對一半、錯一半

大市假後的確裂口高開209點，但係收市係倒跌。重要黎盤冷水，內銀股首當其沖，以建行跌得最勁。筆者搏唔到，就要睇位走人，錯左就要認輸。可能考慮觀望至期指結算後。


中資金融股今日跌得最甘係建行，筆者假前搏，都唔會搵番佢黎搏。之前提過建行形成左頭肩頂既形態，其實凶險非常，但筆者勸唔到人趁後抽沽出建行，避一避風險，但係後抽只會令投資者更加唔想放棄。後抽起初無力，但係假期前夕，可能同筆者一樣搏一搏，升勢轉急，大大穿出頸線，但今日乜都回番晒，成交亦增加，令人擔心。筆者當然都希望唔好太大鑊啦，若然所謂頭肩頂真係成效，都未必要跌至上次講既量度跌幅方休，希望下圖講既底部目標發揮效力：

亦可以寄望150天線有支持，不過，視佢為支持，即係話穿左既時候，係進一步利淡，拋壓會響黎個位加劇，因而「居然」可以將建行壓回5元水平。(用「居然」係因為D人唔信頭肩頂既利凶，唔信建行可以去番5元水平。)

至於MACD(8,17)痴埋訊號線，還未升穿，即反彈訊號未出。

歷史將重現，聖誕假後裂口升

上年聖誕前夕，恆指為19,320，假後開市19,620，裂口高開了300點，以當時基數黎講，係多架，依家大家慣左，恆指基數亦變左，300點係小事。上年裂口高開，尤其係中資金融股，跳升得更利害，係因為國內A股響港人放假其間大幅做好，筆者預計將會歷史重現。主要原因係國內氣紛剛扭轉，之前弱勢既銀行股要發作。重圖表睇，形勢較好既係工行同交行，其次係，...令人唔開胃既中行。

輪都輪到恆指...

一絲希望都冇埋，補完11月尾反彈裂口都未能彈一彈。眼下唔係講緊咩100天線、150天線，而係下兩個裂口。回補裂口既意義就係回補過錯，要回補「亂喊直通車」既過錯。第一個關口係24,997至24,599。第二個關口係23,304至22,933。補回第二個關口為目標最為正路。樂觀D睇，100天線、150天線給予一個反彈既藉口。筆者預計一個旗形走勢，若然反彈唔出現，即穿旗形底部，就直接向25,000點水平進發，見150天線或回補裂口A方休。 MACD(12,26)已再渡由正變負，並穿了訊號線，各位於本網誌該已見識過，咁既跡象代表點樣冇運行法。DMI顯示下跌動力及下跌趨勢皆加強，而上升動力下斷下降。恆指如此走勢正中「任姓者」下懷。

玖紙情況暫時可以

筆者所見，大戶升方百計要壓低玖紙入貨，留意每次穿19元後，推至18元以後之買盤。除多次出現「長腳」外，「長腳」亦續漸縮上。玖紙將於一月完成有關上游交易，筆者懷疑有心人力壓玖紙入貨。經過一個月來，於大市氣紛欠佳情況底下，吸貨者該皆屬強者。建議持貨者既然之前忍得佢見18元，可嘗試忍耐多一會。MACD雖未見好，亦未見進一步轉壞。DI+將要升穿趨勢線，有些少運行。

建行形勢凶險

建行走勢形成了「頭肩頂」，現下已跌穿頸線，將要再向下發展，其走勢形態之所謂量度跌幅約為4.8。估計反彈在即，反彈將受制於頸線，但若升穿亦不代表轉勢，除非連續多個交易日 (最少三個) 企於頸線之上，若真的如此，到時再買入亦未遲，現下不該吃眼前虧。趁反彈要走人，唔反彈都走。MACD所示，短期唔使荒有好轉。

北海道壽司飯不知幾咁好味，香港金管局任總不知所謂

渡假期間，忘了港股，回來後，無事忙了一週，暫時未能完全掌握大市脈膊。懶懶閑閑，只有小許覺悟：渡假前抽的中鐵，星期四拋了。回來後，晴天霹靂的不是市況，而是「每週財經動向」要暫停，以後人生少了樂趣。

臨渡假前，筆者發現大市出現異動，將要作勢反彈，且認定是次反彈會歷時較長，卻殺出「聯儲局緊急會議」一流言，擔心睇錯市，但結果只屬短暫干擾，大市還是乖乖的反彈了好一段時間。闊別大市一輪，眼下又到了危險時刻，筆者需時與市場接軌，暫時對市況尚未有強烈心水。望下幅圖就唔多叫人開胃：

自MACD(8,17)於負值下升穿訊號線，顯示跌勢中出現反彈 (但並非轉勢) ，結果恆指亦真的展開反彈，30,000點前腳軟，現下MACD(12,26)回穿訊號線，形勢不妙。DMI顯示大市無趨勢可言，勉強可以話上升動力還在加強中，而下跌動力在減弱中。

現下形勢十分不妙，但卻有一絲生機，生機並非指大市會轉為向好，而是並不如市場人士睇得咁悲觀。反彈裂口於星期五完全補回，將會再次反彈，但反彈力度會弱過上次，筆者認為情況發展落去會做成一個旗形走勢，大市才進一步找方向。同時筆者認為可以繼續渡假，08年2、3月大市先見番好。

任總不知所謂
響政府入股港交所見光、及市場亂傳直通車消息時，冇見任總出黎講過D咩以正視聽，任由個市亂咁飛。一直出現次按問題，佢都同大家講對香港金融體系及銀行體系影響唔大，但係響個市走下坡時，又突然加多腳話有銀行業績可能要見紅。只屬「可能」既野係唔係要同大家講呢？佢咁講會有好大影響，佢會唔會唔知呢？所講既係邊間銀行先？講埋D咁既野有咩作用呢？有咩居心呢？

筆者覺得明顯成件事係班友一開始誤以為行直通車，既可托高香港個市，制造回歸十年一遍繁華，又可以幫忙祖國排洪。好大喜功，亂估阿爺喜好。結果阿爺開聲回應先知攪爛錯晒。其中一個要點就係要直通車成事，港股就唔可以過貴。所以佢地要先收拾番個殘局，要港股回到未癲時，如果唔係就唔使旨意開到車，咁港交所就唔會值咁多錢，政府就入錯市。只有咁，筆者先解得通阿任總何以出口「干預市場」。由政府入股港交所見光、到華哥一陣又話互換，一陣又話直通車就快開，到任總出口干預市場，配合中央既講話，同埋後期先見任總同銀行界人士上京深入溝通，可見佢地不知所謂，估錯阿爺心意，攪到港股發展至如斯田地。就放長雙眼睇下佢地點攪落去。

筆者外出渡假，12月9日回港，網誌期間可能未能更新，抱歉,，抱歉。

港股反彈未完。純睇圖，MACD(8,17)與訊號線剛好匯合，顯示恆指低位會有反彈，但未算轉勢。

美國感恩節消費出奇跡既可能

筆者認為美國感恩節既消費將出現奇跡既原因有三個：

一、美國人鐘意消費果條根係香港成年人、中、老坑所無法能夠明白，但係時下香港年青人就好明白，傾家蕩產、欠債累累、都要買野！

二、上年Walmart 既 Black Friday Sales唔好(見上年一文：解讀美國數據) ，今年Walmart應該會好識做，而且美國人既策略應該唔同左，唔會等Christmas last minutes，反而會盡早出擊。

三、純筆者陰謀論，美國部份人見信貸將越黎越緊縮，部份人甚至面臨信貸崩潰，實行盡地一煲，有咁大買咁大，趁有一息尚存，狂簽咭掃貨，買定聖誕節所需又何妨。

趁勢的真理

星期二早上既動向究竟係：
一、大市短暫見底
二、大戶入貨去炒聯儲局流料
到黎一刻筆者都無法確定。

今日再次出現類似星期二早上既動向。玖紙今日都見過18.00，建行見6.85，濰柴見55.5，筆者始終認為，黎D價位入第一批貨其實唔錯，但係以為星期二下午果下已經反彈起動，黎part就睇錯。若果星期二早上大市屬挫底撈賤貨，可以話正要起革命之際，因日本股市突然炒上，然後有心人傳消息話係聯儲局開緊急會議，下午才急急炒上，破壞整個續步吸貨既形勢。消息告吹，加上壞消息一堆，反而做就左另一個機會畀大戶再挫D賤價貨出黎。今日賤貨已成功被挫出，大戶暗地吸，接近尾市，個別股份出現大戶急不及待掃貨。有智慧不如趁勢，筆者唔識，但筆者只知道，有財勢先可趁勢，大戶確實今番趁勢執多左次平貨。

筆者既錯，唔會因為黎個反彈最終做左出黎而可以抹出。筆者黎下的確係出現過情緒亂晒既情況，因而對星期二下午突然三分鐘內急升既異動完全未有想清想楚，甚至星期三早上還未有行動，的的確確係犯晒大錯。能夠洞察星期二下午勢色唔對路，即日鑊利走人觀望，到今日大圍覺得冇晒希望，先入番貨，咁樣先至係高手。

其實筆者大可以黎兩日炸炸帝帝，搏過骨，相信只要忍到聽日就已經攪掂，但係去營造一個不敗既記錄唔係筆者寫黎個Blog既目的，亦唔係筆者既作風。鬧人鬧得激，鬧自己要更激，有錯就要想辦法令自己有咁深刻得咁深刻。

網誌出了個大污點，筆者需檢討

筆者唔夠冷靜，相信好大機會係領左野。星期二上午市既異動可能只係大戶星期二既全盤計劃，佢地唔只今日賺晒D認沽，重加埋星期二先賺一輪，同埋當日收番五隻牛證及兩隻熊證，黎鑊認真杰！

除非感恩節既消費出現奇蹟，相信機會都唔大，筆者既第一步入貨早左，反彈未必搏得到。濰柴、玖紙雖暫未損手，但天日都危危地。

筆者極需檢討，自己唱得個市咁淡，但貪心炒反彈，替這個網誌留下大污點。除左貪，驕傲亦有，抵打非常，正考慮啟動懲罰機制，甚麼是懲罰機制？日後再講。

今日個市其實係咁睇

筆者昨日分析了上午市，作出了第一步入市決定。原於股份已進入短期極端低價，如見6.99既建行、見18.00既玖紙、見4.77既馬鋼及見58既濰柴等。唔只係低，而且吸納盤湧現，18.00水平既玖紙瞬間被掃走。26,000水平提早見支持，比上兩次反彈基楚更穩，故午飯時速速撰文叫：「可以考慮第一步入貨。」

原本好地地可以慢慢享受購物既樂趣，但消息就係咁討厭，重要響關鍵時刻出現，好快平貨已一掃而上。消息係炒聯儲局要開緊急會議，要提早減息，唉，吹埋Ｄ咁既消真係壞大事。昨日收市窩輪錄得大量恆恉認沽，原來係騙局中既騙局。結果緊急會議就唔見，只係出例牌既會議記錄，重要係超負面。信消息，死得。其實會議記錄已確定減息勢在必行，如果係炒減息，唔差在提早果幾日，咩都假，藉口大把，淡友們 (尤其做定恆指沽果班) 唔做野就勢行假。

希望反彈浪冇被破壞。黎個消息，令昨日跌757點轉為升311點，即係炒左1,068點。消息原來係流既，今日大市最低回過995點，即Correct番該消息做成既裂口，重頭黎過，問題暫時唔大，當消息冇出過，依家唔係跌925點，而可以當係微升143點。建行與昨日上午走勢接軌，報7.14，其實可以考慮。玖紙甚至已倒升。濰柴及馬鋼一開市已展升勢。筆者維持反彈勢未轉壞之睇法。

(利益申佈：筆者持有建設銀行(939)、玖龍紙業(2689)及濰柴動力(2338)之股份權益。)

天下消息，無一可信，唯市場足跡可信

筆者並非消息靈通人士，而且亦不信所謂消息，只是純從市況推測大市走勢。

雖盡早通知第一步入市位，但結果給予讀者考慮既時間唔多，大市已飛升，手快有，手慢冇。

大市今番反彈力度會好過之前，但並未代表轉勢。約下午3時半左右，有傳因為美國聯儲局突然要開緊急會議，所以下午市返黎升得咁急。開咩會唔知，講咩又唔知，總之好野咁啦。緊急既野係筍野，筆者唔懂，更加唔知人地半夜生更先決定開會定係半夜生更先打電話過黎漏風聲，定係一早就知，專登跌散個美市同港股黎掃貨。咩都好，唔關筆者事。

筆者信技術，信市場人士既行為，觀察異動，算擇安全位入市，配合策略應市。消息畀得大眾既有兩種，一種係流既，另一種係過時既。黎個世界只有假公正，以美國人最叻。今日既新屋動工數據，唔係即場計出黎，冇錯，計算過程非常保密，唔會畀一般散戶知。之不過，掌握消息既人，佢地既部處，佢地既足跡就保唔到密，唯有多多掩飾，能夠睇得透既話，先能夠掌握先機。

可以考慮第一步入貨

中國幹了漂亮的一場

美國行弱美元政策，筆者讚同林森池先生之睇法，減息幫唔到次按問題，美國目的只係想令美元變弱。美元走弱，除了幫助出口外，骨子裏係想商品價格及油價上升，令發展中既中國不勝負荷，迫使人民幣升值。(成件事既前奏，唔少得我國拋售美國債券，然後有人發皮四，要頒獎畀達賴喇嘛，搵幾丁友出黎話支持台灣入聯合國。)

中國人孫子兵法博大精深，借力打力；成思危出口術話中國外匯儲備應利用強勢貨幣升值，來彌補弱勢貨幣的貶值，令人聯想中國要拋售美元資產。美國要美元貶值，我國來幫你一把，弱上加弱，力度非同少可，讓你美元弱到變草紙都重可以。油組峰會中，伊朗總統艾哈邁迪內賈德提出，建議停止使用美元。弱美元政策得逞只因全球市場主要以美元作結算。若各國改用歐羅，或將來如羅傑斯所預期使用明日之星：人民幣，美國就大鑊，再行弱美元政策就死梗。

美國心知不妙，美國總統喬治布殊重申強美元政策。Good boy，good boy，well behave，咁咪乖lor，中國獎番你，中國人民銀行行長助理易綱澄清說，美元依然是中國外匯儲備中的主要貨幣。

美國既朋友門，唔好攪咁多野啦，畀心機攪好次按問題所帶出既更大鑊經濟Crisis重好啦，for crisis sake！

睇睇恆恉心電圖 - 2007年11月19日

如筆者所提及，上星期三、四做成既島形底唔成形，只係一個跳上跳落既局面，一個唔該，跳番落去，島形底做唔成。有分析員話依家掉轉做左個島形頂，但筆者意見係：照書背就係，其實根本唔可以算數，淡友又唔使咁高興，黎個所謂島形頂無效。

筆者用恆指既走勢圖講左咁耐，大家睇慣睇熟，筆者偷懶，唔登出黎。

MACD(12,26)已由零變負，即係筆者講既Exponetial黃金交差已出現。ADX趨勢線持續下滑，即大市暫時並無明顯下跌趨勢。DMI響近期大市參考作用暫時唔大。

從圖睇，大市繼續向壞，並無轉好現象。

睇睇恆指心電圖

用簡單分析睇，10天線穿20天線，死亡交差也(見[2])，不過筆者多次提過，利用死亡交差、黃金交差等作測市用，反應過慢，後知後覺。(參考[3])自MACD(12,26)首次穿訊號線後，出現了糾纏，其後第二次穿訊號線，市況繼續轉差。大市未有明確轉好現象，見較敏感既MACD(8,17)與訊號線尚有距離。(參考[4])+DI穿-DI，可視為利淡，但ADX下滑，趨勢漸弱，顯示跌勢不強。從DMI睇，雖見利淡，但情況未算強烈，上升及下跌動力一齊減弱，大市漸成無趨勢。(參考[5])看似築成島形底，但有機會係跳上跳落既走勢，如今下定論係言之過早，假如明日一個裂口下跳，反而該兩日於短期高位做好既投資者被困。又參考[6]，過早斷定其為島形頂便言之過早，其實係跳上跳落既去勢，結果一個上跳島形頂完全唔成形，反而使當日做淡者被困。重溫[1]，島形頂亦不算有效既類形，由於下跌當日，跌幅曾一度收窄，回補了大部份裂口。

總括黎講，從圖睇，大市未見轉勢，反彈無力，但沽壓亦唔勁。MACD(12,26)已接近零，眼前小心其變成負數，筆者稱之為「Exponential死亡交差」，比起「Simple死亡交差」更見「死亡」！

淡淡美市(一)

美國星期二大市大升319點。除了油價下跌及Walmart業績理想，唔少得高盛等所發表之言論令投資者重新振作。當日美林開show，高盛CEO聲稱：「the bank has a short position in the subprime mortgage market and won’t be taking any significant charges to write off losses.」「大大減低」投資者對次按問題將繼續擴闊之憂慮。JP Morgan Chase CEO一句：「I think we're fine.」投資者甚感窩心。

匯控當初於2007年2月，業績公告前發出盈利警告，讓全世界首次意識次按問題，並先知先覺為次按大額撥備，是為全球最有良心既銀行。各美國大行好似冇份咁，各方還勁掐匯控，其可恥之處，難以言喻。當一眾美國金融巨頭跳舞狂歡之後，匯豐於其業績報告，明示美國經濟前景暗淡，信貸市場惡化，地產市道衰退等。其中令人擔憂既係住宅物業價格持續下跌，拖欠貸款既個案增加。需要為信用咭貸款撥備。CDO方面的確受控，但問題早已深化之另一個層面。本網誌既支持者對匯控所提及既，應該唔感到陌生，筆者早前向大家分享睇淡美股既原因，就正正係黎D。再有匯控引證，筆者唔驚唔得。果班厚顏無恥既大行發偉論，筆者聽唔入耳。

昨日道指跌76點，筆者認為係出於知機既聰明錢走人所致。

跌突果然預反彈、市升果真莫興奮

個市今日會點發展，唔使筆者講，大家都想象到。

筆者早於一個多月前已預計個市會點發展，一直冇變。筆者對調整分為「似樣」與「唔似樣」既定義，該越黎越得到印證，亦慚慚獲得認同。

似樣調整中，不斷出現令人心動既反彈，其實會次都係畀多次機會人走貨，但係現實中，散戶往往會再存新希望，結果又唔捨得沽，諗住睇多陣，觀望一下。然後下一次破位，一係就令散戶進一步成蟹民，一係令散戶亂拋貨，提供他人短炒一轉。跌下彈下，早入市者，之前滿手既盈利，陰下陰下唔見晒，近期追貨者，陰D陰D越蝕越多。最終，忍唔住認輸，大市立即回復升軌，使其成為摸頂買貨，摸底賣貨既高手，痛不慾生，此乃似樣調整也。

市升莫興奮

第四步減持後總結

經第四步減持後：
◆ 中壽已全數沽出，筆者早前提出中壽業績唔好 (雖然數字上好睇)，本想32.00左右水沽出，但上週星期四受「碎銀」於32水位買盤直極，中晒計，因一時貪念並未沽出。筆者於預告星期五「就好收貨了」，有讀者誤會筆者意思，但起碼筆者冇誤會，當日以49.98沽出，點知當日收市可以谷番上去50.5，筆者重以為自己睇錯市。中壽業績靚主要係得益自投資收益，而其所持股份大部份是中資金融股。但其保險業務實則倒退，可謂不務正業。日後趁低收集，都收平保，唔吼中壽。

