新股度,建行更樂得清靜。如今建行處於所謂三角形走勢。見下圖:

三角形呈對稱,即向上或向下突破之機會均等。若走勢急些少,朝藍線走上,兩三日後便匯聚,決定向上還是向下突破。若向下突破藍線,要看成交,亦不代表走勢向壞,只屬脫離較急之上升趨勢。若走勢放緩,朝綠線走,十多日才匯聚,決定向上還是向下突破。當然,向上還是向下突破未必要等到匯聚時。形態屬對稱三角形即好淡角力。但從基本因素睇,有點偏好方面,暫時可看為消耗沽壓,而向上力度受早前過份急升後急跌所影響。持貨者值得睇埋日後發展。若能突破此三角形格局,將展開另一升勢。
(利益申佈:筆者持有建設銀行(0939)及其衍生工具。)
2006年12月7日星期四
近日大市的一些技術形態
恆指早前呈「參差見頂」,其後出現較大跌市。然後上週整體大市,卻呈「參差見底」,今週咁橋又見升勢。(「參差見頂」,整體指數經一輪升勢,但部份成份股卻跟不上,反而跌,或整體指數不斷創新高,但主要成份股卻沒有創新高。「參差見底」,整體指數大升,但部份股份卻未見跟隨,反而升。) 近期中移動炒得超高,但到最近3G熱卻唱反調回落,重黎埋股東減持消息;匯控落後多時,升唔夠不突止,最近頻出壞消息。兩位大哥佔恆指45.72%,卻經常玩唱反調,故大市於穩步上揚中卻出現近日古靈精怪狀況 (見下圖最右邊圈著的部份,比較這半年圖表所形成之走勢,顯而易見,這個區域特別"污哩單刀"。這種情況出現於個股唔奇,出現係恆指就...)。
10天線現緊貼20天線,跌穿既話,為「死亡交差」,利淡也。(「黃金交差」即20天線升穿10天線,「死亡交差」即10天線跌穿20天線。)
另外借機會一提「島形底」,利好形態也。先由一個下跌裂口,然後一個差不多水平既上升裂口所造成。最好係由消耗性裂口造成下跌裂口,及由突破性裂口造成上升裂口 (左消耗、右突破),這樣認受性會更強。尤其用於下跌勢中,作為轉勢訊號更為可靠。

國企股指數於十一月尾出現島形底,向上感該乃有支持。

大市Highlight
星期三恆指超高水70多點,是市況前境甚為明朗所致?當然唔係,係部份好友短線狹淡友,離場觀望美國數據及議息結果,還有部份淡友乘高位做淡。當然,當中有不少睇錯近日市勢既人被活埋 !
筆者於星期日(12月3日)已表明,恆指上可試19,200,下可試穿50天線。如今50天線已上升至18,471點。但由於依家50天線離18,000點遠左,因跌穿50天線而反應過龍既機會大減。「升莫喜」首先完成,估計「跌莫悲」(即試50天線)隨之而黎既機會大。
筆者上個月已經預測十二月上半是牛皮市,且要試低位,是為震倉也好,計數也好。到目前為止,維持觀點不變。筆者亦維持星期日(12月3日)之預測,即恆指短期於19,200及50天線上落既睇法,在此區間,無任何方向可言。跟據筆者一直從散戶心態、大戶陰謀及資金流向等既大勢分析,維持牛市未完既睇法。跌莫悲、升莫喜,十二月上半期發生既野可以當睇唔到,持有正股者,若非近期麻木高追,根本唔使驚。
星期五美國公佈就業數據,多數唔好,失業多,新業都多 (利好利淡,要睇大戶「解讀」)。十二月十二日,聯儲局議息,市場人仕觀望。要到下週後期,大市先有更多方向。
中資金融股今週各奔前程,散戶喪炒熱情再見減退。受摩通、花旗唱好,建行稍為發過下癲,成交量唔算大。建、招、中、交今日皆跌,獨工行升,返回4.00水平。
2006年12月4日星期一
大師即係大師,「網哥」係得既!
佢個「網倉」話:Fujikon(0927)既1-year return係43.6%。睇下點先可以理想實現:


佢個「網倉」又話:Karrie (1050)既1-year return係 30.8%。又睇睇先:


一年一度高難度動作完成之後每股盈利$3.725-$2.825=$0.9,即係賺$0.9/$2.825X100%=31.86%。認真和味。
重有,重有,最利害果下莫過於佢既「網-Rules」:
第二條:"... All we are doing is exercising our right of free speech, ..."
第三條:"We don't normally comment on the stock we picked until the next Christmas ..."
都係第三條:"... In the meantime, you are on your own, ..."
勁!大師即係大師。都重有咁多信眾。好野,好野!