(順帶一提「碎銀」，「碎銀」於2006至2007年首兩季都做得非常好，除佢本身賺錢，佢地出既既「言論策略」亦屬於有良心。可能又係蝕次按蝕傻左，近日出爾反爾、行為予盾；言論、報告及盤路均陰陰濕濕，誠信破產。筆者將對其評級由「熱血情年」降為「老奸巨滑」。建議投資者小心過慮該行既所有舉動。)

◆ 筆者睇好金價，但決定全數沽售紫金，皆因其已脫離了金價走勢。紫金亦於筆者所講既「就好收貨了」果日先捨得以12.98沽出，始終搏唔到金價升幅所帶黎既好處。可能有讀者留意到筆者以12.98及49.98既價錢分別沽出兩隻股份，其原因是當時筆者認為大戶應該會推高紫金至13水平及人壽至50水平，用以引散戶再追番該兩隻股份。兩個價位均減兩仙。要減因為恐防大戶計劃唔成功，減得2仙係因為筆者貪心，其實穩陣D應該定12.9及49.9。

◆ 繼續長線持有既股份：匯控、和黃、建行、玖紙、銀娛及地鐵。玖紙早為初步減持計劃之目標，如今仍等位補回之前沽出既貨。其實成件事係有違長線持有既原則，不過筆者貪到死，之前$24水平時沽出既貨，依家用$20買番，等於將$4「除淨」落袋。黎種「自行除淨」既策略有風險，萬一睇錯市，隻股向上突破，黎一批貨就成為「止賺」貨。

大市暫時如筆者所料反彈，且睇埋下午市，先算筆者講中。「似樣調整」中應該出現較多反彈市，響所謂低位買貨既投資者，千期唔好大貪，輕易以為大市重獲升勢。黎種市，掌握得到既話，可以賺好多轉錢，買下正貨轉手又做番put輪，又再轉手買貨，於此類推，當然講就易，番緊工既人更加唔好想。

大市 ‧ 2007年11月2日

先看上星期收市後之恆生指數走勢圖：

上星期五收市後，MACD(12,26)剛好接觸到訊號線(即EMA(9))，可見糾纏後，將要再穿訊號線。而且+DI再穿趨勢線，警告訊號再現。星期五裂口下跌險些做成島形底，幸而當日日中跌幅曾一度收窄把「島形底之右裂口」補了大部份，只留下64點左右(星期一之最低點30,986減去星期五之最高點30,922)，島形底勉強成形，但可以話冇乜效用。其實30,000點加入既好友係逃過左一大劫。

加上今日既跌市，走勢更見難睇：

今日MACD(12,26)正式穿訊號線。+DI及-DI距離非常近，日後幾經波動便可能相交。可見MACD所出之預沽訊號雖早，當時開始沽貨離場者可能會後悔左幾日，但黎幾日可謂輕鬆自在。

筆者之前話既陰乾跌市 (即似樣調整) 之種種蹟象都呈現左響今日既市上：跌市既基本基調係升升跌跌，但每每遇上所謂支持位都會出奇不意地跳空跌破，令人冇得翻身。然後又會回升，皆因久受「趁低吸納訓練」既股民入市或再加注。升升下又突然破位，再度令已入市者深深被困，又令未入市者卻忍無可忍要買貨。另一個現象係大跌時，卻出現強勢重磅股逆市升，但隨後好快加入跌陣，而且跌幅急急追番晒。上次跌市都未明顯見到黎個清況，但今日見港交所先逆市創新高，然後追番6%跌幅。

師奶摸頂絕投實在叫人嘆為觀止，今晚聽唔少師奶散戶打上電台或電視節目，講出佢地咩位入左咩股，問人點算。所講既入市位都係頂到盡。

且看聽日係唔係於筆者所想反彈。

今日跌突，預留明日反彈。

筆者文筆唔好

筆者向來取向已經講得非常清楚，且身體力行，四步減持。筆者亦先於星期四凌晨三點聯儲局議息後，引用林家亨所講港股開市後大戶便要派貨，然後星期四晚無乜信心講，都講，叫大家如果見有股份有幸跌得少或逆市升，都應該收貨。筆者以為自己意思好清楚，即係如果星期四大戶派貨冇走到D貨，星期五見隻股唔係話唔見左好多，都沽貨走人，叫大家唔好貪，收貨。

但原來有人話唔明筆者意思，認為「收貨」係指叫大家接受果隻股既表現。更甚既係認為「收貨」係指收集多D貨翻黎。成句係「就好收貨了」，筆者到依家都唔係太接受有人想左去第二個方向。筆者承認係可以寫得清楚D既，日後會再小心D架喇。

但若果有讀者近期睇開筆者講開對大市既睇法，都會將「就好收貨了」解作「好快D入貨啦」既話，都要好好儉討下。好多時投資者用自己既主觀情緒去解釋數據、去解釋投資環境。有股響手既人樂觀，冇股響手既人就悲觀，係好正常既心理狀況。但係好多時投資者陷入既情緒圈套係：個大市向好，冇股響手既人過於悲觀；大市向壞，有股響手既人過於樂觀。

筆者唱淡美市，但係有美股響手既朋友既反應就好似筆者話緊佢個仔女唔好咁，好defensive。筆者話美國人好似如夢初醒咁，有讀者回應：「they are not that innocent」，當然筆者一方面為左諷刺效果出D先咁描寫，另一方面美國既投資者亦真係失衡，大戶先有機會餵貨畀人，道指先可以亂升，正正係投資者出現投資情緒失控。讀者以為佢地唔係咁innocent，但其實係基於「當局者迷」黎個定律。你睇美股可以好冷靜，皆因你身家性命財產都同美股無關，又正如佢地睇港股都可以好冷靜。試過持貨既人理應心明箇中感受。

文章寫出來能令人接收到筆者既原意，相當困難，筆者未有耐做得到。寫得唔好，唔好意思，小的會努力。

大市走向，要睇30,000點可唔可以派多次貨，家下散戶既心理狀態受溫家寶言論影響有幾多，即散戶「趁底吸納」訓練成效會受何等情度既影響，筆者未掌握到。可以肯定，有貨者坐立不安，無貨者心感涼快。不過，市場已經有人出黎解釋話溫家寶係提醒投資者要審慎，但直通車係一定會開既！此等人士處於甚麼情緒，還是賣甚麼藥，留待讀者定斷。

至於港股...

其實筆者取向大家都好清楚，但筆者近期無膽大喊沽貨，因為個市唔理性，重炒得上又吹佢唔漲。不過借恆豐證券研究部董事，林家亨所講，今日引證了，明顯係大戶派貨。在此順便一提林家亨先生，說市既恨既準，今日讓大家見識了。

筆者發現上午臨近收市時段，大量大手沽出既Call輪，其中佔大多數既係中石化，中壽及中行。令本來身痕想買入中石化Day trade一轉既筆者都卻步。

筆者無乜信心講，亦講，聽日如果有幸個市或部份股份跌得唔深，甚或逆市升，就好收貨了。

美國人醒未？

筆者講黎講去都係唱淡美股，次按影響廣，且深未見底。

對歐洲影響又多一件：受次按影響，瑞信第三季淨利倒退31%。其投資銀行之獲利幾乎完全被抵消。

筆者係Nobody！Nobody給予美國聯儲局主席「阿伯」，與大市唔同路，建議換馬。順應華爾街大帝們既意願，後患無窮。家下既幫唔到個市，重放走左通漲，加深禍害。筆者估唔中佢減唔減息，但係就果然係減又死、唔減又死。美國投資者今日好似發完夢咁，「依？油價咁高既？乜我地D銀行會畀人評級得咁差既？Consumer spending上升，咪即係關乎通漲？Oops！We did it again.」

They did it

The Federal Reserve, confronted with surging oil prices and a slumping housing market, cut a key interest rate by a quarter-point on Wednesday, but signaled that may be all the rate relief the economy needs right now.

當然最後一句非常重要。恆豐證券研究部董事，林家亨指出，港股開市，大戶將會借好消息出貨。

究竟減定唔減！

以聯邦基金利率期貨報價睇，市場預期聯儲局將會減1/4利的機率為98%。若果聯儲局決定唔減將會觸犯穩定市場原則，令市場產生動盪。所以市場會如此堅決認為聯儲局會減息。

但昨日美市傳出聯儲局並非必要減息。Wrightson ICAP首席經濟學家克藍道預測聯儲局基於降息會讓投資人以為12月分還會再降息，此次將做成維持利率不變的決議。市場興奮情緒暫緩，昨日道指跌77點。

其實會後聲明是重點，到底是：
一、減息，會後聲明大力削弱市場對進入減息週期有暇想。
二、不減，會後聲明預告未來視乎需要有機會減。

對聯儲局黎講兩者都有後患，都有風險。
對筆者黎講兩者五五波，並非如市場般一面倒去想。筆者想來想去，減不減息對後市作用難料，暫時不作出任何行動為妙。

建行、和黃、中壽、匯控、地鐵都未捨得沽

筆者將進行第四步減持

中人壽業績唔係咁理想。

中行次按撥備多左。

交行業績非常好，但係唔達之前董事漏口既「200億盈喜」。

玖紙進入險境，步步為營。

美國若減息，股市受壓，若不減息，股市都受壓。

大戶高位派夠貨，將可於30,000點再派、28,000再派，好開心。

自第三步減持，筆者「繼續煲下」系列中，中石油、中海石油化學、馬鋼、湖南有色已沽清，下一步要郁埋中人壽同紫金。長線系列中，玖紙早於第一步減持已沽出部份 (玖紙由安樂長線降為警惕長線)、下一步和黃、建行、地鐵、甚至匯控都要減持，以完成第四步減持行動。現時持股率為40%，預期第四步減持後將降至25%。

次按大禍未完

對，筆者是美市大淡友。

美國消費者信心指數由上月99.5跌至95.6，遠超預期 (預期為99.0)，是兩年低位。

瑞士銀行集團(UBS)受到次美國次按風波衝擊，第三季虧損近6.24億美元，是9年來首次報虧。當然，唔少得既係，差過經濟師預期。

次按影響甚廣，不容掉以輕心。中銀第三季為次按亦要撥備5100萬。

筆者認為美國聯儲局應以不減息為明智。減息為死撐，刺激信心，其實唔減重型！既可扮冇事，刺激信心 (只要聲名上做D功夫)，又可以應付通漲。

實則次按實一層既影響還包括
一、市場買樓意慾大減，加上銀主盤一大堆，影響樓價下跌。
二、一大批人失業，既影響樓市銷情，亦影響消費，消費、樓市對美國經濟太重要了。
三、消費信心和經濟互相影響，乃惡性循環，骨排效影其實未見，點可以咁快就安心。

小心部份淡友借新地配股減蝕

大市 ‧ 講兩句

今日即月期指成交高，有8萬5張左近，情況好似上個月咁，尾二個日都大手成交，實行去盡佢。
高興還高興，小心黎近爆冷唔減息。地產股則減唔減息都會回軟，睇路。

大市 ‧詳盡D - 技術分析

市場上所謂「理由」，筆者暫時聽唔入耳。繼續睇圖。

RSI唔太重要，不過都望下。RSI回至70水平，若星期一未能升破，見頂回落，則再次出現背馳，但係都係果句，參考價值未至於無，但唔大。

MACD(12,26)癡番埋EMA(9)(紅藍線圖)，筆者上回都提過，初次跌穿EMA(9)只係「預沽」訊號，應視乎市況作出行動，如減持部份股份，或再觀望多幾日。現時出現了糾纏。

+DI和-DI同樣向下調，顯示實則趨勢減退。但兩線仍有相當距離，未見強烈利淡訊號。

有一點非常值得注意既係，恆指走勢圖係咁，好似都未係好危險咁，但係拎部份個別成份股既圖出黎睇就可以睇到走勢完全唔係路。黎個正正反映家下既市況有幾唔健康。所以於個別股份既賣買策略，絕對唔可以忽略對其圖表走勢作出研究。

大市 ‧詳盡D - 散戶動向

當然唔少得拎番以前成日留意開既散戶動向。即「勿癡根‧大鑊‧散戶情緒指數」。

以往既市，筆者都同大家講散戶心靈脆弱，家下散戶動向唔使筆者講，大家都好清楚。

18,000點大高，20,000好高，22,000好驚，24,000好鬼驚，26,000入市死咩，30,000跌落29,000，嚇鬼咩，驚咩呀？

最驚既係，有一班原本好冷靜既散戶，較早前沽貨離場既，睇見個市依家升左上黎，本來都話唔入，但隨後若個市再升，佢地因後悔，再口硬都身痕入番市，個升市暫時要告一段落。眼前亦有一班按「精制失修」講法既散戶，等28,000等得好心急。對大戶黎講，市場實在太美妙了！黎D時候唔派貨，等幾時呢？

筆者絕對相信所謂股神所講既：「唔好出出入入，好好咁持有D股票。」的確終有一日可以重見天日，只不過黎D「價值投資者」小不免多一個稱號，大閘蟹。

D人講D唔講D，巴菲特之所以可以長期持有，人地選股方面係要搵價值被低估既股份麻，然後又不斷研究業績麻。亞洲股神之所以可以長期持有，人地係用IPO價錢買入麻，人地掌握既市場消息多好多麻。5.00高追錦江酒店既人，畀心機「長期持有」至2010年世博後，然後幾得睇埋佢既業績喎 (錦江酒店(2006)，上日收市報3.23)。

大家記得早前野村給予港交所「強烈買入」評級嗎？筆者曾經短炒晶門科技(2878)，由2元水平炒至4元水平，當時野村證券給予晶門科技「強烈買入」評級，所定既合理價格離晒大譜，筆者唔記得係幾多了。今時今日晶門科技(2878)每股$0.69。筆者唔係話野村評邊個死邊個，只不過係畀個例子大家了解下，「長期持有」、「唔好出出入入」、「唔好估頂」係咩既一回事。

大市 ‧詳盡D - 美市

油價繼續大升，道指當睇唔到。

Countrywide蝕12億，但話下季會好D，然後下年重會虧轉盈，美國人就變得好forgiving，唔睇現狀，只信未 來。

次按唔影響唔到科技股係人都明既野，佢地咁出奇，咁大反應既？

Caterpillar預測未來唔方好，咩話，聽唔到呀，咩呀？

密歇根大學消費者信心指數可以除消唔好再浪費資源去做，個調查都冇用既。

減息就得啦，減完下個月咩信心都返黎啦。故 道指升，升134.78點。

筆者係阿伯既話，就會心想：「你班令美國蒙羞既人，都未減就炒到咁既樣，通漲、經濟，兩個只能救一個，就救通漲，經濟要承擔既，始終要承擔。」就爆個冷。

道指由高位14,279跌至低位13,337，共942點，如今回升至13,806，即回升共469點，只係跌幅既49.8%。未代表脫離險境。

其中有部份研究開美國股市既本地分析員認為美市已冇問題。

但事情係唔係可以響黎一刻定斷呢？次按影響更深既範籌，其實並未可以確定為無礙。房屋價格及消費意慾，比起明知死硬既金融股同明知唔關事既科技股，更值得市場關注同觀望。總之家下佢地就話知你，力sell個市冇事，叫投資者放心，非常好心地。

大市 ‧詳盡D - 陰謀論

市場出現好多件怪異既事：
一、港府買港交所買至浮面。為乜？其實乜野作為都冇。動機可疑。
二、提出「港股直通車」，又遲遲唔澄清。最奇既係阿華哥同大家講話：「就快喇」。
三、更奇既係華哥每日改入股港交所既理由，去到AH互換。
四、重奇既係趁十七大，阿屠生話AH互換。
五、重重奇既係，大行們咁橋係層生發言前，尾市入港股，夜晚大炒ADR。
六、重重重奇既係，又澄清冇咁既事。

先知先覺既市場人市擔心有人將要斷送香港作為最自由市場既美名。筆者亦認為之所以近人有人睇得過市咁鬼好，其實有人將成件事演變為政要要托市，要香港回歸十年後好好好，所以此輩個心好熊，就正如何生笑笑口話有國家照住。黎個想法，大家buy唔buy又係另一件事，但黎班人係存在既。

其中有一個現象亦非常值得大家關注，就係大小行聯動既現象。個市好似有個Leader帶住咁，非常奇怪。

資金其實狂谷緊新興市場，部份新興市場既貨幣升值驚人，對沖大鱷安排緊大餐，只係唔知佢地幾時開飯。

有關消息滿天非，但港府唔出黎正一正視聽，亦非常有問題。所謂股神，未經時間考驗，對全球經濟未必清楚，卻一次又一次預測點數，越做越過火。幾時有聽見巴菲特出黎大叫道指14,000！言論自由歸言論自由，但咁既社會狀況，好有問題，好值得有關方面關注。政府唔出黎正一正視聽係基於咩原呢？

大市 ‧詳盡D - 市況

雖然黃師傅唱好，但係筆者硬係覺得有D反常，舊讀者可能都有D印象，畀著佢以前，佢都會提都提出大市出現了「參差見頂」既利淡現象 (見 近日大市的一些技術形態)。不過又以筆者多年黎聽佢講野，相信阿師傅黎期唔見死亡交差 (如10天線穿20天線) 都唔會話利淡，但如今10天線、20天線及50天線排列非常靚仔而且相隔甚遠，佢應該會幾放心。

佢 同時亦提出今日既升勢唔係好似之前咁靠造消息，而係上左自動波。但筆者了解其實市場黎兩日都有長篇故仔傳緊，星期四先傳港元有機會與美元脫鉤，轉為與人民幣掛鉤，而人民幣升 值會令港股資產升值。星期五傳個長篇D既，有大鱷想好似當年咁炒高港元連同股票，亦有意沖擊港元，令港匯兩度升至限定水平，加上美元減硬息，進一步拖慮港 元，有必要與美元脫鉤。週未繼續唔停，傳埋任總退休，然後讓大家發揮聯想：「即係佢堅持已久既美元掛鉤政策有機會轉變」。個理由對明智既投資者幾唔合理都好，個市照去，一線地產股先被炒起，然後輪到二線地產股。唔搵藉口就係假既。

分析員熊心壯志。「精制失修」「隨機」地搵黎10位「專家」，咁橋佢地都係睇好既。睇得最好係40,000，睇得普通果個係睇31,000 (差果些少)，平均睇35,000點。最神奇係提到入市位，佢地大致認為係27,000至28,000點撈底。咁即係點呢？佢地講緊既目標係幾時達到呢？係唔係一口氣到，定係中間會發幾大既調整呢？講得唔清唔楚。咁樣筆者預測埋一份，恆指可升至60,000點。至於黎期「精制失修」非常有「收藏價值」，故筆者高追了一本。

大市升，但好多股都冇去番之前既高位。例如點都叫做試個20蚊既中石油。要邁向101既中國神華。個市升，但跟唔到題目既投資者就得個吉。大市一個一個環節咁炒，入得快時，出得亦快。有人將股市比喻作賭場，筆者認為唔係咁貼切，因為例如對巴菲特黎講佢係投資緊公司。個市其實係部份時間會演變為賭場，家下，肯定係，而且重滿場老千。

大市 ‧詳盡D

今次真係一個好好既修行機會。個市咁複雜，嘗試重多方面睇得深入D。「大市‧詳盡D」將會張內容分類，免得大家睇到頭暈。

黃師傅話

聽下其他人點講。

黃師傅今日話：「唔好因為恆指兩度高位被沽落就認為大市無力衝破30,000點，市唔係咁睇。其實每次回落既腳都越黎越縮。星期一好友放淡友，淡友係威係勢咁，其實好友消耗緊淡友既力。明顯淡友已經冇晒力，故好友今日一推而上，30,000點能夠企穩。後市可能會再跌穿30,000點，但29,800有支持。」

閉門造市

連美國投資者都癲埋。

用個咁既消息 (傳話減貼現率) 可以抵消晒所有既不利事實，美股昨日當冇事發生過。股神話次按重有排攪，商品大王要沽清美元資產。美國二手樓價自大蕭條首次下跌，都唔驚。更加唔驚今日新屋數字。只要想起減息，美國人訓著都會笑。就好似發覺冬天越黎越暖而興高采烈咁。美國人都唔會驚，香港直情想唔起有第二個國家既存在，閉門造市！

今晚美國有咁重要既消息公佈，以往港股一定坐定定，觀望埋先算。以前國家一提下宏控，港股就大反應，家下，A股大跌都唔多掛我地事。市場人仕既情緒實在令人廢解。

筆者抵打！

筆者近日不停聽不同分析員講解其對大市既睇法。好些分析員講類似以下既說話：「圖表派近日跌晒眼鏡，圖既走勢非常難睇。」筆者一方面聽入耳，一方面懶，故只花時間研究基本因素，居然冇拎過幅圖黎自己研究下。作為信圖者，筆者十分抵打。

由於市場上實在太多意見，筆者頭都暈，昨晚才想起：「不如都係睇下幅圖有咩啟示。」一研究就研天光。好耐都冇出過既「圖表分析實戰」，終於再次同大家見面。

最簡單一望10天、20天及50天線井井有條，走勢有幾難睇呢？然後見[1]，RSI(14)響十月份一直出現背馳既情況，的確唔係咁好，但用RSI背馳黎測市，唔係好有效，要配合指數跌穿20天線方可確認為利淡，但係到時又太遲啦。D分析員不學無術，講D唔講D，好多時誤用RSI，誤導人。背馳睇MACD會更可靠，見MACD(12,26)(紅線)於十月份始，係一個頂高於一個頂，並冇出現背馳。但某些分析員早於一星期前已經話：「圖既走勢好難睇，但係大市仍然大升。」家下睇番幅圖，上星期更加唔應該話走勢難睇，豈有此理！非常可惡，更可惡既係筆者自己，聽左就當係！你話抵唔抵打丫。

十月份MACD並冇出現背馳，但卻出現「熊差離」(見[5])，第一個Alert出現了，要開始步步為營。其實直至昨日才出現第一個「預沽訊號」：「牛熊沽貨訊號」(見[4])。 黎個係MACD既初次警示訊號，並未確認為利淡，響黎個位沽出有機會反應過快(見圖MACD於五月期間出現了長時間糾纏)，甚至會有轉向既機會。見到黎個訊號，視乎市況及經驗，才考慮沽出。響黎個時候決定減持係良策，到正式要全面沽貨，MACD會出另一個訊號，就係筆者約一年前解釋過既「MACD由正變負」。

至於從DMI圖睇，上星期四才出現第一個Alert，確認了趨先線ADX升穿+DI(有人稱+DM或DMI+)。應開始注意走勢，正式危險訊號係隨著+DI及-DI距離拉近，出現交差為利淡。

小總結：即係話以圖黎睇，筆者上兩星期就開始續步減持，其實係早左。早左已係不變既事實，錯有錯著，睇見今日江銅既表現就慶幸早走。現下未知MACD重可以糾纏幾耐，+DI同-DI尚有距離，超利淡既訊號其實圖上未出。不過等埋確認利淡訊號，有辣有唔辣，可能會錯過小許升幅，亦有可能遲左而蝕多些少。筆者都唔太後悔早走左，只怪自己居然冇去仔細研究過圖先至行動。市場上既分析員，睇錯市，唔係罪，但係對圖表既認識只係比散戶強少許，然後發表偉論，係可恥！(講開又講，有位人稱X Sir既，乜鬼野都叫圓底、圓頂，係唔係都畫個孤出黎，真係直都變孿，筆者難以理解。)

順便回顧一下，響7月尾MACD圖出現第一個Alert，「預沽訊號」，即「牛熊沽貨訊號」(見[2])。隨即出現跌勢，到8月頭出現MACD正變負，隨後跌得更慘！冇耐，至8月中後期，出現第一個Alert，但係今次係好野，調轉黎講係「預買」訊號 (見[3])。然後唔夠幾個交易日就出現埋MACD負變正既確認利好訊號，之後大市就飛昇！圖表厲害之處由此可見。只因不學無術財經分析員將咁好既野活埋，將事實扭曲，令人誤解圖表係冇用。

唔怕你話筆者煩，筆者再重申：大行出口術，消息唔可信，圖表係誠誠實實地將交易記錄，作出分析。雖存在有心人可以做走勢陷阱，但點都有個譜，只要豐富自己既技術同經驗，不忘以基本分析配合，就可以睇穿，可以避過。圖表分析係無往而不利既工具！升萬唔好是旦跟人講圖表係騙人。

維持看淡，將要完成第三步減持

很多人嚷著：「大量資金流入，睇港匯就知啦！」

但筆者問，果D錢流左去邊呢？點解同業拆息反而下跌，點解大市成交反而下跌呢？

大市今日升番1,003點，部份分析員非常得戚。但始終無改筆者想法。對筆者黎講今日係基於散戶吸納有功，當然大戶都有加番些少注黎推波助瀾。

淡友忍到今日都未出過手... 佢地傻左？唔見左？定係打緊D咩算盤呢？

即月期指今日成交張數70,864，照好友及分析員們既睇法，邊D傻佬重走去同好友對賭呢？而且整日處於低水，收市後半個鐘才炒至高水105點。

家下個市非常耐人尋味。

上次ADR果野發生得太短暫，沽唔夠貨，聽日應該可以完成埋第三步減持。筆者提過，黎D市況，升市、創新高先沽貨。而且即使睇淡，但都唔應該做淡住，即Put輪、沽期指、或沽空等。

進一步看淡大市

冇錯，今日升唔少。好多人認為筆者睇錯市，但筆者今日看得更淡，相信好友們更認定筆者係因為放左貨，所以有偏見。

一切依然配合「似樣調整」。筆者解釋過「似樣」，重點唔係「幅度」，係「參與度」(或滲透度)。年內出現過所謂「大調整」，筆者都冇叫過佢地做「似樣調整」。一下跌咁深，係用猛火燒，引發恐慌性拋售，係震平貨。「似樣調整」係用文火，令人覺得個市好安全，好舒服。

噙日裂口低開，D人反而急急撲入去吸貨，今日就非常得戚，身邊既人知道，之前堅持唔入既人動搖，以為執輸，今日拿拿聲入貨。日後續少續少跌，佢地就越黎越唔份氣，唔走不特止，再溝貨，總唔信中國強勢底下會輸。四叔、分析員引用巴菲特投資法門，「教」投資者唔好走黎走去。能夠堅持，筆者相信，即使遇上大跌市，總能重見天日，問題係當投資氣紛變壞，大行、大戶出口術時，又有幾多散戶頂得住呢？

「似樣調整」係「陰乾跌市」。陰D陰D咁，資產、財富慢慢被蒸發走。黎個先係「似樣調整」恐佈之處。「猛火調整」，期間冇乜新血加入蝕錢行列；「文火調整」，期間不斷有新血加入蝕錢。「猛火調整」，期間唔多有大升。「文火調整」，升下跌下，一浪頂低過一浪頂，一浪底低過一浪底。

對睇好市況既人，筆者講野非常唔o岩聽。都係摩通唱好大市好。還有，「日圓回弱番啦，美國就黎又要減息啦」，大家都好樂觀。日本面對多年來未出現過既通漲，加唔加息好呢？美國面對多年未出現過既房地產市場下滑，經濟衰退難救，如果出現埋通漲，美國會前所未有咁大鑊，重減唔減息好呢？

逢低吸納訓練獲得空前成功！

今晨恆指低開1,000點，散戶搏命入貨，驚死入唔切。

馬可孛羅投資集團投資總盡尹滿華今晨接受訪問時表示，認為港股要調整一千點，即係今朝已經調整完畢。佢非常睇好後市，認為是次調整乃入貨時機。對美股睇法亦正面。

黃雀在後

大行聯盟衰左，佢地一齊以為預知先機，第二日屠生講野，港股雖升但跟唔足，ADR受壓後略為反彈，然後第二日中證監澄清，ADR再跌。以下是ADR既局面：
中石油兩日共跌11.65%，炒起前USD230.20，炒起至USD263.70，現為USD232.98，每股約HKD18.06
中石化兩日共跌13.48%，炒起前USD153.93，炒起至USD178.83，現為USD154.73，每股約HKD11.99
中人壽兩日共跌9.56%，炒起前USD95.09，炒起至USD106.56，現為USD96.54，相等於約HKD49.88
中移動兩日共跌8.48%，炒起前USD20.19，炒起至USD21.82，現為USD19.97，相等於約HKD90.55
中鋁兩日共跌10.82%，炒起前USD77.63，炒起至USD88.05，現為USD78.52，相等於約HKD24.34

大行果然蝕次按蝕懵左。

分析員都重樂觀，預計大市要再戰30,000點，話好友要挾死淡友方休。其中「精制失修」更以「戰30,000點」作大字標題。作為分析員即使睇好，咁既市況照計應該講下D模棱兩可既說話，咁先可以「進可認屎，退可認屁」。但係佢地居然選擇話個市要再戰30,000，壯態甚勇。對筆者而言，凶兆也！

筆者所預期之「似樣調整」會有一種徵狀係：初跌時會出現小數強勢重磅股，佢地將會以基本因素特優既姿態壓倒性逆市上升。其後(一兩日後)好快就加入跌勢，所跌之程度亦會追番晒。且看大市發展落去會唔會有咁既情形。

大行聯盟搏大霧未見成效

大行次按蝕錢蝕懵左，搏大霧未有成效。

君不知港府討論九巴加價方案需要研究半年。咁大件事，涉及兩地，你估要研究幾耐呢？

筆者於以往文章提過以ADR價格作分析，預測港股，屬酒樓分析。有朋友問我可解，今日係一個好例子。

半日收市已有一千億，其實黎黎黎去都係拎住個幾隻股黎作風作浪，且看下午市中段會唔會出 plan C，臨尾插番鑊。

計劃依然冇變

人要知足，多謝屠生給予小弟一個更高既價位放貨。

大行勢凶夾狼

噢，怪不得昨日尾市，尤其最後果10幾分鐘，各大行買盤非常積極。原來跟住將中石油、中移動、中人壽及中鋁等既ADR炒起晒，而且幅度離晒譜。今日各股都將會高開，佢地既居心好明顯。睇黎大行唔係收到料，就係快快趣趣響港股造多幾轉。咁樣叫唔叫玩起港股呢？

中石油ADR升14.55%，中石化ADR升16.18%，中人壽ADR升12.06%，中移動ADR升9.7%，中鋁ADR升13.42%。

係國家外匯投資基金透過ADR入股呢？
又或者係基金重新部署，由印度轉移過黎港股？
最怕係大行大聯盟一齊玩起港股？咁恐佈？

再談大市暗湧

筆者要接5:30機，見訓唔著，寫下野先...

其實大部份人覺得個市幾樂觀，就算唔睇大升，都冇乜話要唱到個市好淡，但筆者近日卻擔心得更緊要，同大家再深入D傾下。

市場超唔理性
市場既唔理性已經去到極點。所謂升市既頂點會見到D人，壞消息都當好消息，至少，咩壞消息都消化得好快，然後就當冇事發生。咁唔係正正係依家既市況嗎？唔知大家記唔記得上年十二月泰銖被谷至九年高位，泰央出招要扣起外匯三成，引致亞洲股市應聽而跌，港股當期時下跌幅度雖不大，但市場持觀望態度，而且當時利淡消息四起，咁係好正常。但今日同樣，印度亦被對沖基金嚇親，又要出招，引致印度股市跌停版，亦引起整個亞太區股市應聽而下，唯獨香港冇事，值得高興嗎？

美國都發癲
歷來油價高企對美國股市影響非常大，但係近黎油價咁升法，美股好似冇野咁，憑乜野，今時今日美國種種隱憂浮面，但係重硬過油價升70？美國人都發埋癲。按伯南克既演說，美國真係要付出次按問題既代價，經濟增長要放緩，亦暗示要救市。但係有美國投資者話：「好野，即係減硬息啦！」癲左。經濟增長要放緩，今日公佈新屋動工數據創14年新低，嘩起初重升成80幾點，癲到頂點。最令人擔心既係一切都唔多掂，但係通漲壓力仍在，以減息救市，又進一步深化通漲，死過喎。唔緊要，最緊要個市有得升，死未！

港股已到超然境界
向來同港股關係甚切既外圍表現差勁：日經今日跌1.07%、南韓首爾綜合指數跌超過1%、上海A股跌0.92%、深圳A股跌0.50%及美股跌穿14,000點水平。但係港股完全免疫，勁到唔識講，該飲得杯落嗎？

睇真D幅圖
自大市向上突破28,000點向30,000點進發後，沽壓大果D日子成交不斷增加 (綠箭咀示) ，反之大升果幾日，成交不斷減少 (紅箭咀示)。你話冇暗湧，真係要指教一下筆者。坊間分析員，有冇發現到呢，定係當見唔到呢？

個市重可以玩多幾多轉，筆者無法猜測，筆者情願錯過所謂機會。見到有鯊魚出沒，筆者怕死唔落水，要安安樂樂咁過活。可以游水既日子日後大把。

第二部減持已完成

筆者已於今日進行第二部減持，持股量創近三年新低，只得50%持貨。餘下既，都係長線安樂持有，如匯豐、玖龍紙業、建設銀行、地鐵公司等，一些長線警惕持有既，銀河娛樂、澳門實德、和黃及大眾等。繼續煲下既有中人壽、中海石油化學、中石油、馬鋼、湖南有色、紫金等。

今日大市倒升，no surprise啦，趁低吸納麻。眼前唔係冇利好因素既，有人睇G7會議之後，美元重拾弱勢。有人睇好內銀，有人因加息睇好人壽。有人根據伯南克演講，認為美國會再減息救市。昨日跌市有個講法係一到近30,000點觸發了程式沽盤，所以跌得咁急。至於今日升市，有人認為係印度市場既資金過左黎香港。黎一切都未改筆者既憂慮。還是要準備進行第三步減持，至25%-20%持貨量，這便完成所有減持行動。

計劃趁人趁低吸納令股價反彈時走貨...

個市，筆者唔玩了‧解畫

今日果然如筆者10月4日所講咁發生 (見夠了，唔走了)，作狀要升上30,000點，但未到就撻鑊金。

今日正進行突然大跌既時候，就響果15分鐘入面，亦正正係日圓升既時候，咁樣係唔係巧合呢？對筆者黎講唔係，上文都早就同大家分享過美元兌日圓同港股幾乎同步。

今日最令筆者怕既係有部份分析員唔擔心，提出黎個情況響上次衝29,000，有所謂「單日轉向」時一樣，結果大市再創新高，所以叫投資者唔使驚。依筆者經驗，一有黎D咁既現象，往往會出大事。

國家外匯投資基金表示並未投資香港。行長話「直通車」唔o岩聽，係允許國內人投資到海外，咁，其實即係QDII... 港股有今日升幅，係謠言滿天飛所致。

「最後大升」隨之而黎既「似樣調整」，筆者冇乜點解釋過「似樣調整」係D咩，皆因之前唔成形。所謂「似樣」，唔單係幅度，重點係參與度。筆者估計近黎應該有足夠人受到「逢低吸納訓練」。當跌市開始時，每逢去到關鍵支持位，都會接貨。其實係派貨。當大家以為個市又頂得下既時候，再破位向下。由於大家習慣恆指不死，都唔捨得沽番出黎。然後又落到下一個支持位，然後又有人吸納，然後又以為冇事，點知又破下一個位，更加唔捨得沽。直到一個又一個希望都幻滅時，心碎沽貨，就響黎個時候沽干沽淨，跌市才完結。對筆者黎講，黎D先至係調整。黎D先係筆者最驚既跌市。但願筆者睇錯，今次唔會咁發生。

即使唔發生都好，加上G7會議在即，十七大就完，永遠當美國股市同經濟冇到係唔可能，而美市一D都唔樂觀。

個市令我好唔舒服，我想早D走。

個市，筆者唔玩了

出左聲明先，之後再解畫。

今日焦點‧2007年10月15日

當一眾分析員拗底既時候...

12:40:47 p.m. 林學炯：
「...估計在28800至29000點整固，若大市守穩27500點，料短期上試30000點。入市策略可待大市回落至28400點，造中線好倉，上望目標30000點，止蝕位28000點。」

08:46:35 a.m. 彭 偉新：
「...預期恆指開市時會上升200 多點，令恆指升上29,000點水平。不過，指數未必可以即時企穩在該水平之上，預期恆指全日會在28,700-29,100點之間波動。」

10:51:39 a.m. 陳蓓敏：
「指早段承接外圍走勢，但恆指下午有機會回軟，過往賣地，早上大市表現較佳，下午回軟，為上落市波幅。預計恆指短期上落波幅為28800-29200。」

老曹話「有智慧，不如趁勢」，其中一個觀點認為所謂智慧，例如睇圖表，係睇唔出沙士期間應該全面入市，佢話：「趨勢才係你最好朋友。」筆者十分專重佢老人家，但係黎番說話筆者唔明亦唔多認同，即使靠睇趨勢，都唔會係沙士期間全面入市架？圖表幾時都要配合其他野一齊考慮，黎個筆者一開黎個網誌已經成日講。響沙士期間決定入市，都要搵個位入，圖表係黎個時候就如虎添翼。就以今次為例，雙日轉向畀出左一個啟示，當時唔知點解，家下馬後炮可以解釋番轉頭，但係都遲啦。對冇消息響手既人黎講，圖表走在理由之前。當然永遠唔會有十足把握，個走勢啟示只係令投資者確認個市偏向某個可能性有幾高，可以係睇錯，可以有其他surprise，但係加埋所謂「投資策略」既話，就冇有怕。

對筆者黎講，趁勢，最好係趨勢加走勢。

利差交易影響大市深遠，下圖係近一年恆指走勢泊埋美元兌日圓既走勢(藍線為恆指、紅線為日圓匯價)，應該畀到大家一D啟示：


密切留意G7會議將於10月19日召開，介時有機會出現支持美元反彈既議案，若果係咁，超敏感既熱錢會走得好急。而中共十七大亦將於10月21日閉幕。到時淡友可能搵到藉口推低股市。

最後，今日財經報道都話：「受賣地成績理想所帶動，恆指升700多點。」I don't get it.