David Webb 的聖誕禮物 與 筆者的聖誕禮物
今年禮物
順龍控股(361),今日一開波已裂口大升,散戶想係稍低位入都難。10:10am已在$1.16水平。前收市價為$0.87。升33.33%, 最高報1.24, 升42.53%。半日成交量已達一千萬。前成交量只有56萬。
有關順龍
順龍控股(361),高爾夫球用品製造商,主要市場係美國。係高爾夫球用品大牌子既供應商。2005年度因美國大客破產,盈利曾大跌。2006年上半年,純利升24.97%。大家預期中國高爾夫球用品市場潛力可觀。
有關David Webb
大家都知「阿獨立股評人」David Webb為聯交所董事。而佢持有順龍控股6.02%股權,曾於06年9月21日以每股$0.78,增持順龍。
David Webb 05年12月5日供佈年度禮物為富士高實業(927)。該股第二個交易日(2005年12月5日)由前收市價$1.4暴升至$1.56。第二日最顛見$1.63。然後開始回軟,一直跌至2月尾,最低見番$1.46。然後才展開升勢,開心到2006年4月11日,最高見$2.175。跟住開始食蕉,食到今時今日,$1.74。最低潮出現於今年6月12日,見$1.6。好似都未算係好衰果隻,睇埋落去啦(隻股同下文)。(據本年1月有消息指David Webb持有富士高4.997%股權。)
David Webb 04年12月3日供佈年度禮物為嘉利國際(1050)。該股第二個交易日(2004年12月6日)由前收市價$2.55暴升至$3.2。期後一月初差不多回跌至之前暴升裂口($2.55),見$2.65(2005年1月12日),然後展開升勢,開心到2005年3月18日,最高見過$3.75。跟住就開始食蕉,食到今時今日,$2.4。最低潮剛出現於上個月,見$2.01(2006年11月6日)。
David Webb 03年12月3日供佈年度禮物為亞倫國際(684)。該股第二個交易日(2003年12月4日)由前收市價$1.27暴升至$1.59,期後兩日內最顛去過$1.78。2004年1月,都係打回原形,返回之前暴升裂口$1.42。後抽至1月22日$1.68。跟住就開始食蕉,食到今時今日,$1.03。最低潮則出現於今年六月同八月,低見$0.94。(據本年4月有消息指David Webb持有亞倫國際6%股權。)
David Webb睇中新確科技(1063)(該股並非他的「聖誕禮物」),今年4月,有消息披露佢既持股量係1942萬股。該股由一年多前高位$3.2跌到今時今日得$0.82。
結論
投資股票,亂咁聽人講(重係有份量既人講添)會出咩事,大家觀察到啦。肯做功課,make a big big difference,大家又見啦。
其實來來去去都係散戶心態,用番之前筆者既建行圖表分析,都可以見到,之前既暴升裂口都係會見番,所以錯過第一次機會,唔好高追呀,第二次機會多數會番黎(個key係:做成暴升既唔係大戶而係散戶)。睇番佢既推介,都見可以在一個月後有機會追番隻股番黎,唔使在佢剛推介完喪追既。唔係話隻股唔會升,但係一D都唔長遠,一次升勢就玩完。觀察左咁多,如果都係信佢而投資既話,咁依家都有晒策略啦。
如果睇阿Webb哥個Webb-site,佢個track record都係只講一年回報,所以佢既推介倉都好好成績咁。而今日點下隻順龍,就即刻變為非池中物,股價暴升。好多散戶睇資料睇D唔睇D。跟住玩既朋友,自己衡量下喇。
所謂股神、所謂消息、真正贏家輸家、人既心態,都刻劃左係黎件事上面,筆者唔講咁白啦,盡量將一些事實、數據呈現大家眼前,聰明既各位知我想講咩。
而黎個就係筆者畀大家既聖誕禮物。
2006年12月3日星期日
跌莫悲、升莫喜 「續」
恆指走勢
既然大家既目光都向恆指50天平均線望。而50天線又確實唔係離咁遠(差330點左右,而且50天線在上升中),筆者覺得恆指向下一試唔奇。如果好友勢要奪回十一月失地,更加有機會先挫低恆指,震一震倉,製造陷阱比淡友落答。繼星期二單日挫560點,試50天線一舉將會震得個市更切底。50天線乃重要心理關口,有機會震過龍,若然係既話要試穿18,000,見17,800點。
恆指若轉身起動,會再穿19,000水平,若然過19,200點,再挑戰新高19,400點,要一路殺上20,300點(不過應該係十二月內完成唔到)。(打漏補充:再挑戰新高19,400點,若挑戰成功,要殺上20,300點 。[updated: 2006年12月5日10:40am]。)
即恆指短期內向下可以見17,800點,向上可以見19,200點。維持於此區間則不能太早下定論。故曰:「跌莫悲,升莫喜」。
如今形勢
筆者覺得大戶開始心急。對於上週所作既大市預測,雖維持不變,但相信會進行得更急。大戶的確會一邊托市,殺熊證、淡友,一邊做定淡倉,係高位殺番落黎。但係筆者認為仍然有機會向上再做好,大戶理應唔會放過咁好既機會,在更高位做定淡倉先殺落黎。
美國股市星期五出現怪現象。仿彿有神秘之手力托美市,老友告知北美有傳是政府出手。雖不可能證實資料是否屬實,但係托市現象很明顯。依筆者看,由如美國數據參差,ISM輕微處於50%樓下,但美國今個月某些數據表現差,又或者說之前較好,主要因為波音公司。上個月波音飛機定單大大縮減,影響某些數據十分之大。且看黎緊「阿伯」訪中國時,中國會唔會又買下飛機。若然美國政府真的有出手,如今美市所呈弱勢只會係好短暫。美市維持得好,香港大市問題唔大。
資金出出入入,去下日本,去下韓國,不過都係留係亞洲。中國11日正式開放畀外資銀行,部份資金都會流走。
至於散戶方面,就更加唔使講已經畀個市況嚇親。散戶主力抽新股,同埋由買中資銀行正股移去炒相關窩輪,當然唔少得追入近日大熱既中石油既窩輪。唉!總之短視之極,不足為患。
2006年12月2日星期六
跌莫悲、升莫喜
美國燃油庫存量下跌,油價曾上升至$63美元以上一桶。中石油真係油價未行,佢先行。(見「港交所搞高陣,淡友走運。大市形勢需重新評估」末句)。
趁上週末,利用美元弱勢、Wal-mart Black Friday銷情下滑,唱淡經濟,星期一,道指跌158點,最低跌過200點。筆者星期二陰謀論估大戶是否掌握先機 (見「今日大市Highlight」一文末句)。結果當晚美國房屋銷售量八個月黎首次上升、阿伯講野模稜兩可 (即係講o岩野,因為美元處於模稜兩可既狀態:加息又死、減息又死)。GDP預測已由1.5提升至1.8,結果星期三開2.2。道指由低潮12,074回升至12,222點。又咁橋既!跟著ISM製造業指數略低於50%,顯示行業有可能趨向收縮。Wal-mart出現十年黎最差既十一月。星期五美市出現大跌幅,上午市中段曾跌96點,但12:00回升,重上12,200點水平,機乎完全收回失地。然後中午市又再試跌,甚至跌穿12,100點水平,然後3:00又回升至差不多12,200點水平,收12,194。實為離奇境象。過兩日再同大家討論。
筆者上週以先已估計本週大市(11月27日-12月1日)要抖一抖,而且亦預計十二月初期大市要回,恆持要穿支持位。結果果然發生,只不過波動性卻沒有料想過。至於大市急跌原因,星期二已為大家分析過。總括恆指今週跌570點。恆指成份股星期一作改動,星期五後市急跌,其中涉及換馬動作。下週去向難測,大家都望實條50天線做人,如今50天線處於18,363點。筆者暫時維持上週對十二月大市之預測 (見「港交所搞高陣,淡友走運。大市形勢需重新評估」)。回顧整件事,筆者更加相信,上星期四港交所「壞」好友大市,好友洩氣,未能殺到尾。淡友得勢,在美國數據未公佈及結算日在即加埋賣地反高潮同日發生,大舉反擊。好友最終放棄十一月,轉移陣地。
建行亦於筆者估計要補第二裂口,於第一裂口$3.78前穩守,回升至$4.00水平。唱好建行既「大魔」期後出現活躍買盤。由於之前炒得過急,建行波動性將會較大。
(利益申佈:筆者持有建設銀行(0939)及其衍生工具。)
2006年12月1日星期五
粉飾廚窗的確有,但係...