上週大市回顧

星期一，恆指開市28,233，十分鐘內稍為推高至28,482，之後一直牛皮，一到中午，沽壓便來，將恆指推低至27,770。各大財經新聞稱當日為單日轉向。事實上恆指前星期，十月五日，收市為27,831，即星期一抽高402點黎開市，然後掟463點，期間向上時間得果數分鐘，明顯係吊高黎掟。叫佢做單日轉向係好勉強，字面上係o岩，但係形態上不值一提。你話先升後跌冇問題，但係提出單日轉向，以恆指走勢黎講係「頂部單日轉向」，圖表形態上係非常之利淡，理應離場。亂咁提出黎個term，非常唔專業！

星期二，恆指以接近星期一收市位開市，然後午後幾乎一直上揚至接近星期一之開市位，簡化黎睇兩日夾埋造成一個V字，此乃雙日轉向。美中不足既係星期二成交唔及星期一，所以效力上要扣分。之後星期三、四、五既走勢與之相乎。

上星期開市前，某台之星期日財經節目中，名為開市攻略之環節，找來平和國際董事，郭思治。佢認為在資金主導之下，大市應向上，恆指若然升穿28871，將要向30,700至30,900點進發。個人唔評論郭先生之睇法，只係睇唔過眼，該台之財經新聞，常常帶有本身立場，誤導觀眾。每週提供一個人既意見，有何代表性呢？只會對某些散戶帶來誤解。其中離譜既係佢地不時選擇性地抽出某散戶發表其見解，咁樣黎誤導觀眾對現時市況既睇法。上年後半至今年初不時令人產生散戶入市，市場失理性等疑惑。大跌市時問某阿叔，咁緊係話你知佢好驚啦；大升市又黎問某某，咁緊係有時有D人熊心壯志，有時有D又會話畏高，就算唔對觀眾構成誤導，都其實係一D毫無價值、毫無代表性既報導，咁樣有時有偏有倚、有時隨機充塞時間既報導，質素幾低，留待大家評論。又舉，曾經找黎分析員是旦教觀眾睇圖，畫條上升軌，然後話維持係其上就繼續持貨，跌穿就止賺，就咁講下算數，分分鐘害死人。又有好多題目，鐘意就講D，冇連貫性，咁既節目，筆者認為不看也罷！如當中有某台之員工或Fans，得罪之處，請多多包涵。

大市要令睇淡既人越黎越疑惑，要未敢入市既散戶不斷後悔，逢低必吸之訓練進行得如火如荼。某些分析員因資金不斷流入而睇好係冇錯，但係資金一走，對沖大戶一動，一發不可收拾。大量資金繼續源於美元兌日圓之弱勢帶黎既利差交易。利差交易一直都有，現時最大唔同既係，資金買緊既都係貴野，匯價一旦稍有變動，資金既反應會又快又大，黎個亦係大市極為波動同危險既主因。請大家賺錢之餘，切莫樂極生悲。筆者則暫望黎緊再上高位進行第二步減持。

大市一句 ‧2007年10月9日

昨日有財經報道指昨日港股出現單日轉向，這個筆者不太認同，但眼前就出現了利好的「雙日轉向」。(留意其效力又遠不及底部雙日轉向。)

其他慢慢再講...

大市還要升，大禍還在即

上星期大市與筆者所推測既非常吻合。星期三，對筆者而言，乃部份自由行聰明錢提早離場所致。星期三收市後，期指再拖低水約200點子，星期四一開市就繼續低走。於收市後，期指轉為高水，當日大市中段亦已有趁低吸納盤出現。星期五如星期四期指收市所啟示，大市高開，整日之升勢通行無阻，淡友完全冇插過手。今次果然唔係「真正跌」！「趁低吸納」活動亦明顯出現，下午市更見驚死吸唔切之清況。完全唔將當晚即將公佈之美國非農業新增職位放在眼內，只看「黃金週假後例升」。

筆者自16,000點水平時開始寫這個網誌，期間風吹草動也好，從未有過今時今日既不安。

不安一：市場太樂觀
大多數分析員非常樂觀既原因不離兩個：資金充裕(今次大升有大成交支持，所以升勢冇咁快完)、港股直通車。唔樂觀既分析員係佔少數，筆者所知既有黃溢華、陳炳強、熊麗萍等。響恆指18,000點時話港股貴、炒過龍果D人，居然又唔覺得依家係過龍、依家係貴！？30,000點似乎志在必得，係人都有信心個市升硬咁，小數人係睇淡，鬼咩，黎D人九成九係冇貨響手果隻麻。之前果10,000點升幅裏，不時都聽到D人講散戶大舉入市，牛市尾聲，但回顧番過往，筆者一直都同大家話散戶並冇大舉入市，好多人當時既講法係言之過早。但今時今日呢？點解提出黎個論點既人反而少左既呢？

不安二：大行解畫
響大市突然急瀉時，大行突然都好多野講，又調高黎樣果樣，睇好黎樣果樣。真係同大家「有錢齊齊搵」？

不安三：消息亂舞，自相予盾
舉個例，以下係一連寸筆者越聽越唔明、來自不同分析員既說話：
A)消息傳國內停止AH股同步上市，必須先A後H，理由多多，其中資料非常詳盡。
B)港交所發言人卻稱此乃市場測
C)湖南有色停牌有人話因為要發A股
D)又有人反駁話中央規定先A後H，湖南有色回歸A股無望
乜回歸A股要停牌既咩？我唔見近期建行同神華有停到喎。

不安四：個市好似有魔力咁
此乃筆者個人既直覺，個市誘惑咁大，多數唔妥。

以策略應市
個市要再升，筆者會進一步響下一個高位中減持。上個星期筆者都估唔到自己出入市既時間會準確到咁，黎個純屬彩數，不過證明筆者既策略奏效。股市投資之道在於控制風險。其中一個最有效既方法係持股量。越接近高位，其實危險度越高，以持股量管理風險即係越近高位就應該係越少貨。反而市場極端悲觀時，應該越黎越多貨。黎樣野有人講得易，但執行時舉步難行，皆因做起上黎係要反其心理而行。市場其實依家淨番D咩？美市無定向咁行，捉唔到路，唔減息又死，減息其實又死。美元持續弱勢，日元既弱勢呢？得咩呢？講黎講去得港股直通車，黎個憧境係唔係未炒先，又唔係喎，著左幾千點已經炒左落黎個既念度。重留響個市，係想炒到盡，想摸頂。摸頂冇罪，但係唔知自己冒緊D咩險就係對唔住自己辛苦得黎既血汗錢。筆者再重申，唔敢低估個升勢，亦相信前面大禍臨頭；講白D，既唔想冒險，又唔捨得個賺錢機會，所以要以策略應市。

最後，筆者講既種種跡象，如「認為進入大調整既分析員衰左」、「淡友先行讓路」、「趁低吸納演習」同「滿街投資高手」(今個星期會陸續誕生) 都一一呈現。如果今番冇咩意外發生，例如好似之前爆左個次按問題，日圓加息之類，令散戶顧慮既問題，令散戶股癢難擋既「最後大升」今次似乎成功在望。

夠了，唔走了

講清楚個標題意思先，唔係話個市已經跌完，筆者既「續步減持」暫時停一停。

家下唔係熊市，唔係個市出左不利因素，係黎個情況底下，筆者唔會跟大隊沽售股票。咁既市況，係升市見頂之前沽，係先發制人，係明智；見市掉頭就沽，係後知後覺，係衝動多。筆者昨日走運，一講就即中，成功離場。不過筆者唔係乜都走，亦唔係全數走晒，而筆者亦唔係預期一講就中。筆者既策略係：假若個市今日續升，筆者會再進一步減持；假若個市開始向下就會停沽。如今，個市自昨日已經開始下跌，筆者按計劃停沽，家下已有資金，等低位再吸貨，再同大家衝過29,000。

今次唔係「真正跌」，堅野下一步先黎。今次係要train大家響低位吸納，然後個市會再升，個個都滿手盈利，然後個個都睇市好準，滿街投資高手，皆大歡喜，好野！

市場分析員大都認為唔使驚，睇好後市，要再戰30,000點，之後個市會回升，佢地會以為自己睇中 (但其實有機會中計，係稍創新高後，接近30,000點時先撻鑊金，不過當然依家講就言之過早，要睇個市既發展)。有少部份分析員覺得升勢已完，分分鐘進入大調整，佢地將會睇錯，下次唔敢好有信心咁講大調整在即。做市淡友之大計唔係今番咁跌下就算，好戲在後頭。

夠了，走了

以家下恆指既 acceleration，再去既話，恆指要報：∞

恆指上望30,000點好未？重有1,500點升幅。若然真係升到30,000點，跟住既調整會有幾多呢？3,000點都唔係過份，唔難想像 (最近個裂口都響26,000點水平)，即係用起碼3,000點搏1,500點？冇理由咁做丫。

今日成交好有機會去到2,000億，黎個對筆者黎講係見頂訊號(要強調係對筆者黎講)。加上匯控都行埋，對筆者黎講，亦係收工訊號。

家下要人同你接火棒，唔係抽高，而係等人「趁低吸納」。

「自由行資金」既聰明錢該會提早收工，淨低既瘋狂錢會點樣炒得起個市，筆者唔知，但係唔會參與，因為筆者唔鐘意持股有壓力。

重有眼前太多唔明朗因素，可以令個市再大升既理由有，大跌既都有。筆者持股信心大減。

基於種種原因，筆者認為係時候續步減持...

D財經分析員會講「升市莫估頂」，「市場資金充裕」，筆者唔敢阻人發達。又正如老曹話齋，你以為去到22樓已到頂，但係層樓其實有88層。

反過黎諗，你以為22樓未到頂，點知層樓其實得20層，你係響天台跳彈床，彈到兩層樓高，落得番天台已沫一額汗，唔好彩跌落街點算呢？唔係話老曹講錯，而係黎類理論Practise起上黎，其實叫人無所適從。以藍籌股黎講，係真係冇頂，自有股票市場以黎，指數係不斷創新高，但係咁代唔代表永遠唔放手上既股票呢？

大市 ‧ 2007年9月26日

自筆者上一次港股下調時，同大家指出會見底起，大市幾乎升唔停，期間筆者有機會就叫大家有正貨就繼續煲，做淡就點都唔應該。結果至今如果堅持既話就和味了。

大市升到家下真係差唔多架啦。筆者認為要去到盡既，可以繼續煲手上正貨，估計大市重可以顛到去黃金週，「資金自由行」。期指淡友早就放棄今個月轉落下月反咬好友一口。十月初步，淡友應該會先行讓路，大方地等大家再行炒到不易樂乎，然後佢地先至正式上場做世界，所以十月份有危險，都係小心D好。

大市 ‧ 2007年帟9月18日

大市這兩日表現正路，筆者放心好多。之前市場人士一面倒認為聯儲局要減息，先叫人擔憂。而筆者之前擔心減息引發美元弱勢，繼而引發日圓拆倉潮，亦多得日本經濟衰退比預期嚴重同埋安培辭職，已經唔成問題了。今晚係「阿伯」上任以來最重頭既show，可以睇真佢既功力。

科爾街日報 ‧ Fall Street Journal (一)

筆者忙到死，但不吐不快！

花旗將港交所降級為沽售，還道要向港交所自主權Say goodbye。這邊箱，David Webb亦批評政府入市干預。

5%能夠如何左右港交所去向呢，港府會增持至3成嗎？而港交所是由誰去領導，是否需要透過入市來干預呢？那些說港交所之前股價包含有「被外資收購」之憧境，有電盈作為例子，又會有誰相信呢？那些發表偉論既人，居心何在呢？

今日加拿大公告其有關中國玩具品質之研究，美國回收之玩具中，有八成是本身設計出了問題，只有一成多是顏料出了問題。明顯美商以個別例子為藉口乘機回收其他有問題之產品。夠膽死收多咁多番黎，亦狼亦狗。美國人狗起上黎，Bush Demo過唔少。花旗唱淡港交所有咩目的，只怕比想象中更多。

至於「網哥」黎期鐘意攪攪陣，又叫大家唔好支持今次兩鐵合併。黎位大師，筆者早於上年佢送所謂「聖誕禮物」時提醒過大家，唔知大家記唔記得呢？ (見David Webb 的聖誕禮物 與 筆者的聖誕禮物及大師即係大師pan>，「網哥」係得既！)

今日睇番順龍控股 (0361)既股價，果然冇令筆者失望，跌到得番0.79。當日佢話送大家「聖誕禮物」(一程) 既時候，該股股價由0.87裂口升至1.00，最高去過1.24。當日及其後兩日成交亦是有史以來最高，派完貨就係咁先，股價未好過，成交亦小都暈。黎個人係咩人格，由大家自己評估。

「網哥」講既說話亦非常矛盾，一方面講到黎次港交所唔得掂咁，但一方面佢自己又引證番港府如果為左與內地交易所合併，若然有利既話，股東都會讚成，無需入股港交所；又話港府入個5% 冇作用；又話所有港交所之收購，超過5%都要通過證監會批准，政府無需以入市阻止交港所遭外資收購。咁即係點先？即係佢都明知港府唔係為干預D咩而入港交所股份，佢響度講乜野呀？最「在九之上」既係佢話政府應該將果100億，分十年還富於民。即係如果今年實行，全港市民首年大約可獲港幣200大元。「網哥」，你要繼續生存啊！

大市 ‧ 2007年9月6日

上週之島形底效力已確定 (留意當其時淡友造唔成個島形頂，卻反被好友造左個島形底，是次角力驚險非常)。淡友再度被困於23,110至23,304區間。

昨日窩輪流入資金最多者，恆指沽也，大部份散戶 唔/唔敢 睇好。筆者唔好意思唱好，但要講：「做淡不宜、持正貨者可以繼續煲」。

大市 ‧ 2007年8月23日

大戶力量不小，雖然有難度，但島形底勉強做到。星期一力守20,901之上，維持了20,841至20,901之裂口。效力唔算話太大(幅度小和淡友人數低)，但暫時淡友被困已成事實。

大市恢復得咁快，皆因之前大升市未玩完，(即「最後大升」)，因如911般突發之危機，阻住大戶門發達大計。大戶門唔賺鑊金，都至少要減少損傷離場，大市即使去到23,000，大戶門都未有斬鑊。至於加入了種種不明朗因素後，大戶門有咩打算就要睇定些少，因為家下升市未必係佢地想再炒上，分分鐘係八月期指埋單走人。總之，之前所謂「最後大升」格局已被破壞，且看進一步發展。

之於市面上大多分析員的種種廢話、認屎認屁同馬後炮，聽少D耳根清靜。甚麼ADR影響港股會高開的酒樓分析，教壞人。回顧番星期一港股有否跟足ADR就知，然後當晚歐洲時段，港股怎樣回番轉頭就明白。再想深一層，背後有甚麼藉口，賣甚麼藥，就更明白整件事唔可以咁易下定論。

還有市場認為美國聯儲局非減息不可，筆者卻認為機會並非如預期般大。就算美國減息，香港亦多數唔跟。因為減息期望而炒地產股既人要三思。

市場鬆一口氣，就要多兩錢肉緊留意市況。

童話股市

「橫掂都係」既250天線試穿，引出最後一批未能堅持既散戶，以超平價沽出質優股，(如建設銀行)，大市已見底，塵埃已落定。

看大戶如何部處，且看能否做出一個島型底，有點難度。

幾乎所有分析員都認為大市未有咁快回氣，眼前有多個阻力位，料大市起碼要牛皮好一段日子
(如上一次日圓拆倉潮，大市牛皮了兩個月）。不過筆者卻認為大市回氣會比想象中快好多。

星期五既市況正好刻畫了為何散戶總係蝕錢，大戶最終都賺大錢。

最後筆者手痕，改首歌送比各位．．．

＊＊＊＊＊＊＊＊＊＊＊＊＊＊＊＊＊

童話股市
ShownShown 詞

忘了有多久
再沒聽到你
對我說你最愛的股市
我想了很久
我開始慌了
是不是你又做錯了甚麼

你哭著對我說
分析員都是騙人的
他們可都是說說而已
你說你攪不懂
無論你Call put以後
你的Profo全都是紅的
(國內同胞：「你的Profo全都是綠的」)

我願你在童話裏
你愛的那個輪商
張開雙手變成翅膀守護你
但是現實
現實我們在這動盪股市裏
辛苦和快落是結局

我願你在童話裏
你愛的那分析員
打開錢包拿出錢來回補你
你要知道
如果他們全都那麼了不起
世界上貧富不懸殊

我願你在現實裏
投在實力企業裏
專注業績不管市場的藉口
你要相信
相信巴菲特的一生投資裏
幸福和愉快是結局

一起寫我們的結局

＊＊＊＊＊＊＊＊＊＊＊＊＊＊＊＊＊

見底

250天線於19,832，黎個「橫掂都係」既底見左，後市該「塵埃落定」。

見底喇

今日做番個陽鎚頭咪好o羅

大市一句

中短線執貨良機也。

最後大升上晒軌道

大市升時一眾財經分析員叫大家升市莫估頂，大市稍回時，又說近日成交量過升億，大市未玩完...

結果7月27日星期五跌成六百幾點。然後一眾財經分析員又話大市冇動力，結果上星期一、二大市大幅反彈...

然後上星期二又改口話大市已正式止跌回升，結果黎頭講完，上星期三日中跌近成千點，嚇到心都創，之後幾日都大呼大市要調整好一大輪...

即使大市今個星期一回了些少氣，財經分析員都勸大家忍一忍。昨日先至話大市調整壓力未有咁快完，今日大市升六百幾點...

股民憎死財經分析員。

再有一批股民悔不當初，再有一批股民心動...
再有一批股民信心大增，再有一批股民受訓練 (「教訓」)，下次大跌市「決不吃虧」。

最後大升，筆者所認為要具備之材料，總算按排得七七八八。

調整至50天線，有唔係未試過...

回顧自04年7月展開之升浪，長久以來，試50天線係每個升浪中司空見慣之事。

05年12月自15,xxx點起展開之升浪，先後試50天線4次才到17,xxx點高位，第5次穿50天線，升浪方止。

06年6月自15,xxx點起展開之升浪，先後試50天線4次才到20,xxx點高位，第5次穿50天線，升浪方休。

今番升浪自18,xxx點起，今次乃第2次試50天線 (可以說是第3次，只不過第1次和第2次時間上太接近)。筆者意思不是說一定要試夠5次先破勢，只係想提出，試50天線唔係咁出奇既事。只不過，如前文提及過，全球浮動資金太盛，大市成交量驚人，幅度自然亦驚人。以往一、二千點內見調整，如今三千點才出現。以往過500億以上叫大成交，700億成交只出現1日已不得了，如今可以過千億，還可以連續維持幾天。既然係咁，其實需唔需要太驚慌呢？

美國次按的確有隱憂，但資金唔通走番晒去銀行、債券？索羅斯就將資金由受美國次按所影響既投資調去中國相關投資。

筆者唔敢提出D咩建議，上文亦講過個市唔易玩，筆者只能夠同大家講出實際上本人仍然持其正股，訓其安樂覺。但至於其他人該怎樣，實在不願致評。

講來講去，入貨位係邊乃關鍵之一。近期大升才殺入大市，自然要食大量驚風散。

大市 ‧ 2007年8月2日

次按問題暫時又可以唔理住。

日元利差交易問題都唔成大問題住。以日本現時政治局勢，未有條件去傾加息住。近日日元上升乃受拆倉盤所影響。原來市場最壞打算，美元兌日元116，亦未接近過。但120又有機會掉頭，所以近期股市真唔易玩，如果唔係等住炒股開飯，唔落場，當休市兩個月，都未尚不可。

近日大市上落波幅之大全因全球浮動資金過盛所致，當然唔少得每次借藉口所引發之恐慌性拋售。

值得一提係上月期指，係結算前一日都居然大手成交，搏一日回升，可見大戶十分心急，大小通吃，驚死就黎冇得食咁。因此筆者亦介心大增。

大市於22,000點有支持，淡友用完貨，又輪到好友儲貨，隨時又可以再炒上。總之最後令到散戶後悔放貨之後又後悔入貨，然後再後悔出貨...如此類推，又令到散戶勁鬧財經分析員，大戶派貨總算成功。

大市 ‧ 講多兩句

家陣杜指再跌140幾點... 係幾得人驚既。
但係放心啦，過一個愉快既週末啦。
回升會黎得好快，快到可以星期一大幅回升，而且機會好大。

大市，講一句

照睇今日都係補回個裂口，大市重有動力，聽日再升。

一些實事

好耐都冇跟進大市，近日被友人催谷寫下野，今晚見訓唔著，就寫幾隻字。

有人認為大市大升是因為政治市，以下提供一些事實給大家參考下：

一、以政治為由把大市炒起係有既，不過攪手係咩人，要諗真下。若認為係中央既話，咁就要諗下近日中央所做既野似乎好唔配合喎。雖然係放寬QDII，但果兩日過千億既成交，金額之大絕非來自QDII。反而中央再出打壓股市既言論、同埋今日減低(甚至打算取消)入息稅都確確實實係志在打擊股市。雖然目標係A股，但係A股對港股既影響，唔使多講；唔可以好似某些分析員咁，一時就話有關，一時又話冇關，為解釋市況而解釋。

二、中央唔會為左攪靚個市，而推伯姓入市，令大家最終坐艇。若然係假手於大戶，咁大戶都要諗下後路轉身掛，最終影響到既又係廣大人民。除非係要大戶門買入AH差距大既股份，貴D都要買，持貨好幾年先准走。真係有咁既力量推市，咁有會唔會早左D呢？如果係有操控既話，大可以教準D，定係有人著左先機呢？咁但係著先機既已經幫手做左野，之後又係唔係可以慳番呢？

三、近年既市況，其實已經好靚仔，已經同全世界交代到，唔使砌都咁盡掛。

四、如果股市真係有「實升」既話，你估D大鱷會點做。

筆者唔係話完全否定回歸十週年既政治理由，實在唔敢阻大家發達，只係想講出另一方面既睇法。

係大市未作動之前，較少聽見有財經佬討論「回歸十週年」。唔知係大家都有共識要點玩黎個游戲定係真係唔睇好個市。筆者兩個月前都話只要黎個既念冇拿出黎大唱特唱，都重係安全，反而會成事。外圍亦好就，五月大市未於筆者四月所預期咁出現大跌，結果只係牛牛皮皮，上上落落。

七月頭好友應該會得勢不饒淡友。如果組織到升勢配合「回歸十週年」既念，成功引黎散戶入市，「最後大升」終告完成，隨之而黎既「似樣調整」亦因「忍左咁耐」而攪到好大鑊。筆者依然覺得唔可以掉以輕心，恕筆者冇吉士。重來投資，好少話十足把握，應該因應自己有幾成把握，以持貨量控制風險，但係好多人一係就全情投入，一係就完全放棄，咁係有問題架。

最後有幾個現象同事實想同大家分享下。

一、筆者觀察左好耐，質素低既分析員無謂講，但發覺響眾多質素高既分析員裏面，近年對大市掌握得非常好既有：「新城」既黃溢華同埋「每週」既高步昇，佢地講既野非常有參考價值。其他高質分析員，對個股既睇法都有出色者，但係睇大市真係差左D。當然重有其他好野，筆者知唔晒。

二、筆者唔買「精制失修」都留意佢既大標題，配合散戶既近期狀態，粗略都估計到會出咩事。近期大市大升，之前冇見佢大唱好過，升勢遲續一段時間，至剛過去既週未，大大隻字「牛氣沖天」，港股跌足三日，好橋。

三、近期，見最穩陣果個「審慎型」都放心左好多。因咁樣而推斷大市將再有一輪升浪，亦近乎尾聲既話，都唔係冇跟據。

總結係筆者依然認為之前既調整唔似樣，要有「似樣調整」，要先有「最後大升」。「最後大升」遲遲未發生，如今已經黎到，故筆者非常有介心，但又唔敢阻人發達，只希望朋友門隨著時間 (即，唔係話依家就要好驚，未使好驚，最後大升未完) 、按自己既把握，控制風險，可以用持貨量，減持窩輪，或將三分一之盈利轉投窩輪等，各施各法，但求自補。如果相信「最安全既時候先係最危險」黎句話唔係廢話，咁就要諗真下。賺唔到，賺少左，冇錯，錢係賺唔晒既，但蝕左，蝕多左，就係大錯。

大眾金融控股跌勢見止

大眾金融(626)，先後10天線(藍色線)及20天線(綠色線)升穿100天線(啡色線)。今番跌勢現平底該止。大市不穩卻見穩，筆者百忙中已上車，作個記錄。

(利益申佈：筆者持有大眾金融控股(626)之股份。)

四月結算挾唔成，五月初再挾，死未？

四月尾，星期三、四，好友果然大舉進攻，但成效不大，出奇地只能挾傷淡友，冇緊要，引淡友五月再鬥，五月初挾死唔少淡友喇掛。

筆者將近日觀察到一些股評人既言論，同各位分享。請各位評評理，諗下重聽唔聽佢地講好呢？

一、係五一之前，好多評論員都講趁五一黃金週，中央會推出打壓股市之政策。由於之前加息及調高存款準備金都不足以壓止炒風，故需要更強硬之手段。佢地又話，中央選擇長假期推出措施為左令股民有時間冷靜消化有關措施。建議股民先行離場觀望。

聽其言者，先行離場觀望大市創新高。還有，該言論是否有其予盾之處呢？既然中央近期打極D股民都唔願走，若然中央要出手，點解會認為中央要畀個假期D股民消化下D措施呢？等佢地冷靜地唔好亂咁走？點Cin？點Jack？

二、今日恆指升幅明顯於尾市收窄，但股評人話唔擔心，因為恆生指數未平倉合約冇減少到。

先唔評論使唔使擔心住。但肯定炒恆指既大戶冇咁傻，會畀人捉到路。其中一個好簡單既方法係，用兩個唔同既戶口，一個響之前做晒好倉。另一個用黎今日做淡倉。咁，即係平左倉。結果係，未平倉合約有增無減，成交亦多左，等其他唔知情既人，以為成交大增，繼續跟住做好倉，而大戶就可以再做多幾張淡倉。咁既操作，所需既係更多按金，資金鎖到期指結算日。

三、港股升市受外圍帶動。

重來唔知某電視台新聞報道員當黎句：「外圍帶動」，係一種修辭既手法，定係貪佢讀黎好似好醒咁呢？星期日話：「受到美股創新高所帶動，港股連升三日。」今日又話：「受到外圍做好所帶動，港股早段一度做好，並創出新高。」唉！如果跌呢，就可以話：「外圍做好，但港股未能跟隨。」係，重可以講：「受港股帶動，三嬸血壓一度升至三月以來既高位。但林伯未能跟隨，尿壓逆市向下，一度創七年新低。」重有，美股新高之後又有新高，創左好多日啦，要跟，晨早跟左啦。

當然，筆者唔係話所有股評人都不值一提，只係想大家警惕下咁o者。

回應第一拯救小隊隊員

署名「第一拯救小隊隊員」的讀者發出了一個提問，見「散戶心靈脆弱，大戶無計可施」一文之comments。

首先感激閣下作出如此有見地之提問。

你說的甚是，筆者亦認定10年回歸要做到個市好靚仔，一片繁華既境況。

所以筆者認為跌市要響7月前出現。

要點係：
一、唔可以回歸十年，即七月一日後，就展開跌市。一片繁華境況應該都要維持一下。甚至維持至08奧運。
二、若要粉飾大市，是要資金推高大市的。不太可能過早便開始托市，資金該留力到某一階段才有行動。
三、若於20,500點水平推高大市，其實向上水位唔夠，還要維持到回歸後，相信難度非常高。

故筆者認為大市會於七月前找出機會調整，再由某個低位一路升番上黎，做個甚麼連升幾多日，一共升了多少多少點，破埋記錄，創埋新高。

還有一點非常值得留意，就是市場有幾多人會作出這個推測，又有幾多人願意透露這種看法。回顧近期大市，明顯地，大部份時候都是市場循大圍看法的相反方向發展；與市場想法對著幹的人才大勝。筆者認為只把這現象以「相反理論」解釋，容易誤導人。事實上是「沒有這麼易賺的錢」這個理論才是真正的定律；總不能一檯麻章，四個人食胡。

散戶心靈脆弱，大戶無計可私

大戶無法引入大批散戶接火棒。一有咩風吹草動就觸發散戶G點，未有耐可以做到散戶股火焚身。唯有係指數期貨上撕殺。

好友狹淡友格局成形。且看淡友搵唔搵到藉口。四月好友勝，相信應該星期三四大舉出擊。若奇妙地未能突破，則五月初亦要淡友死。然後睇環境，七月前出現大跌機會唔細。

散戶心靈脆弱，大戶無計可私，唯有分段多次推高個市派貨，炒低又順便入些少，又再推高，派番些少舊貨加新貨，做密D，做大幅度D。唔係既話，點派得晒D貨。

Back on Track

Just like last Christmas, it is.

It is going to be back on track as what we had left off by the end of Feb. Meaning that it will be back to "The Last Big Rise" (最後大升) and then afterwards, "The True Correction" (似樣調整).

Will get back to the topics as soon as I have time. ;P

Last Christmas

As far as Easter goes... looks just like last Christmas...

4 parties, Western, Hong Kong, China, Middle East, surprise seems to come because of the latter two parties...

Don't mind to hold until back from Easter holiday.

Tomorrow, stock will have a good rise

According to my conspiracy theory, tomorrow, stock will have a good rise, simply because Tsang elected.

I have to say this...

Long time no write...

Got a lot of construction work to do since March, even my notebook went nuts and already taken weeks to fix, and I don't know how to use ChangJie, instead I use some other typing method that cannot be found on other machines, so this is why all of the sudden you are getting English from me.

But still there were something I really have to say:
when the stock went down, I mentioned that it wasn't time to sell because prices were way too unreasonable. And I suggested to wait for the bounce back to sell and watch out for the 50 days moving average, right now, it is at 19,986.

According to wave theory, it is now said to be the B sub-wave of the 4th wave, where the 4th wave is a declining wave and B sub-wave is the bouncing sub-wave, so up-coming it will be the C sub-wave, meaning that bouncing will be finished, and the stock will head down again.

Not everyone would buy in to wave theory, as counting waves is quite subjective. Aside from wave theory, if you treat this as a bounce back, here is my calculation:

HSI has slided from 20,844 to 18,659, which is a 2,185 of declining. Using the very naive way of golden ratio, result in two measurement of the bouncing. One, is 0.382, and the other is 0.618. If the environment is seeming more negative, the bouncing will only reach 38.2%, which is 19,493 (where last bounce went up to 19,470 in March 12th, quite close). Otherwise, if the environment is seeming more positive, the bouncing can reach up to 61.8%, which is 20,009. At present, US stock market has an excuse to use after Fed's decision on interest rate, also the blue chips in HK is announcing positive reports, Yen rate has went down, and etc. The bouncing has the momentum to reach near 20,000.

Note that the 61.8% bounce hits the 50 days moving average. For the declining, the first gap was made in Feb 28, the gap was from 20,042 to 19,749, filling back the gap of 61.8%, would reach 19,930 (where filling the gap of 38.2%, would be 19,861).

In summary:
1. According to wave theory, what is happening right now is only a bounce back and C sub-wave is coming, HSI has to find another bottom (that bottom doesn't have to be lower than the previous one though).

2.1. If the bounce back reach 19,861, the first downward gap is filled by 38.2%.
2.2. If the bounce back reach 19,930, the first downward gap is filled by 61.8%.
2.3. If the bounce back reach 20,009, a bounce of 61.8% is completed.
2.4. If the bounce back reach 20,042, the first downward gap is completely filled.
The bounce back reach 20,042 (or slightly above) at best, and 19,861 at worst.

In my opinion, it at worst fill the gap by 61.8%, that is 19,930, and at 20,000 definitely would face very strong resistance, unless something extremely positive popping up at the right time would change that fate.

All figures have been laid out, now, "leave" at your own risk.

今日分分鐘純屬超大震倉活動

今日乃近年最驚險既一次。昨晚看著道指由跌200多點擴大至差不多跌600點，最終收市仍跌400多點，實在訓唔著覺。當晚計劃好第二天如何續步放貨。結果一早恆指由最低抄起，一開盤個個開價離晒大譜！市場失性，有人撩貨，不虞有詐，當睇唔到。寫下短短文章，然後攬住D貨訓其大覺，此舉都算係近期代表作。結果同個市其實冇乜關係既財政預算案講完之後，照慣例回升，之前既跌幅再擴大果然係例牌菜。

今日其實係「國際撈低貨日」，自己成手貨唔夠資金冇份撈，更加唔會提他人入貨，做吃力不討好之事。有人認為建設銀行機會難逢，大舉入貨作中線投資。大部份股份都成功被人撩出平貨。玖龍紙業居然被人撩出$14.5既貨，然後臨收市又居然可以倒升2%，非常過份！

星期二內地傳聞一大籮。攪到咁大，唔通下星期有極好消息出台？

依家「最後大升」唔成時，亦未見係筆者所講既「似樣調整」(該調整要見下250天線，18,000點等G點，就好似上年六月中出現果隻調整)。大市都重係上上落落格局，如果下星期中央真係出好消息，「最後大升」有機會出現番。若果唔係，大市反彈回補今日之下跌裂口後，再向下探，有機會提早攪出個「似樣調整」。不過筆者還是偏向下星期中央冇乜壞消息出台，甚或有好消息。

恆指低「抄」，唔到你沽

恆指及各個股今早由低抄起，找出最低可能性，心血少D都唔掂。今早試盤已試跌800點，開市跌700零點，一下已搶落100天線，該區乃之前島形底之裂口，支持點都有番咁上下。由於一早低抄至100天線，反而可以考慮反彈才沽貨，甚至等兩等又到人行出黎講野，以筆者純個人主觀睇法，認為會係好消息多，但市場明顯傳緊既預計係壞消息多，信唔信坊間睇法，不願致評。

若待反彈沽貨，留意50天線，如今已變成為阻力。

例牌菜，財爺、特首報告前作狀跌下，今日黎講，開咪前席跌幅擴闊，睇下報告完係唔係跌幅收窄番。

大禍可能將至，暫時收工

世界變，國內股市影響美國股市，國內創自97以來單日最大跌幅，影響道指亦創自2001年以來單日最大跌幅，跌成416點。參考當年數據：

2001年9月17日：
HSI Previous 9569, Open 9397, Close 9319 (跌250點)
DJI Previous 9650, Open 9294, Close 8920 (跌730點) (單日跌4%)

2001年9月18日：
HSI Previous 9319, Open 9509, Close 9307 (跌12點)
DJI Previous 8920, Open 8922, Close 8903 (跌17點)

2001年9月19日：
HSI Previous 9307, Open 9402, Close 9558 (升251點)
DJI Previous 8903, Open 8903, Close 8759 (跌144點)

2001年9月20日：
HSI Previous 9558, Open 9415, Close 9317 (跌241點)
DJI Previous 8759, Open 8375, Close 8304 (跌455點)

2001年9月21日：
HSI Previous 9317, Open 9039, Close 8894 (跌423點)

2001年9月24日：
HSI Previous 8894, Open 8971, Close 9284 (升390點)
DJI Previous 8304, Open 8242, Close 8603 (升299點)

2001年9月25日：
HSI Previous 9284, Open 9411, Close 9210 (升74點)
DJI Previous 8603, Open 8605, Close 8659 (升點)

2001年9月26日：
HSI Previous 9210, Open 9307, Close 9371 (升161點)
DJI Previous 8659, Open 8660, Close 8567 (升92點)

要注意，當時美股大跌乃出於911事件，美國休市四日，港股早已跌定，由10417跌至9319。故美股大跌後，港股並未跟隨。

今時唔同往日，中國經濟舉足輕重，今日大跌觸發歐、美股市大跌。

估計港股該不大受美股大跌所影響 (有都係短暫藉口，事關今次唔係美國影響緊成件事)，而是要視乎國內A股市況而定。國內A股會否喘定難料，國內投資者新手多，而且農歷年左近國內出現大量新股票客戶，真難攪。

港股如大跌，技術上將破重要支持走勢而觸發中期調整。

筆者多數執野走，市況急轉，「最後大升」如今唔使行先。

還有一個可行策略就是替自己所持有既貨買保險，即買入恆指認沽證對沖風險。

執野走都無可口非，有錢賺就袋左先，黎幾日都唔多似會有咩向上發展既水位。大家都觀望星期一人民銀行既發表。大戶門沽貨離場亦因為防人行可能宣佈加息。但分分鐘星期一有既係好消息。等一切明朗化先再考慮入唔入番市，鎖住利潤，日後機會多的是。

還有一點，源材料價格亦大受影響，皆因國內乃源材料之最大需求國，但金又另話。當然明明基於08奧運建設，國內對源材料需求依然係大，但係，總之，黎一刻個藉口炒得成既機會非常大，短暫黎講，源材料受壓一點也不為奇。

「最後大升」遲遲未成

久休復出，先同大家拜個年。祝大家新年進步，身體健康，財源廣進。

「最後大升」，遇上事故多多，難攪非常，一延再延，至今遲遲未成。筆者依然認為「最後大升」要成其事，才出現「似樣調整」。

「最後大升」要衝破20,971點唔容易，此區沽壓甚重，部份好友逢20,800左右偷步計數，加上匯控弱到震，認真「好友唔易做」。做淡一樣死，故近日唯有急上急落。

「似樣調整」要嚮3至5月期間發生。到時唔係「東東東東東東」所講既調整1,000至1,500點咁簡單。黎下要穿50天線，起碼要見「一年期上升軌」之頂部，此「一年期上升軌」乃恆指於上年十月期間所突破的較溫和之上升軌。好有機會，此頂部頂得一兩下，然後跌穿，然後再向下探。最遲6月回升，大市再度暢旺。

自筆者話等埋「最後大升」才執野走，本估計於一月中出現，但卻一延再延，至今「最後大升」還未成事，個市亦遲遲未玩完，筆者重未執得野走，想完完全全畀個腦休息番一個月都未得。