今年各大基金機構都o係港股錄得非常好既成績。標準普爾基金評鑑於十月公佈,股票基金組別入面,以香港股票基金表現最佳,平均回報率達8.15%。(其次係韓國股票基金同大中華股票基金,平均回報率分別係7.65%同5.54%。最把鬼係日本股票基金,錄得負回報率-2.78%)。
即係話基金公司去到第三季已經響港股做好晒功課。但係所謂基金公司要粉飾廚窗,的確要做,不過粉飾既係下年既廚窗。今年去到第三季已經做得咁好而明年佢地又冇睇得咁好,下年如果做得差過今年太遠,客人冇咁開心。但如果將今年一部份升幅撥去下一年,拉上補下既話呢...
所謂粉飾廚窗都有兩個方向做。投資要對短、中、長都抱有體會先能夠掌握市場行為同分析數據 (如減息都未必一定係好事)。
2006年11月28日星期二
今日大市Highlight
匯控推低恆指173點。中移動推低恆指80點。共同創造自911以來恆指最大單日跌幅。散戶打到散晒。
建行貴為恆指成份股,傷上加傷。唱好建行既「大魔」繼續幫手拋建行。已殺到落第一個裂口$3.78之前。
黎兩晚阿美國聯儲局「阿伯」講野,今次好可能有料到,且看大戶是否早已掌握先機。
2006年11月27日星期一
建行「重係」依然靚仔?!
筆者一D都唔擔心,可以咁老定,係因為:
第一,$3.88至$3.95裂口位係好強既支持,裂得靚,成交大。第一個裂口更加強,筆者好難想像短期內建行可以穿$3.78水平。坊間教人定止賺位,利用%比率來定。嚴格守這種止賺位既人會一定錯過好多機會。黎個係費事同投資經驗淺既講咁多既一個粗略投資策略,止賺其實並唔係咁定。大家應該聽過,傳媒一邊講「投資要定止賺位」,一邊又講「投資止蝕唔止賺」,聽落好矛盾。其實係因為止賺,唔應該用%比率去定一個位黎,然後當股價一穿果個位就沽出;而係應該出於確認升勢完結時先沽出股票。但係要確認升勢完絕對結唔容易,所以就用%比率黎定個所謂止賺位,然後叫觀眾或聽眾守住了事。冇法子啦,唔通逐個幫你研究咩。
第二,筆者一早於低位購入建行,而窩輪亦於$3.5水平搏入。低位入貨,訓得安落。所以筆者忍唔住回應左一篇有關Buy at bottom同buy on the rise既文章 (見「理論歸理論、實戰還實戰」一文)。
第三,筆者都預左佢試$3.88裂口,個果裂口唔補唔舒服架。建行都未穿心理關口$4.00,依家講都重早左D啦。加上RSI已離開超買區,睇下尋底尋到邊先再講。
自筆者提及建行,建行既圖表走勢甚巨參考價值,印證圖表正正係記載著大戶散戶既活動。所以話能夠參透圖表所提供既訊息,唔係睇書就得,係要睇多D實例,定下自己既理論,加以引證同印證。

大戶正式行動前都要一段準備期 (見圖)。如今散戶顛完一輪,可以再次進入準備期。之所以筆者一直期望有「穩步上升期」,不過筆者似乎有D低估散戶既瘋顛度。如今,筆者相信已一切差不多就緒,睇黎今週穿一穿$4.00既機會都好大。
有D人想筆者畫公仔畫出腸,好,今次我講:「咁即係話,今週實為入貨良機,至於閣下都係觀望下,定係會有所行動,當然筆者唔會負責,筆者唔係股神。不過,由這刻開始o係閣下心中所起既變化,就肯定係閣下認識自己既良機。」
(利益申佈:筆者持有建設銀行(0939)及其衍生工具。)
今日大市Highlight
今日轉倉活動不明顯,即淨餘好友唔走鬥到底。但如筆者前日所指,好友已洩氣,托高恆指唔易,如今好友以銷定恆指結算價為目標。睇下月期指成交,下月應該都有劇鬥。
上週襯美國休市,於美國公佈其感恩節銷情及其他數據前,大插美元。美元弱勢拖累港股。
地產股做好,增強賣地後反高潮
大家都料賣地價高,反影地產商看好樓市後市。但後市,後事也。賣地後唱地產商成本增加,地產股不升反跌。大戶入貨後,等好消息 (如美國減息,或唱可能性提高),才唱好,地產股才正式展開升勢。總之,想辦法唔畀散戶參予啦。
提早起哄不是好事
很多時候,大好消息未確定時,提早起哄,唔係好事。如反影地產股優勢係要靠真正樓市成交等,賣地只係憧境。又如近日中資銀行股炒上的一個藉口是恆生中國H股金融行業指數,今日乃其推出之大日子。但各大銀行股跌到一仆一碌。
大戶幫手質低中資金融股
今日乃恆生中國H股金融行業指數推出大日子,大戶卻借勢與一眾怕死已久既散戶一齊推低各大中資銀行股。如「大魔」一邊唱好建行,一邊o係今日見建行$4.1有支持既時候,尾市又大大手沽建行。實行迫建行嘗試回補之前裂口。大戶陰謀可見。
2006年11月26日星期日
建行依然靚仔
筆者原本推測建行要進入一段平穩上揚既階段,先再發力。但係星期三,o的人又炒過火,一下抽左上黎。正所謂「斷了線,飛得太高,跌得痛楚」。多得港交所出手,建行升勢健康得多。港交所星期四「兜巴星」,高追怕死、換馬抽新股既散戶走左一大堆,建行更見靚仔。既觀一星期,其實都係錄得升幅,不過散戶都嘈三嘈四,又係「少o的都唔得」既心態 (見上文)。

其他資訊