如今大市之變數比以往多好多、包括地緣政治風險、油價、美股等，捉路不易，要見步行步。

詳談建設銀行 (上)

本想盡早回應「本欄好友」另一個提問 (關於建行)。說時遲，那時快，今日大戶尾巴已盡露。

大戶狩影
國企今日跑贏恆指，回補了一月尾的下跌裂口。 中資銀行股中以跟本同A股無關的建行最為突出，此要點筆者之前已提過。筆者早前建議用二注買入策略。建議先於$4.6x初步入貨，挑戰讀者的膽量，結果真的有「本欄好友」買入。其後雖曾兩度回升至$4.9水平，但之後亦乘A股泡沫、宏控疑雲之市況下回落，大戶乘機震倉。至$4.5樓上已見去到盡，連日黎大戶門入貨左不少。黎單野當然唔少得「大魔」份。上週力壓建行至$4.6樓下時，「大魔」出現積極沽盤。但改天很快又有積極買盤。大戶門於$4.5-$4.6收唔少貨。「大魔」較早前定下$4.8目標價，期後中資金融股找狂，「大魔」一方面提升其目標價至$5.42，另一方面於$5.00水平時沽貨套利。隨之以來的是中資金融股大瀉，但「大魔」於1月17日重申其$5.42目標價，且看今次是否又會志在必得。而筆者認為「大魔」玩建行乃大戶中最在行。

二注買入策略
昨日有朋友問筆者可否買入建行，筆者認為可以，但大戶震倉尋底完結已否，筆者當時未敢肯定。故建議朋友以網誌早前所講的「二注買入策略」買入建行：

先把用作投資的資金分三等分，以$4.6x買第一注，若然市況比預料的更糟，可於其浪底買入第二注 (當然若只跌至$4.4是不足以動用到第二注的)。這樣做的話，若市況後來轉強，鑊利會比之前只持有第一注時更豐，相反，若上升乏力，可趁反彈離場，要做到平手該不難，若以$4.6x作為反彈之阻力位 (假設市況未見特別利好情形下)，乃然可以有錢賺。此乃進可攻，退亦可攻之上策。但運用此策略時要注意，若然買入第一注後股價出現升幅，不可追入。如今日見$4.8，絕不可貪心，以為升勢已展開而加碼。要記著當時所定之策略乃出於市況不明朗，但又怕錯失良機。投資從來最忌就是忘記自己的本來意圖。

當然，如今建行已遠遠升越第一注水平$4.6x，筆者對現時可否買入就不願置評了。反之「本欄好友」繼玖紙大升後，如今可以進一步鬆一口氣。又再恭喜恭喜。

圖表分析
下面是筆者本來準備好的圖表分析，圖為建行至2月2日止之走勢。本為入市定心針，現在唯有回顧一下，引以為鑑：


當時，從DMI看，無趨勢可言。MACD(8,17)有點回順，本週星期一已見作動要穿訊號線。慢步隨機指數出現超賣，%K亦回順，同樣本週星期一已見回升。依當時圖表看，尤其加上星期一、二之走勢確認下，短線反彈有利可圖。

今日DMI雖依然未見趨勢，MACD(8,17)剛觸及訊號線，若成功穿過，可確認反彈有力，但仍未能作大升勢看。KD線最敏感，昨日%K已升穿%D，顯示反彈在即。圖表又一次早一步出現先機。

以目前圖表看，大升勢未能確認，但可以確定已脫離跌勢而進入反彈階段。相信$4.9-$5.00阻力大，該於此區稍作反覆，才再展升勢。

下集再續。

(利益伸佈：筆者持有建設銀行(939)之股份權益。)

一見業績轉化龍？

跟開本欄之讀者應該有印象，筆者曾經提及一位「夠膽」$4.64買入建行及買了玖龍紙業的本網誌「好友」(下以「好友」稱之)。

(參考：筆者曾回應過「好友」的提問，詳細再分析過玖紙 (見文)，至於建行則未有時間詳細討論。)

筆者上星期和「好友」見面，當然少不免談起股市。「好友」對筆者認為理文配股影響玖紙之講法有點不理解 (見文)，認為理文配股與玖紙何干？對，的確是沒相干，但市場就是這樣不理性。市場不理性，正正係大戶 (或醒目散戶) 搵到錢之原因。

早前，明知聯儲局議息結果不會太壞，卻大做文章，震至大市下試20,000；其間筆者亦有不斷和大家提到大戶其實在低位收貨，如今處處可見，大戶原形畢露，不用筆者多講。理文一事後，玖紙其後急抽上來。事實擺在眼前，又是大戶震倉的行為。大市大跌，在散戶不理性時，又有這麼一個好的藉口，何不好好利用呢？這就是散戶輸的都是輸心態，尤其很多玖紙之持貨者都有相當盈利在手，想想市況不明朗，過一個安樂的新年也好，趕快「止賺」，人知常情。下跌幅度大正因為大戶先縮手懶理，睇下跌得去邊，然後入貨，然後唱好。

「好友」之前望玖紙落番$13.5樓下再入一注，筆者當時認為機會唔大，結果卻出突發事件。但大方向冇錯，故「好友」當時亦話一年目標為$16，筆者的回應是：「少唔少D，好快就到。」；今日已經到左，恭喜佢喇。

瑞銀提早出黎唱好，「好心提醒大家」：「黎個玖紙係好野黎架！要入貨，好趁業績前喇！」，反而筆者有點介心。要諗下佢有咩目的，睇實佢有咩行動，係黎兩個星期既重要課題。

「玖龍」豈是池中物

受理文造紙 (2314) 於散戶失性時配股的影響，玖龍紙業 (2689) 於星期五大跌，低見$12.88。用所謂跌穿10天線止賺、跌穿20天線止賺、跌穿19天線止賺、5%止賺位或10%止賺位，都成功「止賺」。止賺既散戶走左大部份，股價今日大升，最高見$14.12。


受單日大跌影響，上星期五DMI-升穿DMI+，雖為利淡訊號，但單日大跌，某類形技術指數都會即時走樣，尤其DMI係好敏感，所以唔可以照書背話係沽貨訊號。瞧，MACD(8,17)已扭轉劣勢，有機會升穿訊號線。是次大跌，再一次試出「中期上升軌」既支持力，似乎幾可靠下。順帶一提，睇DMI，要留意埋條趨勢線ADX(圖中黑色果條)。上星期五，ADX在25之下，而且向下發展，即係暫時無甚麼趨勢可言。「觀圖亂估」既人又會大喊沽貨。

下文為筆者最近談及玖紙之投稿文章(受字數所限，並不詳盡)：

筆者認為玖龍紙業乃「非常潛力股」，建議買入，
並作「畢菲特式」長線持有。

別受某些投資機構對包裝紙供求之憂慮所疑惑。若
認為「玖紙」永遠只造包裝紙，發展只限於國內市
場，那就參考一下蒙牛乳業吧。

以為「蒙牛」只等於牛奶，便錯過了她的「非常潛
力」。除了其本份外，由誰也沒想過的「超級女聲」
，到「酸酸乳」之成功，至最近夥拍全球最大酸乳製
品集團，「蒙牛」都做得十分出色；半年內其股價由
$9水平升至$23水平。

且看「玖紙」主席張茵如何以三萬元本錢發展出今時
今日的玖龍紙業，再想想她如何進取，如何先知先覺
地配合中央，注重環保。觀其業績、訂單、營運效益
、還有很多很多，相信沒有小看「玖紙」之潛力者，
只有嫌其公眾持股量少於26%者。

建議以其上升支持軌作為買入之基礎，別因消息而炒
出炒入，每季細心研究其業績公告。估計不只其06年
業績報告不令投資者失望，往後日子更有機會喜出望
外。

未知是次大跌，「嫌公眾持般量少者」有冇入貨丫拿？

(利益伸報：筆者持有玖龍紙業(2689)之股份權益。)

資料修正：談地鐵(二) - 地鐵載客量數據

對不起，筆者未睡醒。回顧文章，發現自己話：「地鐵載客量提升至80萬人次水平。」覺得好唔妥，諗下諗下先發覺。哈哈，痴左線，香港半日都唔止80萬人次啦。最離譜係每年得9千人坐機場快線...

其實單位該以「千人」計。

修正：

載客量：

2000 地鐵：767,416,000人次、機場快線：10,350,000人次
2001 地鐵：758,422,000人次、機場快線：9,024,000人次
2002 地鐵：777,210,000人次、機場快線：8,456,000人次
2003 地鐵：770,417,000人次、機場快線：6,849,000人次
2004 地鐵：833,548,000人次、機場快線：8,014,000人次
2005 地鐵：857,954,000人次、機場快線：8,492,000人次
2006 地鐵：866,753,000人次、機場快線：9,577,000人次

談地鐵(二) - 可持續巡視之業務

基本業績
地鐵有多好，最直接是觀察地鐵的基本業務：地鐵。

載客量：

2000 地鐵：767,416人次、機場快線：10,350人次
2001 地鐵：758,422人次、機場快線：9,024人次
2002 地鐵：777,210人次、機場快線：8,456人次
2003 地鐵：770,417人次、機場快線：6,849人次
2004 地鐵：833,548人次、機場快線：8,014人次
2005 地鐵：857,954人次、機場快線：8,492人次
2006 地鐵：866,753人次、機場快線：9,577人次

自2004年，地鐵載客量提升至80萬人次水平，相信是受惠於旅遊業。雖然地鐵人次升幅不大，只有1.026%，但不得不留意其機場快線之升幅。2000年機場快線新糞坑，載客量自2000年一直遞減。自2004年受惠旅遊業之餘，相信今年和國內商業活動及大型展覽有關，06年達12.78%之增長。可見06年基本收入將會更勝舊年。

「平民可持續巡視之業務」股份
筆者喜歡"tangible"股份，如零售股，大快活轉型後業績會否有驚喜？去品嘗一下便知 (轉型之前之後都嘗過最好)。Giodano盈利會否有增長？Giodano Ladies非常成功啊！看周生生，看是否自Disney泡沫爆破後，中國人對金失去興趣？可知新港中心的周生生於05年無人問津？今時今日呢？這些都是只要肯走落街留意下便可以知道。筆者稱她們為「平民可持續巡視之業務」之股份。其他股份，筆者無本事去巡視其廠房設施、營運數劇或與管理層見面。

筆者觀察地鐵，感覺他們是非常進取的一群。上蓋物業、廣告收益不用說，較少人提的是他們不斷改善空間運用，增加商舖，這豈不是用不著分析師來告訴大家的利好因素嗎？

還有一點就是，不要只看載客量上升，地鐵對控制班次密度之掌握簡直是爐火純精！筆者常於平日非繁忙時間乘地鐵，但車箱內乘客一點也不少，雖不及繁忙時間之賓虛場面，但想坐亦不易。可見的是，成本效益非常之高。更不用提夏天引用自然風，節約開冷氣之成本。

(利益伸報：筆者持有地鐵公司(66)及周生生(116)之股份。)

談地鐵(一) - 淺談地鐵公司之表面

淺談地鐵公司之表面
地鐵公司自03年谷底起行：

03年01月02日 $8.2
04年01月01日 $10.5 增長28%
05年01月03日 $12.5 增長19% 累積增長52%
06年01月02日 $15.5 增長24% 累積增長89%
07年01月02日 $20.4 增長31% 累積增長148%

回報相等於買入一隻每年都有10%實增長的基金；未計股息。

很多人，尤其年長的投資者，都喜歡持有公用事業類股份，認為她們都較為穩陣。
和其他公用事業類股份比較一下：
(0002)中電控股 03年01月09日為谷底：$31.3 至07年01月02日：$57.5 增長：83%
(0003)中華煤氣 03年04月23日為谷底：$9.15 至07年01月02日：$17.5 增長：91%
(0006)香港電燈 03年02月11日為谷底：$28.9 至07年01月02日：$38.5 增長：33%

還有一個誤解，以為地鐵公司屬公用事業，其實地鐵屬工商業分類。有此誤會絕不為過，因她是既有公用事業的防守性，亦有工商事業之增長特性。故筆者建議喜歡把「防守性組別資金」(一個全面投資人該把資金分組別) 放於公用股的投資者，不如改為持有地鐵公司。

(利益伸報：筆者持有地鐵公司(66)之股份。)

上午Highlight (2007年1月29日)

大市不斷測試恆指20,200點支持。

依現況睇，輪到好友被困島形頂，島形頂裂口：20,487-20,457，上升裂口：20,337-20,487，下跌裂口：20,610-20,457。用期指術語講，好友還未能轉身。技術上黎個島形頂唔係話咁壞，下面亦有島形底，現成爭持局面。

今日中移動唔聽話，傳埋「已配股」消息，其實講緊既係懷疑Vodafone上星期以最高每股$72配售6.5億股股份。6.5億股佔中移動6.5/199.68 x 100% = 0.03%，而Vodafone原先持有2.18%股權，並於2002年額外增持1.09%股權。0.03%係D咩黎先。再講，有本地華資財團願意用$72收貨，咁中移動值幾多錢先？點講都好，散戶唔理性。

今日成交突然只得369億，唔好用近日比，咁既成交量10月時候先至見過。更值得留意既係，近期講開600多億成交，突然咁少。有個講法係資金流走，但係筆者話，係大戶尤得散戶拋貨，係低位收集。重有一點，今日36隻藍籌，最後收市只得12隻跌，有好些都係午後抽番上黎。各位定D黎喎。

好友未轉到身，上星期出中央加息擬雲，今日又出中移動配股擬雲，又要驚星期三美國議息結果會不減反加。如今好友似乎等最後階段先出手，天日如果都唔成功，唔緊要，2月初再鬥，反正下月期指已準備好晒。大家唔係高位認購即月期指，絕對唔使擔驚受怕。總之，一月尾出咁多藉口可以用，算係淡友執一身彩。

即使大市見跌，尤其係上午市，地鐵公司(66)都係逆市升得最靚果幾隻，總算筆者冇推錯佢。

最後，筆者維持「最後大升」未完。

(利益伸佈：筆者持有地鐵公司(66)之股份。)

大市Highlight (2007年1月27日)

幾乎逢星期五都有中央出新政策之疑雲，近期逢星期五，例見D人執野走。

星期四、五淡友搏命減少損失，筆者認為好友見星期四、五挾高吃力不討好，不如等星期一、二，到時確定中央冇出到台，等淡友少緊D藉口，先挾番上去。挾番果400點番黎，有幾難？如今重可以趁星期五執下平貨，何樂而不為。所以筆者星期四都有提到「好友懶理」，當時實在唔適宜浪費藥，星期五下午係咁依，響20,200點關口托一托就乜都夠晒。

其實星期五所發生既係大戶乘機震倉入貨。筆者見好多股份響尾市低位，極多人撈貨，尤以中移動為甚。但係筆者絕對唔敢叫人入貨，只係有叫大家唔好沽貨。因為散戶極唔理性，淡友藉口多多，怕大家入左貨最終唔出事都要食一輪驚風散。

事情就係咁橋，遲唔配股，早唔配股，理文造紙(2314)偏偏響個市失晒理性既時候配股。連累到玖龍紙業果下激死。真係畀朋友講中 (唔知佢有冇入埋貨呢)，見$13.5樓下，最低$12.88都去過，你話投資者幾唔理性呢。

建行有機會星期一裂口高開，然後一直攀升，做成所謂「底部棄嬰」之利好形態。重有一點好重要，建行係冇A股架麻，其實A股噴泡，關係到建行到咩情度先？唔好理，散戶唔理性既話，你就冇得鬥氣，但係又唔知散戶可以拋到去咩位，亦唔知大戶震到去咩位，出出入入，分分鐘做錯野，所以「二注買入」響黎個時候就會發揮作用喇。筆者先前叫大家可以$4.6水平初步買入，如果唔出現大跌，跌過$4.6水平，就賺果一注算數。但若果出現大跌，見更低既位，如$4.2 (求其假設)，買第二注就將平均買入價拉低。信心大既，將來持貨至$5.0或以上，變相賺得更多。信心冇咁大既，將來見股價去到某些阻力位，如$4.6，沽貨，都變相賺錢。

星期五最大藉口係人民幣加息，但係筆者認為中央好一段時間都只係會不斷出口術，同耐唔耐提高下存款準備金率。

悲觀果面，睇下淡友借唔借到「美國有可能加息」做藉口，難度高些少，但係筆者唔敢講得咁實，睇下昨日星期五D人幾唔理性就知。

「最後大升」似乎尚未玩完。分分鐘可以玩埋2月初，新年前。密切留意各方變化。

筆者近日忙左D，盡量三言兩語寫得幾多寫幾多先，所以出現極短文章，希望盡量提住D重要出黎先。

大市快up (2007年1月26日14:30)

事到如今，無謂亂沽，如昨晚所講，好友讓路。如今裂口已補，好友遲早反擊。若看淡大市，待今回反彈才沽貨。好友於午市、星期一及二反擊唔奇。

大市告急 (2007年1月26日11時)

好既唔中，衰既中，真係做埋個島形頂出黎，下跌裂口，20610 - 20457，10天線已穿。大市告急。

不幸中有少幸，之前上升裂口 (20337 - 20487 ) 已回補，調整後健康發展有機。

大市Highlight (2007年1月25日)

淡友力挽狂瀾
淡友力沽，放埋一堆批股消息，加上再有國外機構唱A股出現泡沫，引致A股市場大跌，淡友理由多多，尾市再"質"低和黃，連中遠太平洋、建行等都唔放過。淡友邊想減低今月虧損，邊轉倉至下月再鬥。昨日只靠中移動持撐大市，今日中移動失守埋，淡友初步成功。其實黎兩日籃籌只佔總成交百幾億 (今日大市成交五百幾億)，好友賴理，相信會近結算才撐市。恆指下星期二結算，不排除明天好友反擊。近日道指升跌，當睇唔到。

三個利淡近來港股既因素

一、下星期二美國將發表議息聲明，美國數劇走強，減息無望，出其不意加息就大鑊。

二、國外機構不斷提醒國內A股出現泡沫。

• 花旗、匯豐及瑞士聯合銀行的主要策略分析師們都聲稱：「遠離已成為亞洲最昂貴的中國股票市場」。
  
• 投資大師吉姆羅傑斯近期也唱淡A股市場
  
• 中國銀監會近期向各家商業銀行發出貸款資金入市風險提示。
  

三、年近歲晚，計數渡佳節，大有人在。

深入恆指成份股
觀察幾隻重磅藍籌股：
匯控：見穩，大行力撐。$143水平有買盤力撐。
中移動：好難講。下午市交頭難常淡靜。
和黃：若跌要一次過穿十天同二十天線。今日只有頭尾短時間挾低，上午$80有大買盤，中段交頭淡靜，其實有D上升動力。
中海油：夠衰"羅"喎，大跌難左D。今日早短低位有買盤撐喎，午後好淡靜。
新地：今日早段有上升動力，之後交頭疏落，唔係真係咁差喎。
長實：要明顯穿十天線，接近二十天線，RSI見50。依今日睇，下跌動力見減弱。
恆生：今日沽果下成交其實唔大。尾段沽壓大D。20天線勉強有支持。
中銀：若再跌都穿20天線，21.5擋得幾實下。唔多好。
建行：大行力撐中。今日早段搶高成交大，$4.9水平壓力大，下午市成交淡都爆，尾市稍為加些少力沽番落黎。情況唔係咁差。

總括講，其實今日交頭集中係11:00前，而且多數係升勢，11:00打後淨番些少人鬥，尾市稍加壓力，就沽左個價落黎。認真係好友懶理。市底唔似係咁差，大市要再推低，好多股份都要穿20天線，係唔係咁盡呢？筆者認為恆指結算價有機會於20800左近。不過，個市難測到死，睇中都可能係好彩。聽一眾財經分析員，睇法就偏淡既多。

都係要睇路，一個唔該，島形頂都有機會整到出黎。

詳談玖龍紙業

朋友密函告知，受本欄所引之紅線，分別買入玖龍紙業及建設銀行，並問及一些問題。筆者受寵若驚，今後自當更加要醒醒定定。

先講玖紙，日後再講建行。

(一) 玖龍紙業

朋友於本欄推介後，自己做足功課，於12月底以$13.1買入。筆者最感欣慰係佢自己落力研究，此乃筆者之願望：希望讀者都能成為一個成功的投資者，不道聽途說，不受他人擺佈。不過以筆者對此朋友之認識，佢認真研究係出於佢自身性格，並非受筆者影響。好多時，人都係死性不改，受一己性格所限制，觀其性情，已知其日後投資歷程。

(一．一) 倒轉鍋底
12月底買入，坐過山車，能夠穩守，已經唔錯。是次拱形走勢，有急跌之先兆，值得討論一下，有兩個要點。一、筆者買入玖紙時為$8水平，且以「巴菲特」式長線持有，所以筆者唔係睇得好緊。起初並冇諗過推介，但見瑞信報告，想籍此機會同大家分析並見證一下大行言論點樣不能盡信。買入股票者，要靠自己，不該依賴他人，筆者分分鐘睇漏一時之變化，就如玖紙所出現之拱形走勢，筆者果排冇理到。筆者只能盡量提供扶肋，此網誌希望道破時下似是而非之道理及心懷不軌之人的言論，盼讀者最終能掌握走勢，為自己謀幸福。二、此拱形走勢，差點形成一個利淡走勢，有人稱其為「小圓頂」，有人專稱其為「倒轉鍋底」。觀圖亂估者會大喊快快沽貨走人，但玖紙是次走勢實質有驚無險，原因是有兩個要素還未滿足，使其形態不成立。一則是當股價向下拋時，成交不升反明顯下跌；二則是其最後關鍵陰陽燭並非裂口小陰燭，反而係一枝見底既鎚頭。


拱形走勢，拋落黎果下好急。如筆者於$4.6水平推建行一樣，其實是次玖紙於平底支持之下，乃入貨良機，只可惜當時無緣推介。

(一．二) 近期走勢波動

朋友亦問及：「近日股價波動大，想半年內該有入第二注既機會，願以$13.5 (或以下) 再入，是否適當。」

近期玖紙走勢波動，主要係股價由$11.28，四日內急衝至$14水平。瑞信報告出得合時，觸發鑊利回套。但凡一隻股招搖急升，期後多數出現急吐，建設銀行近三個月走勢絕對體現到。

近四天，筆者見$13.7之上都有支持，而且股價回歸中期上升趨勢線之上 (見下圖紫色線) ，想見$13.5或以下再入第二注，機會唔係好大。依筆者見，之前既回套已經趕走好多無謂人，所以股價再向下回套既力度不大。如果真係好想增持，筆者認為不應以價錢定位，係應該以走勢定位，所謂逢低吸納，係等走勢回套至支持位才入貨。但是要出現這情況，股價要再急升先可能遇見，以現時貼住中期上升軌慢慢爬黎睇，這個情況未有咁快出現。如現水平增持，等於將買入價由$13.1提升至$13.75，將會面對既心理因素影響唔易應付。其實筆者一向唔太讚成分幾注「追」貨，除非係非常長線之持有策略，否則可以選擇保留籌碼，再等另一隻股、另一次機會，亦為上策。「分注買入」係好多書籍上介紹既買股策略，不過筆者認為並非上策，但又有好些情況卻為良策，有機會要詳談這課題，三言兩語怕誤導左讀者。


講多兩句技術野：上圖所示MACD未見瘋狂，處於初步平穩發展之狀態。而且，玖紙重展升勢時，MACD出現「Exponential黃金交差」及同時升穿訊號線，勢頭強勁。玖紙出現波動期時，DMI+ (反映上升動力) 及DMI- (反映下跌動力) 出現貼近糾纏。有兩點要注意，頭兩個月的DMI沒有用，還有DMI反應非常敏感，不該輕易視之為利好或利淡。

(一．三) 管理層

朋友提及：「玖紙逃不了中國式家族生意味道。」

的而且確這是隱憂，但若不打算把自己手上之股份父傳子、子傳孫，可以不理。有些人投資，投管理層，捧交通銀行者，最強理由不離匯豐管理層。不過，玖紙之管理層大部份為年輕人。可以看為大老板突破中國人傳統，懂得從年輕培育人才，亦可視為管理層不成氣候；吸不吸引就見仁見智。故投資好投管理層者，玖紙不列入其推介下，各有各喜好，筆者不參予爭辯。

筆者投資，唔偏食，除左投資優質管理層，亦喜歡投資優質老細。女首富大情大性，筆者甚欣賞。冇好老細，唔會有好既管理層。若非「火原」，就冇思捷既優秀管理層。打工時，見過好多出息既年輕人，但係老細唔識用，咩事都冇發生過。所以筆者曾經提及過開始留意「真明麗」，老細得麻。

(一．四) 前境

再替讀者及朋友打打強心針。

二三月乃業績期，之前炒到慶恰恰既股份，稍為交唔足功課既話就大件事。至於玖紙業績一定唔會令投資者失望。

玖紙除了回收紙張做包裝紙外，亦引入利用草做紙，一則大大減低成本，二則非常環保。可見玖龍紙業進取非常。自國內多年前亂砍樹木，引致水災災情嚴重，中央政府早已痛定思痛，非常注重環保 (只是香港人對中央太多懷疑、不予信任、好野唔多鐘意提)。故中央政策絕對有利環保工業，許多小紙廠都不斷倒閉。就如煤炭業，因太多煤炭事故，迫使中央不斷收緊政策，以致許多劣質煤炭開採公司要倒閉，有利三大龍頭，以次序為：中國神華、中煤能源、兗洲煤業股份。

朋友最後問及：「打算持貨一年，預期升幅有20%，唔見$16都唔放。你的目標價又是多少？」

$16，唔止掛，唔使好耐都會遇見$16。業績公佈後，市盈率將會大降，實在可以提高目標喎。筆者應該有排持有，冇咩唔妥，都唔會點理，可以話係「毫冇目標」，決定「跟佢一起飛去」。

最後祝各位「旗開得勝」！

大市Highlight (2007年1月23日)

大市今日走勢，畀青姐 (胡孟青) 睇中，黎個deep V。

36隻藍籌股，24隻跌。恆指止跌回穩全靠中移動。地鐵公司(66)靠穩，創過新高，收市冇起跌，不失其退可守之特性。今日最低見過$21.55，但係只出現於3分鐘內且成交極少。其實可以話$21.7見支持。

國企指數不失其近日特色，只跟國內指數跌，不隨國內指數升。中國人壽首日被納入國內多個指數，成為上証第二大權重股，跌6%，報RMB44.03，本港國壽當然唔執輸，跌2.4%，報$24.2。各大行繼續唱淡，以德銀最誇，目標價$13.2。最進取既國壽好友，都係等緊$22。一眾股評人睇$18。筆者鬥緊氣，心理不平衡，大家升祈唔好跟，唔好理佢。筆者人格分裂，現以局外人身份評中國人壽(2628)乃筆者年度最劣投資行為。

建行(939)跌些少，不過交行(3328)、建行將出現向上突破，工行(1398)都有些少機會。中行一向唔睇。曾經提過，今日再提，招行(3968)真係唔錯，咁多隻中資銀行股，走勢最靚係佢，亦只有佢冇失過控。下次回跌至上升軌底部可以考慮 (當然要視乎到時市況而定)。明日應該會開始短暫回套。

玖龍紙業(2689)，$14找到支持，再畀D耐性。

(利益伸報：筆者持有建設銀行(939)、玖龍紙業(2689)、地鐵公司(66)及中國人壽(2628)。)

跳出投資思路的框框 (一)、續

續上文

相信本欄之讀者皆為高質素，早已想到筆者想提出的論點是：「三人之投資策略受自己身處之位置而產生不必要之混亂。」

進一步嘗試以比率來看，就更可以看到其不合理之現象。以下乃股價變動對各人之影響，按百份比計：

股價升/跌 $1，
A君：多賺/少賺16.67%；
B君：賺/蝕10%；
C君：蝕少/蝕多7.69%。

(基本上，其情況出於三人之入市價不同；雖同為1000股，但三人之成本分別為$6,000、$10,000及$13,000。)

若以百份比看，A君其實應該更加緊張，更要看緊股價走勢，而C君卻反而可以放鬆點。但現實生活，卻多數會遇見A君表現過份老定，而C君卻又擔心得要死。

A君及C君之現實行為，心理因素佔了多數。若A或C君打上任何問股熱線，對方都會問其於甚麼價位買入。之所以問，因為分析員要因應其最終謙或蝕之可能性，按問股者之心理，作出建議。

其實無論何時，買賣決策都該取決於：對其股價走勢之掌握，因應其買入該股所定下之投資策略，來作出決定。認為股價將要走弱一段時間，不論甚麼價位買入股 份，都應該離場。相反，若股價走強，不論甚麼價位買入都應該持有，除非要換馬至更有利位置。若認為股價屬短期抽高或抽低，若非短炒，都應當不為所動。若策 略上是等待好消息並深信自己之眼光，亦不應輕易離場。

很多時候，投資者出現不知所措，都是出於對股價走勢並無掌握，因而完全受其所處之情況來作決策。這件事給道出來，絕不令人錯顎，但卻是許多人都會重複犯 上。事實上，對走勢毫無掌握，即是碰運氣。這樣作投資的，難怪即使最初賣買股票略得甜頭後，最終都要倒蝕而決定重此不沾股票。這類人，任何年紀，筆者都見 之不少。

再說，即使某股票甚麼價位買入、已買入多久也好，都與決策無干。冷靜對待投資時，要忘記背後，只向面前。若然有朋友將一個投資組合交到筆者手裏求救，筆者甚麼都不需要問當事人，也不用管甚麼價位、甚麼時候買入；把所有股份都視作現價買入，將看淡之不良股份沽出，保留看好之優質股份。其實決策本來就該當這樣做，但真正能夠者樣做決定的人卻甚少見。

最後，「碰運氣」(即對股票走勢毫無掌握者) 並不代表不可行，正是「賭亦有道」。只不過這是一椿「高情操」的事，非常難為之術，此處有理說不清。

大市走勢 (2007年1月22日)

恆指升到你唔信，一眾股市分析員再度大跌眼鏡。現下有一部份分析員只有繼續堅持大市見頂之講法，冇辦法，皆因佢地由恆指18,000點始就不斷話大市見頂，事到如今，就快畀佢地「講中」。

筆者雖然預料大市會有「最後大升」，但係都畀今日既升幅嚇親。不過，諗深一層，都合理架喇，因為筆者預測今次大市要升到散戶「股火焚身」麻 (見上文，新讀者請留意：該文中所提及之大跌並非最近因突發事件 (提高存款準備金) 而引起之調整，是次突發事件延遲筆者所提及之似樣調整)。大市有機會升到連筆者都大跌眼鏡，咁就差唔多喇。所以筆者唔識估個頂，即使散戶起哄入晒市，大戶派完貨，股民都好有機會繼續「交換禮物」一段時間方休。筆者一直維持對大市睇法不變，唔重複講喇。

恆指聽日會唔會抖下先，答唔到大家。照計，國企會追番上黎，達至「萬物皆升」既階段，可以掉飛鏢選股票都賺到錢。37隻國企指數成份股今日幾乎全升，好些都是後來趕上，只有3隻冇升，佢地係青島啤、江蘇寧滬高速及華電國際。而36隻籃籌都有4隻跌，分別係恆生、恆隆、思捷及富士康。31隻紅籌有6隻跌。

筆者一月推介過之股份之表現

地鐵公司(66)收報$22，如果有跟筆者推介買入，咁就恭喜晒喇。筆者於大市向下調整時推介此心水股，絕對係經過深思熟慮。依當時推介(1月4日)後買入，1月5日買入最低$19.76、最高$20.75。當係最高價入貨，$20.75，要賺%5，$21.8就夠晒。當然筆者志不在此啦，筆者認為地鐵升勢絕對唔止咁簡單。(推介時文章)

建設銀行(939)收報$4.84，同樣筆者抖膽於其向下調整時建議可以初步買入，應該於$4.64入到貨，最差$4.7都入到掛。用$4.7入，要賺5%，即係目標價$4.94，都見過架喇。之前冇走到貨，但係又擔心既話，黎緊重有機會到位喎。(推介時文章)

玖龍紙業(2689)收報$14.1，筆者於中午強烈推介，當日最高價$13.2，第二日先入，最高$13.54。當係$13.54入，要賺5%，目標價即係$14.22。一早到過喇。當然黎隻股筆者都志不在此啦，但係擔驚受怕既，賺5%走人既機會大把啦。(推介時文章一、二)

中國人壽(2628)收報$24.85，其實筆者冇力推過此股，卻有次多手暗示過，所以都應該交代下。筆者暗示可以炒納入恆指慨念當日，最低$23.85，最高$25.65，當日中午後入貨應該$24水平入到貨。現時表現未見驚喜。明日中壽A股正式納入國內各大指數，A股股價既認受性將會提高。中壽A股今日升5.14%，報46.86RMB，就黎出現一倍差別。坊間唔會有股票分析員讚成買入中國人壽，到時可能又出現眼鏡一地都係。不論怎樣，筆者每次都強調過此乃風險極高之炒賣，買入正股已經係曳曳，買認購輪絕對唔讚成。(暗示時文章)

(利益伸報：筆者持有建設銀行(939)、地鐵公司(66)、玖龍紙業(2689)及中國人壽(2628)之股份權益。)

下午市速遞 - 2007年1月22日

恆指果然強勁，中午收市報20,639點。

地鐵公司 $21.45
玖龍紙業 $14.18
建設銀行 $4.81

後市預測 - 2007年1月21日

筆者對黎緊大市之看法與策略，於一個月前已經預定好，認為恆指於12月後半始升，延伸至1月，然後玩到1月中要執野走人。結果恆指升勢果然由12月後半始，並延伸至一月。然後筆者料一月初創完新高後，重要再大升多一次 (方便討論，就叫黎次預測升勢為「最後大升」)。筆者當時認為「最後大升」要先試一試20,000點樓上支持然後起動。結果於一月五日，果然試完20,000點樓上支持後，發力上衝，當日形成一枝有下手影之陽燭。但卻於收市後發生「存款準備金突發事件」，後來筆者都同大家講「最後大升」始終要黎，只不過延遲左，且認為存款準備金一事影響力短暫。當一路跌時，街外大部份人睇淡之時，筆者大喊19,300有晒支持，結果亦如是。如今一切已返回當初蓄勢待發之時。

筆者上星期已經叫D淡友：「今個月都係慳D使」。結果淡友響20,000點都只係轉到少少身，相信如今傷忙更慘重。

如果一切如筆者一個月前所講既方向發展，黎個「最後大升」之後會黎一個中型調整，所以當時筆者話玩埋「最後大升」會執野走人；原本預一月中玩完，依家經延遲後，相信今個月尾玩完。之後既野筆者已經預唔到，既然自己先前有一個睇法，冇理由自己都唔跟；萬一重有得升，賺少D，休息下，冇咩問題；但若果突然轉唔跟自己睇法做野，到時衰左既話就極抵打。所以筆者講明會玩埋黎個升勢就走人，亦之所以對筆者而言黎個係「最後大升」。

筆者認為自己已經係最離譜果個，因為由6月份15,000點起筆者冇停過做好友，成日都反一眾投資分析員意見話個市重有得升。當此blog開始時，個市已經係一個離譜after另一個離譜，但係筆者都冇停過響個blog到話看好、看好。如今決定玩埋黎個「最後大升」先離場，絕對有其道理。

如今幾乎個個分析員都睇好今個星期大市，相信今個星期大市亦會好強，要創新高，要散戶心郁，然後要散戶一仆一碌。加埋新股招埋股，找晒數，真係可以收工。

1月10日的一篇文章 (見上文)，一句點中題：「大家悲觀時，反而真係唔使咁悲觀。」今次要點：「人人睇好，就要提高介心。」

跳出投資思路的框框 (一)

假設一隻股票現時之價格為$10。A君曾$6買入，B君$10買入，C君$13高追。又假設每人持股量均為1000股，及三人之身家亦差不多。這三個人，卻可能出現三種投資策略：A君可以繼續持有，睇住止賺位。B君亦繼續持有，睇實止蝕。C君該趁反彈走貨，若然再跌至下個止蝕位就好離場。

假使股票回升至$11，A君多賺$1000、B君賺$1000、C君蝕少$1000。
同樣假使股票倒跌至$9，A君少賺$1000、B君蝕$1000、C君蝕多$1000。

如果從資產總值去睇，三個人自股價由$10開始變動，所得所失其實都一樣。如今卻出現三種不同的決策，實在是投資者該去深思一下的課題。

收市返黎再續。

大市Highlight (2007年1月18日)

捧開場既各方好朋友，對大市續升，心裏有數。恆指今日恰於日本議息結果公佈後升唔停。近日大市走勢，的確令很多財經人士都眼鏡大跌。

建設銀行(939)於上一次大裂口高開位前有壓力，絕對正常，部份人對中央會否再出手有所介心，於較高水平沽貨 (加上中央亦公佈2月1日起將正式向房地產開發商徵收土地增值稅)。低位見有購買力，暫時走勢未有大問題，不過上升動力亦暫未見強。

近期買中國人壽(2628)係搏，繼續持有風險大，一定要明白自己做緊乜，窩輪更加連搏都唔應該。恆指服務公司將2月9日進行指數檢討，大戶點玩、散戶點跟，暫時好難估到，小心留意。

玖龍紙業(2689)見鑊利回套好正常，如於筆者力推時有入貨就唔好急住走喇，拎黎投機浪費左D喎。

地鐵公司(66)表現平穩，唔錯，自筆者響大市不穩時推介，地鐵一直穩守於$20之上，確實為穩中有機之選。筆者睇好原因非常技術性，有機會再討論。

(利益伸佈：筆者持有建設銀行(939)、中國人壽(2628)、玖龍紙業(2689)及地鐵公司(66)之股份權益。)