筆者見輪商於星期四五現買盤回收其下建行窩輪。 健康訊息也。星期四,港交所出手前,有涉資一億既大手買入 (唔知係好事定唔好事),成交價為$4.37。建行當日股價一度上沖至$4.42,然後3:00點鐘 (大家依家知咩事) 直滑$4.29。有人喊得出眼淚。未知所以者,心淡者,換馬者,畏高者星期五繼續黯然離場,成交縮減,$4.2見支持,之前出現一個小裂口。
(注:筆者繼續持有建行正股及窩輪。)
今日散戶動向
豐富對散戶心態的分析
點樣o係散戶心態分析上比一般坊間既人做多o的野呢?第一樣可以令到分析提升既係將股票從業人仕納入散戶之一,其實黎班人先係最重要。包括投資顧問、股評人、證券行紀經等,都納入為散戶。然後將散戶再分類為,冇膽識、有膽冇識、冇膽有識、有膽識。平民中存在住有膽有識既人,而從業人亦存在住冇膽冇識既人。每類型既人點諗都有唔同既代表性,混為一談,睇得唔夠透。最後,難度較高既,就係要清楚自己係咩類型既散戶。
散戶食開驚風散
近期既香港人自97金融風暴、......、沙士,長期受壓於壞消息,唔信眼前經濟會好起黎。自由行點講都係好事,但係有o的人就係鐘意講悲觀野,又話自由行帶比香港既只係短期刺激,大佬,以前係冇自由行,依家有一個人黎訓街,都賣多左幾個杯麵掛?香港人另一個心態就係「少o的都唔得」。黃金週少左人黎就多多事實,喂,每年黎港既旅游人數都增加既話,香港遲早有日o係假期陸沉。o的內地銀行股升升升,升少兩三日,就話:「喂,跌左喎!」。咩心態黎架!「少o的都唔得」!樓市黎講,業主賺得少唔肯賣,用家平得少唔肯買,06年中期都交投淡靜。
今日散戶
大細行既股票經紀,散戶依然畏高。港交所換程式,大家散得咁快,可以見到。散戶情願離開已經升左好多既股份,換馬抽新股,之前眼巴巴睇住大升而自己冇份既「損失」,誓要討回。此乃其中一個原因,星期四、五回套湧現。經紀繼續猛叫客走人。評股人仕態度審慎。港股上一個升浪自一月起由14800點上上落落至四月勁升 (當時其實勢頭重急過依家),五月初,達17328點,回落至17000關口,當時筆者尊重既股評人Master W.,及另一股評人「藍姐」都重好定。結果大市三個裂口跌到落16400點,未夠,之後再落到見15214點方休。當大市高峰期,最穩陣果個都話放心既時候 ,(例如「藍姐」係非常穩陣既人),你就真係要好驚惕。結果好多散戶都好放心,心諗調整下o者,跟住就出事喇。坊間聽到好多較積極既投資者、經紀早排都唱話:「散戶入市,牛市可能完」。大家依家應該都明白佢地睇漏左o的咩。兩個師奶搶股票機而大打出手,唔代表o的咩,最重要係果兩個師奶代表緊邊班人。
筆者於此欄重點唔係話大市會升定會跌,而係論到:用到依家散戶參予度為理由黎預測大市會跌既,就唔多o岩。最近散戶中,膽大者,買新股去;大談投資得意者,IPO投得之股票持至今日者:當人地問到:「咁你咪賺左好多?」,佢會答:「鬼咩,得果一兩手。」
(按:筆者提到兩位股評人,唔係彈佢地,佢地都係有料之人,只係大戶要做起野上黎,往往都出其不意,攻其無避。)
2006年11月25日星期六
港交所搞搞陣,淡友走運。大市形勢需重新評估
即係話筆者星期三冇睇錯,星期四好友的確繼續想狹死淡友。但當好友殺得性起,眼見恆指狹到19400水平, 港交所玩「啟動後備程式」,功虧一簣。重搞到個市單日急轉。如果唔係港交所,筆者相信恆指起碼殺到上19500先功成身退。家下知道真正原因,筆者星期四對好淡友形勢睇法要作修正。當然,對大市睇法冇變,而且當時既分析再一次體現能夠掌握大市、大戶陰謀、散戶心理狀況先能夠o係股海中定到位。
好淡新形勢
好友多得港交所唔少,氣勢都弱埋。星期四五轉倉活動都多。現時尚有十一萬張未平倉期指繼續鬥落去,賣地績前可能上多下,鬥到尾淡友反撲力應該都幾強。有利淡友形勢如下:
- 散戶經過週末都未必冷靜得晒,未見坊間有大幅報道港交所玩野引致跌市既事 (重點係引致跌市,如果大家有冇0係咩地方留意到既,同大家分享下)。
- 日元升值,加速以低息日元借貸炒市既資金離場。
- 美市暫現疲態。
- 淡友準備好,賣地成績唔好 (樓市前景唔好) 唱淡,成績好 (即係地產商來價貴) 都唱淡。
粗略估計一下遠o的既事。十二月應該先升後回,又或者即回;唔係廢話,重點係「回」!十二月期間會進一步落去試條十天線畀大家睇。好大機會會回試得深o的添,如果真係咁,跟住既大茶飯會黎得再凌勵o的。月中都係要牛皮下,大升勢o係後半月先再組織黎過,到時要殺到落一月,殺到20,000點水平。所謂如無意外啦,例如流感、港交所系統有異等,黎o的野計唔到。筆者覺得十二月有機會先升下,係因為有今月好友轉倉避突發事件同賣地等風頭等。大致上係咁啦,黎o的野都要貼市睇先可以進一步睇到確認。不過講黎講去,大調整,都係唔會發生住。
最後要提醒大家,所謂「十二月份係升市,因為基金公司會粉飾廚窗」,純屬搵笨,係個市升左先拎黎講既廢話。筆者話:「每個月份升跌市,都係大戶整色整水」就真。金價見大升,但係金股一早偷步行左,油股最近大升,你估油價跟住會點呢?
2006年11月23日星期四
今次考起,上了高難度的一課!

係,你冇眼花,筆者維持對大市看好。筆者今日貼市觀察,內心爭戰激烈之處絕不遜於今日好淡生死戰。經過冷靜深思左好耐,似乎諗通左。筆者於月前與朋友分享後市看法時都話,今個月係大戶鬥大戶,散戶企埋一邊。以前大戶將貨高賣畀散戶,依家係大戶A低買高賣畀大戶B、C、D。各大幫會互相撕殺,作為散戶既有沖左入去,o係刀光劍影,血肉橫飛既情況下,執起地上既金屬物品,自然係險象橫生。

再呼吸一下市場既氣紛。依家既散戶鮮有由低位持貨既人,近期大市向好,開始多左散戶入市,但係都係遊擊性質居多。真正大市會出事既時候,唔係咁架,大家會好開心,跌既話,都好老定咁話調整下o者,趕都唔走。依家呢?o的般升左幾日,少少咁回一日,就即刻好大件事咁,非常警惕。冇貨既人雖然開始有些少心急,但係今日又心諗好彩冇買到,過兩日又後悔,佢地開始留意個市,發覺捉摸唔到,變番觀望。最有趣既反而係有貨既人就好鬼驚青。因為賺緊錢而留係股市既人,都係已經獲利甚豐,去到一個意想不到既光境,反而會好有壓力,擔心一下變左另一個光境。是故今日發起既獲利盤,引起恐慌性獲利,形成一個好似單日轉向既格局,因為單日轉向係升市見頂獲利回吐所形成。有咁好既題目同現況,實為拋走散戶、接更多平貨既好機會。從來大戶開飯唔預散戶,先拋你幾下,先至黎料。近期中石油又係咁 (見下圖),大家望佢衝9.00,點知9.00企唔穩,跌番穿9.00關口,現一現8.8你睇,留係十天線下面,然後…。睇黎依家既局面,大戶仿忽點都唔畀散戶入市玩咁。

冷靜落黎,筆者認為大市都係向好,不過可以幾動盪下。再理性o的睇,今日美國休市,天日美國再休市半日,下個星期二港府賣地,或者好友都係會觀望埋先。星期三先結算,到時發力未遲。如果都唔係,見今日有較多轉倉活動,有機會延長戰地至下月都唔一定。好明顯黎方面,筆者估唔到,淨係知有人拋梗個市,溫釀下一個升浪。家下貼少個市一陣都唔知去左邊,奉勸唔好亂黎,持正股既唔使太驚。
2006年11月22日星期三
好友出動,淡友惡夢 (舊title:咁好彩?又講中?)
此網誌未開之前,筆者十月始已多番同朋友講,睇黎咩十月大跌市、工行抽水、工行上板資金離港,全部都係流既。十一月又講足成個月回調,某電視台,某雜誌,個個輪流出黎同大家講回喇,回喇。某電視台重攪笑,之前由朝早開市前,係咩現場話回調,開市冇耐又話回調,中午番黎又回調,中午清閒節目既一個財經環節又講,收市o係咩現場又講,新聞又講小小,夜晚今日XX又講,放假XX透視又講。 結果大家都有眼見,多數唔兌現,就算回都係回條毛。
筆者冇馬後炮,相信近期捧場既朋友都可以做證。見「恆指跌228點,但對大市維持看好」一文講得清清楚楚,其中提到:「...今日回落o係淡友搵到藉口,翻身減少虧損,好友則暫時放人,因為離期指結算尚有日子,未係殺淡友既時候,甚至係好友想去到盡既前奏...」。筆者亦多次批評過果o的同人唱資金流走既人。結果由噙日開始兌現,筆者亦有提過:「匯控落到145都冇支持?地產股o係弱勢?」,今日個市都答左大家。
恆指期貨,好友淡友血戰之地,大賭場既VIP房。睇唔通好友同淡友既行為同心態,唔好出黎測量大市走勢。坊間有一眾投資分析員,睇住o的恆指走勢線做背書一樣既分析,好難會準。


噙日恆指回順,期指低水減縮,某講股佬居然話之前果日期指低水係反映匯豐派息。有冇攪錯!如果係咁,就唔使曾經低水成90點子。恆指低水左好耐,因為淡友唔信邪。星期一更加係好友放人,順便做陷井,引多o的淡友落答,而低水買入既期指,之後炒番高水,有撈多筆。淡友唔爭取o係星期一轉身,後悔莫及。今日恆指巳經由低水變高水。
筆者一路話住大市向好,唔係是旦講。因為筆者認為好友唔會咁順攤o係今個月唔挾死淡友,咁好既機會,依家唔挾,等幾時?好友手上太多王牌:落後既地產股、落後既長和系、衰到盡左既匯控。淡友呢?中移動之前畀佢地郁得太多、其他果o的唔夠大份、地產同長和系都唔使諗、美國又冇壞消息、日本當冇到、之前見佢地搏命切公用股,點知都返番晒黎,睇唔見佢地有咩文章可以做喎。最叻就係大叫「回調有理」。回唔到架大佬,筆者講到口水乾,資金強勁喇。淡友做淡,要將正貨減價推畀人,人地要埋你o的平貨,再炒番上黎,期指連貨兩樣都賺盡你,你話我知淡友點翻身呢?筆者真係唔明,講出黎大家都明,點解o的講股佬唔講,點解重有人走去做淡個市呢?
至於幾時好友先挾完淡友呢?只能夠講係期指結算左近啦。筆者既經驗係好友唔係一定等到結算日先收手,佢地收手係冇路捉架,以前o的人持恆指call輪到結算日結果結算日恆指重倒跌,鬼等埋你咩。期指幾時都可以平倉,坊間有好多講股佬都用埋結算日做測市,唔準架。多數情形係升勢強到不得了先殺到尾,但係都唔可以作準。
另外重有個現象要講,今個月好友係靜靜地托穩個市,如果太早出動,個市月中升到19500點,咁就畀機會淡友唱回調,調過頭,所以人地好友食大茶飯,都好有耐性,慢慢煲。大家睇埋最後發展再探討喇。
重有好多好多野可以講,講唔完。希望大家明白多o的點解筆者成日話o的講股佬冇料到,o的金融從業員係讀死書。唔係筆者自我膨脹,而係有根有據、有板有眼架。
2006年11月21日星期二
三個白兵
圖表確確實實在反映市場活動,因為市場活動就係形成圖表既元素,圖表就是把市場活動abstract起來成為model方便研究,係市場既縮影、投資心態既投射。所以即使唔多信圖,都總唔能夠將佢講成一文不值。好多人覺得圖表唔可靠,主要係因為圖表分析唔容易,唔係隨便睇幾本書就掌握到,要認識得好深、好廣、同埋有好多實習先得,重要加埋不斷更新而變化先至做到贏家。師奶都進化過幾次啦,以RSI為例:
由唔識RSI ->
識講超買超賣 ->
識講RSI係咩區域就點點點 ->
超買可以再超買,超賣可以再超賣
師奶都識到黎個地步,重o係原地踏步就唔得架喇。今時今日起碼要知咩係RSI背馳先得架。
- 除「假象」所見既三白兵,其他三白兵出現時既成交量皆見明顯見突破。但「假象」所現之升勢,為獲利者先抽高後回套之現象。
- 此外有些人對三個白兵有更高既要求,可能都有o的啟示。有人要求三枝陽燭都特別長先算係利好。好明顯「假象」果三枝都唔合格。有人更要求三枝陽燭要一枝長過一枝先確認為「三個白兵」。黎個場面較為少見,就算近期四叔連環入煤氣都唔見有,有人見到記得單聲。
- 此外指導性較弱既係三個「假」白兵既上影線同實體差唔多長,唔夠靚。

二、成交量除了見突破,重一個多過另一個。
三、三枝陽燭既上影線 (又稱手部) 都係短。
筆者皆視其為利好形態。不過關於燭間既裂口存在有兩種對立既睇法,一個講法係形成左強烈支持位,另一個講法係形成強烈回調補裂口既壓力。不過兩個講法都係對後市看好,只不過後者認為先有快速回調補其裂口後才重拾其升勢。點講都好,總之係好。觀察黎幾日建行既表現都似係步入穩步上升階段。
當大家興高彩烈買油價回落時
請留意...
身為中國人,唔好忘記我地中國人既傳統智慧。今年有兩個潤月,除左係結婚大好日子,氣候亦大大延遲。美國人好放心,認為今年唔會咁凍,因為佢地信科學,諗住家下係因為Global Warming所以暖左,期油價格下跌有理。筆者做人唔夠耐,不過印象中,每逢黎類天氣,一係唔凍,一凍就「裂口」勁凍!
另一個令期油價格下跌既原因,係油組國話減產,但係又唔兌現。10月20日油組國話十一月開始每日減產一百二十萬桶,結果夠膽死出現減得果三十萬桶既情形。黎梗會再開會,傳會再減產,不過油價冇乜反應。筆者不時從大戶陰謀角度去睇,假設自己係大戶,可以點樣玩弄個市。石油大大戶,油組國也。作為大大戶大可以再話減產,然後又再唔兌現多次,油價可能因為咁唔升,重反而跌。等到適當時機,需求上升時,「出奇」地真係減畀你睇。到時油價有排回抽番上黎。到時大批資源敏感股份下滑,以美股災區為重,對沖活動可大撈一筆。
油價近期下滑,滑之有理,令大家忽略油價自八月於80下滑至跌穿65水平時係冇乜理由支持。依家好多唱淡油價既人既分析係將同一個理由應用o係兩次唔同期既跌幅,油價會唔會係跌過龍呢?筆者暫時有理由相信大戶下一步陰謀係利用油價泡製美股跌市,連帶環球跌市。美國經濟硬著陸。股市唔係點理負面消息,新高之後再新高。當中少不了大戶要炒高大市,準備食大茶飯。相對炒起港股,大戶唔使攪咁多大型節目,炒起美股辛苦o的都係值得既。
大茶飯幾時開局,筆者估唔到,或者o係美市炒冇可炒時,又或者o係「急凍」來臨時。
當然大家總唔會話買緊期油,但係好有可能買入左受惠石油下跌既股份,如航空業、石化業。筆者曾多次勸朋友炒黎類股份要小心,唔好樂極生悲。當然好多人依家都因為油價跌而搵梗錢,筆者都唔好想朋友賺少左,阻人發達。但願提供另一個角度和資訊畀大家參考下啦。
按:筆者唔係話中石油,中石化,南航等股份唔可以持有,因為中石油係內需同自給率不斷提升;而中石化近日炒恆指成份因素;南航業務前景理想。油價回升歸回升,筆者絕對唔係話佢會升番上80,至於會升去變,講估咩。筆者盡力講野講得清清楚楚,唔想引起人引申出其他意思,盡量啦。
(後按:友人一言驚醒,本篇有修正之需。的確油組國邊有咁得閒參予o的咁既「美市恐佈活動」,佢地一心都係諗住保持油價係某水位,然後渡假去,減產出術皆因各懷鬼胎,睇下今次佢地會傾o的咩出黎。不過筆者維持陰謀論,只不過策動今次「恐佈襲擊」既幕後黑手係另有其人,係大戶利用藉口予期油市場壓住油價。油組國反口,大戶同油組國各有各搵藉口黎達到自己既目的。個故事內容冇變:美市捧高,油價低位爭持,突然急凍,冬天遲來遲去,美國油需急增,油價升,美股高位受挫,大戶淡倉食糊。)
2006年11月20日星期一
理論歸理論、實戰還實戰
有話:「Don't buy at the bottom, buy on the rise, sell it when it's topless.」
唔可以講黎句說話係錯,不過想同大家再深入探討一下實戰既時候會變成點。
Don't buy at the bottom
就算睇好一隻股,能夠捉得準佢既升浪係屬高難度動作。以建行為例,佢正式要郁之前,先o係阻力位前大大回落,然後係大升之前果日係同一個阻力位急跌一下 (扮晒冇力衝破阻力位),於當日收市前十幾分鐘先突然揪番上該阻力位,然後第二日開市唔夠一陣大戶掃貨後已經升到唔清唔楚,第三日裂口高開,再升,次日又再裂口高開。咁既情形又有幾多散戶有份呢?所以好多時應該畀多o的耐性,低位入;真係得既股,就遲早「逃唔過」業績好而帶黎股價升。近期股市風高浪急,入市驚輸,出市又驚錯過左,只有低位持貨既人先可以好輕鬆咁放長線釣大魚。話分兩頭,即使有耐性,都唔係話下下等幾年,學識睇準行業周期、業績反映期會有好大幫助。順便一提筆者兩個選股策略:
一、筆者其中一個投資策略就係找出弱勢股,當佢被大家過份低估既時候而股價去到轉勢位時,就趁低位買入。如早前6月低見2.0邊既992聯想集團,後回升至3.5。近期數10月低見6.0邊、現價7.64既哈爾濱動力(1133)及低見14.5現價16.48既中遠太平洋(1199)。(筆者現時持有中遠太平洋,長線看好。已沽出哈動,因未見電力設備行業之短期前景。又因聯想第三季度業績欠佳而重新觀察。)買黎類股既好處就係見底反而防守力強,爆炸力大。正所謂「否極泰來」者。
二、筆者亦會找出一些長期被散戶冷落既股份,趁低位買入,然好耐心等候。建行為近期之最佳例子。
兩者皆為獲利甚豐之策略。重點係buy at bottom都要買有潛力既股份,心知其會升或回升既原因;如果唔係,隻股就buy at 咩都唔o岩架喇。
Buy on the rise
當然可以buy on the rise,不過操作起黎有難度。最基本既就係人根本唔願意buy on the rise。筆者曾多次介紹友人心水股,但係結果對方都係得個睇字。試諗下「睇下先」會發生咩事。如果睇住佢跌,就會覺得筆者睇錯,然後唔入貨。如果見到佢升,就想佢回一回先買。佢升得多,怕佢貴,佢升得少,又懷疑,要睇多兩日,兩日黎累積升幅更高,更覺貴,總之到最後都搵唔到個位入。反而有o的朋友咩都唔識,叫佢做乜,佢照跟,又得喎 (你話人生幾得意呢,有人咩都唔識輸到仆,有人咩都唔識贏到笑,當中玄機大家又領略幾多)。此處並非指出友人之不是,而係想大家明白黎個正正就係人既心態、係有血有肉既例子。其次係話,就算畀你可以buy on the rise,都唔容易爭取到高利潤。近期大市一路升,但係真係有好多人賺到大錢咩?又以建行為例,近期入貨既人,好快有咩風吹草動就走人,想食大o的既幅度都好難。上星期追貨入建行既人,大部份人4.13左近入,有o的人甚至係4.25入,黎兩日見佢落左去4.00,唔出貨走人都嚇餐飽啦。亦有裂口高開前以3.8買入者,見佢落番4.00邊,重唔快o的袋錢走人咩 (懶係唔貪,近日散戶「審慎」心態也)。升勢中期入市既人,多數只係搏得短線既獲利,絕非上策啊。
Sell it when it is topless
此言無可推諉。正所謂升市摸頂。策略為不斷提升止賺位。不過通常用黎種方法,止賺位要定得鬆動些,隨手搵o的長升長有既股就知,好多時「抖氣」都抖得比較大。所以若非buy at bottom,而係buy on the rise,唔淨得幾多位畀人放止賺位。即係話郁下都止左賺 (見上建行之例子)。
股價幾時會爆冇人知,大戶都未必知。低位入貨,訓得安樂,獲利亦豐。中位入貨,險象橫生。高位入貨,聽做蟹民。尤其係大部份人都唔係全職投資人,跟市唔貼,應該用多o的長線策略,好似畢菲特、或者香港既東尼既投資策略會比較適合。簡化黎講佢地既策略就係搵一隻有大潛力及有可觀盈利空間既股 (如中國人壽),唔好理佢中間既上落 (即不為大戶陰謀、散戶心理不平衡所動) ,然後長線持有,每季研究一下隻股既季度業績同方向 (業績才是見真章)。
回望恆指一年已升25%有多,即係話買盈富基金 (2800) 或 恆生指數ETF (2833) 都有25%溢利 (兩者重派埋息添),試問有幾多人今年係股市獲利超過25%呢?又有個理論就係話:出出入入股市結果都唔及買入指數產品喎。o岩一半唔o岩一半啦。值得深思一下。
恆指跌228點,但對大市維持看好
正如筆者於上星期四所講,持有建行既朋友可以忍埋黎兩日 (見上文),因為試跌情況一定有,而且會試到你心郁。今日就試過見3.99。但係其實就非常健康,進一步趕走o的冇謂人。建行第一個支持位o係4.00心理關口;第二個支持位係裂口區間3.88至3.95;第三個支持位係3.78至3.83。筆者本身諗住會補一補3.88至3.95既裂口先再重拾升勢。但按現時睇,第一個支持位已經好強。今日大戶係4.12積極入貨。
近期始終風高浪急,而且筆者成手貨,暫時未有下一個目標介紹畀大家。一般業餘投資者如果對中資銀行股有與趣,可以有以下策略:
長線投資方面,唔好理喇,入貨建行或工行,到08年先算,或者個市唔妥先避。
中長線投資方面等大市黎個中型調整 (慢慢等,千期唔好急)。
短線投資方面,減少睹本,提高敏感度,可以作以下選擇:咁多隻內地銀行,最睇好建行,見上文,筆者除左睇好建行,亦暗示對交、中、招冇意見。筆者唔鐘意交銀同招行,因為佢地細隻加上炒到痴左,其實好唔穩陣,好容易比小型大戶玩起;招行係咁多隻股入面最貴果隻,但係今日繼續炒上,我唔太樂觀,好易好似交行咁業績好但未見驚喜而回落。中行大,但係基於外匯投資多以致人民幣升值帶來盈利縮減,較難掌握,所以都唔鐘意 (不過如果喜歡搏,炒落後都冇話唔得)。工行都幾好,不過較為新,基楚唔夠,容易受大市氣紛所影響。建行經過長期被睇小,大戶長期收集,上升動力由上週後期啟動,現在應該會進入穩走上升階段。市帳率比交銀招行低幾多下。所以筆者強烈看好,正股加輪齊齊持有 (正股半年前買入,等左好耐,輪則是十月初買入,忍受過一次屈辱。這種正股加輪既策略日後再同大家講)。建行雖為恆指成份股,但係唔係近日操作恆指既對象,恆恉走勢對其影響唔大,又加一分。
2006年11月16日星期四
繼續看好大市
一、中國好、香港好。08年北京奧運在即,好多野要加快步伐,我總唔信可以畀淡友做淡得太過份,(不過以陰謀論睇,點都要係08之前做得幾多得幾多,遲下先啦)。
二、資金不但冇大批流走,而且重繼續有流入,留意資金流向消息,連日黎都有。大批資金流走之說不可信。香港既銀行從業家世界一流,帶頭減息,唔係話一時水浸咁簡單。
三、今次大市好特別,就係有來自中東既大量資金 (甚至非洲都有)。筆者估計中東資金應該係「安份資金」,冇來自北美既咁古惑。佢地太多錢,冇定放,北美又唔多鐘意,中國前景又好,又食得起大量資金,你係佢會點做?炒起個市對佢地好處唔大,退走既錢唔知走去邊,所以應該幾安份。所以港股o係18000點樓上支持好強。
四、外圍黎講,美股又冇咩問題,就算有,港股同美股既關連性(所謂beta指數)越黎越低,問題唔大。日股,當冇到啦。根據近期基金公司既數字,大都在港股基金板塊上錄得不錯的升幅,但在日股基金板塊上甚至錄得虧損。
建行 (939) 今日都受中人壽消息影響,調整下咁。用最簡單圖表分析黎睇,陰陽燭圖呈三個白兵之勢,書本上會話你聽屬利好訊息,不過筆者觀察所得,利好歸利好,通常三個白兵之後多數都黎個陰燭,即出現調整,日後再講。總之調整一下屬正常,但會有人驚死會賺少左而拋貨。忍得既忍埋黎 兩日。交行業績都會幾有影響力,但願唔好有咩強差人意既消息啦。
2006年11月15日星期三
大戶於近期怪市有何陰謀?
短線陰謀:
收窄範圍,目標冇變,都係要搵散戶接貨,邊度有機會令散戶炒得性起就向邊度埋手。可以炒起個股,如早前中移動炒上炒落,又順便郁埋恆指,好開心。
中線陰謀:
炒起行業,如中資金融股;炒起國企。尤其係中資金融股,應該有所作為。不過唔係近日會發生既事,又唔好驚住。至於國企,要大炒都起碼等到08奧運過埋先。黎度所指既係大戶都會間唔中做下「小炒怡情」既勾當。
長線陰謀:
策略依舊,升到o的散戶心郁,不停令到o的散戶悔不當初。散戶參與率始終都會跟隨大市升溫。一個散戶賺過幾轉錢,引黎佢身邊既人入市,新入市既人成功後,又再引黎多幾個人入市,慢慢,入得咁上下,市場魚腩充裕既時候,眾大戶就可以大舉行動,所謂既調整來臨。始終大戶都係可以食番晒個升幅,佢地都可以等下先。但係近日流入市場既大批資金就冇份,因為熱錢無咁長情。
講開近日流入市場既大批資金,友人告知有股票經紀話有資金要流走,叫o的客唔好入市住。我就唔多讚同喇。每日都有資金流走,可以不理,叫得人唔好入市,佢講梗既應該係大批資金。佢咁講就好比話:「好地地,有大批游客來港,o係機場參觀幾日後,o係過兩日香港有盛大煙花匯演前就大舉離港。」真係「工幹」(工行IPO) 完 stay behind之後,賺少少就走咩,唔通佢地會諗「得些好意需回手,唔好咁貪心」咁咩。筆者真係覺得有時o的股票從業員講野莫明其妙。相信係有部份資金會流去其他市場,你有一大筆錢都會分批作唔同既策略,有一筆係諗住賺些少就因見美市有得炒而流去美國又得,有一筆就賺多o的然後移師去其他東南亞市場又得,有一筆就賺一鑊金先走又得。「資金流走」黎句說話有好多位走,o的經紀大可以事後「講清楚」佢個「原意」。筆者既重點係資金流走既量未至於要到睇淡個市既地步,而該經紀好明顯係有咁既睇法,而該睇法係有問題。
2006年11月14日星期二
還有兩個大市分析之重要元素 與 近日市況
筆者認為:要分析股市,除了基本分析及技術分析以外,還需要加入以下分析元素:
一、大戶陰謀。大戶要食大茶飯。企業營利唔足以令佢地可以發廿幾卅幾個月花紅。
二、市場氣紛,散戶動向也。
近期好些人在唱淡大市。佢地既論調離唔開大市需要調整,資金開始流走。一個月後既市況,估黎多餘,總之依家唱淡大市就言之過早。佢地話:「個市係黎個高位遲早會調整,不過估唔到幾時發生。」鬼唔知咩,黎句說話永遠都冇錯架喇,要得你出黎分析,就係睇下個市會點走。近期市況表現古怪,主要原因係散戶唔知係真係好醒定懶醒,參與率都極低,師奶都會話:「依家個市太高喇。」只要大多數散戶繼續咁諗,個市都重有排玩。另一個原因就係正股賣買差價收窄所影響之下,活躍既散戶玩窩輪居多。殺輪民又焉用牛刀呢,正股唔需要有太大異動。不過咁都唔可以長期滿足到大戶既胃口,下次再討論。其實近日大市係有調整既;近期恆指就多次表演即日調整,快到你唔信。
首先,好多人投資左好耐既人都冇諗深一下究竟咩係調整、點解要調整。調整係跌市既一種;係向大升市中出現既跌市。咁既然係升市,點解要跌呢?係調整入面,大部份進行梗既係獲利既行為。最奇妙既係,獲利既人目的係獲完利之後,可以稍後再買入,然後再獲利。記住,大前提係大升市,理應看好。但係黎個獲利位,唔係隨隨便便搵出黎,而多數係供求既問題。當係高位肯接貨既人唔再多既時候,係可以嘗試拋貨既時候。強調既係「嘗試」,因為未必有人跟你咁做,結果可能得你自己戇居居掉貨,人地接完你既平貨繼續炒隻股上去,淨低你一個 (黎種情況大戶都會遇到 )。所以另一個要點就係要有人發起,又要有人跟先得。而配合這行為者,即最容易落答者,散戶也。散戶冇貨,你搵其他大戶跟你顛咩。散戶貨少乃近日調整速度快之原因也!總結一下就係,調整要成立,先係個股價推唔郁 (其實重有其他理由,如,有大戶錯過升浪,想入貨。) ,然後有人發起,然後又有人因一定既理由中計 ( 如近日理由係:喂,好高喇,重唔走! )。而調整維持幾耐同有幾深,就睇有幾多人中計、幾多人有貨中計、同個大話講得有幾似層層。
再論「一日散戶唔動容,一日個市都有得玩」。情況就好似玩廿一點賭台咁,當同場都係高手既時候,大家好有默契咁同個莊玩,大家都會有錢搵。當走左個傻仔入黎亂咁玩,高手門都會玩多兩手就離場。此情況同股市差唔多。
另一樣野係,大戶係升市時要回一回手上既貨或者調整大市有時係為左震倉,震走那些冇膽亂黎既人,等隻股稍後可以升得更順。黎期散戶驚青到死,郁下四散。見今日中資錢行股 (交行除外),如建行,只需一日就完成震倉。
所以掌握大戶陰謀及散戶近期心理狀況是股市致勝之王道。
還有一點要重申,唔好怪我長氣,剛才一切既論調建基於基本因素向好。筆者現持建行購輪,建行還有因素可炒,持有者大可以殺落去。但對交、中、招行冇意見。
2006年11月13日星期一
Investman Begins
筆者於2005年7月決定遠離職場無謂人事,告別打工生捱,靜心休養。2005年12月起重新專注投入股海。有驚有險,差不多一年,收鑊倒也算有個交代。如果以12月起計,股場鑊利優於打工。且還於06年6月中至8月中放了兩個月大假。
筆者絕非在此曬命。只是若沒有實質背景支持,則本網誌內容參考價值不明確、吸引力大減。筆者想借此有效渠道,達至自我監管、審慎行事為最主要目的。其附產品是得以和大家分享投資心得,既有理論,又有實戰;成也借鏡、敗也借鏡。
坊間流行摸擬甚麼倉、甚麼組合,取巧者居多。有一個星期給他們「組織策略」。而那些「策略」都是「先斬後奏」,讀者何從之有?真材實料的話,就該於電台推出即市摸擬組合,這樣的節目應該會大受歡迎,該不是未有人想過這點子吧,相信大家都明白這種節目應該會很難出現的原因!這也關係到這個網誌的目的,當下「策略」當下更新,寫下有血有肉的真實個案才有意思。相信這樣的投資記錄多少也有點價值吧。
最後請恕小的愚侮。今後有賴大家支持及賜教。