要跟股票談戀愛

以下是筆者的一篇投搞文章 (文章要求200字左右，少得很，講到既野唔多)，請大家指教一下：

人們都說：「別跟股票談戀愛。」

我卻以為投資有道者都要跟股票談戀愛。

對感情可要認真，未有深入了解，不會隨便踏出第一步。

始了好感，要耐心觀察一段時間。投其所好，認識她的相關事物。

認識深厚，看好這段感情，就要選適當時機，憑信心，大手付出追求。畏首畏尾，表面無膽，實則無識，他朝自會悔不當初。

若時不與我，只嘆有緣無份，等候機會，或另覓對象，幸福並無非她不可。

付出感情後，決不危言聳聽，離離合合，擔驚受怕。相處過程定有風雨，實事求事，反而加深了解。

戀愛要理智，若對方性情大變、見利忘義、見異思遷，就要揮出慧劍。

災禍將至，暫避風頭，海誓山盟，他朝定能重聚，她有生之年亦不會離開。

能夠認真對待感情，必定因自己的眼光而得到相應可觀之回報。

來，戀愛吧！

又係裂口、島形底、島形頂

捧場既朋友，成日聽筆者，試裂口、補裂口、島形乜、島形物，講過不停。

但係圖表既野，絕對唔係咁簡單，一見裂口就叫補，一見島形底就以為會升到唔清唔楚。搬字過紙，遲早出事。

討論島形頂 /底之前，先講裂口，島形頂 /底都係由裂口造成。

筆者好難三言兩語解釋晒裂口既理論。(好多書走馬看花咁講好多種圖表分析既方法，其實每種分析都可以獨立成書。) 筆者卻覺得有責任同可以用三言兩語同大家講，裂口分析唔係咁簡單。

裂口回補
裂口要睇原因，咩原因導致裂口。簡單從學術角度分，有「普通性裂口」、「突破性裂口」、「持續性裂口」及「消耗性裂口」。(筆者唔抄書解釋喇；周圍都有書講解「裂口」。)

首先要明白，一個上升裂口既頂部可以係支持，但係又可以回補；回補可以好快出現，又可以過幾年先補；回捕完可以即時反彈，又可以破位續跌。唔好因為筆者近日提到某些股要補裂口，補完回升，就以為裂口出現就一定會係咁處理，攪錯晒。

筆者指出一點少見人提既心得，就係裂口真係要分析得法，要睇係咩原因產生果個裂口，唔好只係睇佢係「普通」、「突破」、「持續」還是「消耗」。

最近出現既國企上升裂口，當中包含一個慨念就係A、H要同步，故H股放聖誕假回來要追番A股升幅。結果，經中國人壽一役，大家都仿然大悟，原來A、H不單止唔需要同步，背道而馳亦可。即A、H同步之想法，隨「存款準備金」所引發，崩潰下來。

書本上對裂口回補有這樣的一個解釋：「上升裂口之所以造成，乃突如其來的利好消息所使然，投資者出現衝動追貨。當情緒平靜下來時，反省其行為，作出修正，固出現裂口回補。」

套用國企回補裂口事件，投資者被中央一個「調高存款準備金」拍醒，筆者亦曾提出此舉要阻止散戶失控，炒高中國人壽 (只是筆者低估其幅度，中央所憂之幅度可能真如工商投資所預期之上限每股90元人民幣)。結果投資者門皆發現，聖誕假後追貨乃出於錯誤憧境，故鑊利者見好快收，高追者止蝕離場。一眾中資金融股「回歸」之前合理水平，大部份打回原形。由原地再度發展，是故出現今日之局面。

島形頂 /底同樣複雜
島形頂 /底，兩邊都有裂口，但係兩邊裂口係基於咩原因去形成，係好影響個效用。簡單講，島形底見效者，左邊為消耗性裂口，右邊為突破性裂口。

筆者嘗試透過預測今年樓市之發展，描畫一下島形底之所以形成。

假設政府終於懂得將全港九新界的樓盤，選出籃籌，制定比重，並將成交價格按其比重計出一個「樓宇物業價格指數」。這個「樓宇物業價格指數」近期將會發展成一個島形底走勢，過程如下：

第一步
樓市該於今年走強，如今急於賣出物業有兩種人，一種出於看淡未來樓市，一種則急於換樓。先知先覺之投資者，已不斷在市場中收集平貨。以鑊利為本，知機投資者在市場中不斷找出平貨，價低物業才購入。加上美國遲遲未減息，期內賣出物業者心更焦。樓價不升反跌。

第二步
其後，知機投資者之購買力續漸消耗，沽售樓宇物業者更急於減價促銷，當中不少急於農歷年前換樓，或擔心農歷年前夕樓市濟銷。故總的價格，即「樓宇物業價格指數」出現裂口下跌。

第三步
裂口下跌後引來執平貨者及擔驚受怕而出貨者。「樓宇物業價格指數」出現波動。

第四步
當最後擔驚受怕者及執平貨者賣買力消耗完畢後，農歷年過後，在一遍歡欣繁榮氣紛底下，大戶門再力唱樓市。市民所鑊花紅亦現驚喜，公司向好，大家對經濟前境更樂觀，漸漸忘記負資產這種過時慨念，買樓意慾大大提升。地產商，炒家 (後知後覺) 大展拳腳，「樓宇物業價格指數」裂口上升。

第五步
島形底完成。樓市大旺，「樓宇物業價格指數」升勢一浪接一浪。

「離島居民」？？
幸好並未有「沽空樓宇」這種活動，所以未至於有「樓市淡友」並困在島形底之中。只出現急於脫離負資產低價賣出物業的人日後會覺得蝕底。換樓者起碼覺得自己買了平貨，心理平衡些。

若在股市出現島形底，則有所謂做淡者、買空股票者被困，低位沽貨者都未必太傷。反過來，在樓市中卻可以出現島形頂而「樓市好友」被困，希望大家並未忘記。

給非信圖：MACD點解會Work呀！(續：玖龍紙業強勢再起！)

本文，見數學頭暈者不宜。

有朋友話唔服，唔buy技術分析，唔明點解D咩MACD(8,17)會有用。

Let's Get Technical!

MA (Moving Average) 與 EMA (Exponential Moving Average)
EMA(X)係指X日既Exponential Moving Average，比普通既Moving Average (又稱簡單平均線)既計法複雜。普通Moving Average，見十天線、二十天線等，係X天既平均價。但Exponetial Moving Average則是累進數，今天的EMA(X)=(昨天的EMA(X)*(X-1) + 今天收市價 * 2) / (X+1)。用人話講，例如，今日既EMA(8)既成份係：昨日EMA(8)佔7/9，及今日收市價佔2/9。

十個交易日前既股價對十天平均價既影響係零。但係十個交易日前既股價對EMA(10)依然有一定既影響 (例如該股價比平均價特別高或特別低)。如果有一日股票價格突然發癲大升，然後第二日又打回原形，以十天、二十天線作分析，即係話係十日內，十天平均價將反 映這個突變，但第十一日，卻只有二十天平均價反映這個突變，而第二十一日，該日股價則完全不在分析範圍內。反觀EMA，視乎該日價格急抽幾多及日後股價之表現，其影響 是慢慢淡化。

而且，即日收市價既成份比係較重，佔兩份，即係話EMA反映到當日既最新既變動。而MA則很平均地反映過去X日既股價表現，包括當日。

黃金交差的真義
黃金交差，即十天線升穿二十天線。即係話十天短期走勢強過二十天既走勢。又即係話十日平均價高過二十日平均價。

Let MA(X) = X天平均價。
Let F(X,Y) = MA(X) - MA(Y)。

F(10,20)就係十日平均價減二十日平均價。所謂十天線升穿二十天線，就係當F(10,20)由負值變為正值。

MACD(X,Y) = EMA(X) - EMA(Y)。

MACD(8,17)=EMA(8)-EMA(17)。所以，MACD(8,17)由正數變為負數代表EMA(8)升穿EMA(17)。用人話講，短期既累進平均走勢強過較長期既累進平均走勢。叫佢做「Exponential黃金交差」亦不為過。

細心實習研讀圖表既朋友不難發現好多時出現黃金交差時，股價走勢卻未見好，反而冇耐又出現番死亡交差，然後又冇耐見番黃金交差，十天、二十天線糾纏不清之情況。皆因如之前筆者所講，單日急變之股價於簡單平均價之影響可以突然唔見晒，所以「簡單」既黃金交差既訊息有誤導既機會。MACD誤導性較之低，Exponential黃金交差一係唔出，一出既話，訊息較明確。唔係話「簡單黃金交差」冇參考價值，始終都有佢既認受性，只不過唔排除會出現翻覆既情況。其「簡單黃金交差」反應較MACD快，所以都好有參考價值。圖表既野，反應快，就資料唔足，準確度降；準確度高，要集更多資料，而反應慢。所以某些數據係作長線用，某些則作短線用。圖表分析非常復雜，單係要掌握黃金交差已經非常唔簡單。真係唔好咁無知，輕言圖表分析只是一場笑話。

之所以有訊號線
參考番上面提到既F(10,20)，F(10,20)係正值，代表，10天線維持係20天線之上，數值越大，代表拋離越遠。但係F(10,20) = 2係冇代表性，因為如果講緊既係匯控，股價於$140水平，10天線唔算係點拋離條20天線，但係如果講緊既係信置(83)，股價於$19水平，就算係拋離得幾遠。MACD(X,Y)亦然，所以要加條訊號線做分析。

MACD(X,Y)反映 「短期走勢勝過(或差過)長期走勢」既程度。數值越大，程度越高，但係如上舉出，單睇數值，冇代表性。

訊號線EMA(9)比較令人攪唔清。黎個EMA(9)唔係講緊個股價既九天Exponential Moving Average，而係MACD既9日平均價。所以筆者都係鐘意叫佢做訊號線多D。MACD(8,17)升穿訊號線即係講緊，「短期走勢勝過(或差過)長期走勢之程度」有擴大既跡象。

MACD之解讀
之所以：
當MACD為正數，視股價處於升勢 (短期EMA跑贏較長期的EMA)。
當MACD為負數，視股價處於跌勢。
當MACD升穿訊號線被視為向好 (EMA既黃金交差麻)。
而分別當「升破」是出現於MACD為負數時，被視為股價有止跌回升、反彈之趨向，但並不視為強烈買入之訊號 (皆因MACD為負時，短期走勢還是遜於長期走勢)。
而當升破出現於MACD為正數時，被視為股價展開升勢，為強烈買入之訊號。

明白筆者既解釋，拎番玖龍紙業既圖黎睇番筆者所講既「簡單黃金交差」同「Exponential黃金交差」，會領略更多更多。

用咁既角度解釋MACD為筆者個人既心得，未見坊間有咁既解法，筆者唔想重複坊間有既資料，如果唔係大家不如買書睇，唔需要睇黎個Blog。如果覺得有所得益既話，請反映畀筆者知啦 (匿名也好)。又如果坊間有書籍以類同既手法講解，不仿同筆者及各位推介下啦。感激。

(P.S. 對圖多多懷疑既果位朋友，你畀得功課筆者做，筆者下次見到你一定問番你！嘿嘿！)

大市Highlight (2007年1月15日)

恆指下午繼續狂升，淡友留力、儲貨，準備沽番落黎，但求轉身，「離島區」暫時冇得救，唯有減少損失。恆指既島形頂裂口若莫50點子，又唔好過份興奮，不過有老襯重此被困咁o者。

今日下午淡友唔發動，留待天日炒高先沽，或者等美國放完假開番市先搵個籍口沽。好難講，上星期筆者大叫「大家悲觀時，其實唔係咁悲觀」同比晒信心大家話19,300有支持既時候，冇趁機做恆指好倉，家下見好先黎做，咪攪喇，唔係話聽日實唔會升，但係有咩把握先？19,300水平Call恆指又唔同咁講喎，有本錢麻。

國指已完全回補下跌裂口，「輕微島形頂」之困已解。

筆者今日交足功課...
地鐵(66)穩守$20。玖紙(2689)自筆者急件推介後一直升未停。建行(939)由筆者再推之$4.64低位回上$4.89。筆者上午暗示中國人壽(2628)可以諗 (見上文)，唔知有冇人收到呢，嗯！下午中國人壽由$24水平急上$25.3。一眾中資金融股搶高，筆者亦冇睇錯。

不過筆者要多口一提，「大家悲觀時，其實唔係咁悲觀」，唔好亂用，要配合好多野黎諗，唔係一見大家悲觀就走去做好倉。驚有人誤會，多口講廢話，請大家原諒。

(利益伸佈：筆者持有建設銀行(939)及其衍生工具、並持有中國人壽(2628)、玖龍紙業(2689)及地鐵公司(66)。)

玖龍紙業強勢再起！

筆者於上個月同大家分析過玖龍紙業 (見上文)，研究過瑞信之言論，叫持貨者唔好畀人震走，而且於出現「平底」後，預測股價會止跌回升。結果股價回升至$13.45水平受阻，以弧形急下，至上次「平底」位置，支持再現。筆者今早已狂寫，推介此股，可惜日間事務煩擾，一路寫，佢一路升，故決定盡早出文推介左先，詳細分析依家先同大家討論。

技術因素見好
一月初雖出現黃金交差，但係快支持不住。MACD(8,17)升穿訊號線則更為可靠，而且MACD(8,17)快要由負數轉為正數，走勢見好 (至於究竟成日講MACD，點解會Work呢？密切留意下一篇文章)。DMI-代表沽壓DMI+代表上升動力，雖然兩者均見向下，但下跌勢力比上升動力向下發展較急，有機會發展為DMI+升穿DMI-及升穿ADX (趨勢線)。
若果達成此局面，走勢將更明朗。今日一枝大陽燭一拼升穿十天及二十天線，且成交量上升。

基本因素亦見好
得到花旗認同，評級由「持有」調高至「買入」，目標價則由9.8元，提升至14.5元。而且大股東張茵於12月31日增持股份，持股量由72.79%增至74.79%。12月31日增持，作價該於$13水平，唔講得笑。(筆者再按：其實早前已有大行實地考察過，不單止唔係好似瑞信所擔心既供過於求，玖紙既2007年定單已經完全接晒。黎D野，唔見有人周圍唱。[update:2007 Jan, 15, 21:52pm])

今日可見當初筆者勸大家唔好輕信大行報告，唔係亂黎。

玖紙強勢再來

筆者好想趕響下午市開之前講，趕唔切喇，出左個title先！

上午市Highlight (2007年1月15日)

如筆者所想，大市升勢持續， 國企不宜看淡，一眾中資金融股追高，皆裂口高開 (並不代表會造成裂口)，如建行(939)上星期五收$4.72，今日開$4.8。國企進一步回補「輕微島形頂」(9804 - 9856)，差6點補晒。恆指更勁，如果今日下午市保持得住，會形成島形底，咁響19,693開始做淡既淡友就成為離島居民，餘下一月份都係慳D使好D。照計淡友見勢會力壓，下午市及明日見波動唔奇。

中國人壽(2628)早前將於A股上市而被炒高，A股上市後卻倒跌；中國人壽被納入恆指之機會很高，不過冇人炒高，嗯。

(利益伸佈：筆者持有建設銀行(939)及其衍生工具、並持有中國人壽(2628))

大市走勢 (2007年1月12日)

筆者於星期三日中已指出恆指該向下回補裂口，結果亦如此，雖不完全如筆者所想般發展。

筆者本推想若第二天 (星期四) 會裂口向下低開，由於認為應該不會造成島形頂，恆指該於當日回補裂口後有支持而即市回升，解島形頂之困，故推想星期四有機會形成單日轉向。下圖為筆者極唔希望見到既假想走勢：

結果都冇造成島形頂，亦順利回補左裂口，不過卻有另一個走法。相信由於星期三晚中央帶來好消息：准本港發人民幣債券，帶來星期四初高開。不過始終於筆者所預測裂口補回力度更大，日中掉頭回跌，最低跌至19,350，差30點便完全補回192點闊之裂口，都可以算係補完。然後，星期五回升。筆者認為始終部份投資者有介心，恐防中央星期五又再出台推宏控政策或口術，3:30稍為回落，最後10分鐘有人追貨，整日因而形成代表爭持局面之十字星。


筆者料升勢會持續，要回補19,693-19,794之下跌裂口。跟住點走，依家無謂亂估。不過筆者依然對本月後市發展看好。有捧開場既讀者應該知道筆者原本預測還有升勢，但特發事件後，震盪出現，回補裂口，推遲預測之升勢的發展。

至於國企指數，雖則如今國企尚未回補之前下跌裂口，解其輕微島形頂之困，但筆者同樣認為不宜看淡。星期五一眾中資金融股 (除交行外) 皆出現回落，理由一樣，避一避個周末，星期一該出現追貨。

(利益伸報：筆者持有建設銀行(939)及其衍生工具。)

大市Highlight

趕住外出，好快highlight下個大市。

要點：大家都悲觀，反而真係唔使咁悲觀。

特變事件發生已破了筆者對一月既預測。本來星期五如筆者所推想，蓄勢待發之際，星期五晚中央調高存款準備金率，好友見時不與我，退回陣線 (留番一月後期連同跌左既點數再狹淡友重好)，引發是次調整。筆者預測不變之處係後市升勢還是會再展。但，是次調整反而舒緩了中期調整既壓力 (筆者所講既似樣中期/中型調整，講緊起碼係二、三千點以上既調整 (現時250天平均指數點為16,996點))。

大家預期日圓一月加息，依筆者見，影響既係商品期貨市場而唔係股票市場。

明日大市走勢非常重要。恆指唔可以制造島形頂，國企最理想係反彈回補今日下跌裂口。恆指19,300有支持架喇。

今日可見，信圖得救

近日跌市理由多多。今日稍後再討論。(注：上圖最後一枝陰燭為今日半日市。)

上星期四筆者提出出現「黃昏之星」，情況變得難攪；果然好難攪。較敏感的MACD(8,17)已穿訊號線。專家建議離場睇MACD(12,26)，暫時貼住。今日若收市出現十字星，走勢逆轉，不過機會較小，因為裂口非常近，試補機會更大。聽日該進一步跌，穿一穿二十天線，但有機會單日轉向，補完回彈，如果係咁，聽日出現一個鎚頭就更理想。悲觀D睇，天日若裂口跌至19,300水平，而繼續向下發展 (而且整日未出現反彈回補下跌裂口)，會形成一個非常「靚」既島形頂，咁就真係好大鑊。

國企情況一樣，出現「黃昏之星」，而且形成左一個島形頂，可幸既係下跌裂口非常小，差點唔成形。之前上升裂口差些少已全補，聽日反唔反彈非常緊要。MACD明顯穿左訊號線。(MACD穿訊號線唔係話即刻就利淡，不過顯示上升動力大減。)

有責任跟一跟建行：今日可以初步入貨，不過相信應該冇乜人敢做。
([update: 2007 Jan, 10, 2:29pm] 想多口講句，招行唔錯喎！)

依家唔講咁多住，睇埋下午市發展。

(利益伸佈：筆者持有建設銀行(939)及其衍生工具)

要向我們國家領導致敬

雖然坊間對國家提高準備存款金率提升甚多解讀，而且因而看淡大市，尤其國企。不過筆者卻認為其影響只屬短暫。

筆者認為國家既手段越來越高明。並未使用到大動作壓制，而初步使用口術及溫和手法去冷卻過熱既市況。其實加息並非良好既手段，國家現在既要被免資金擠塞於銀行，又要防止股市過熱，要做到恰到好處並非容易。依筆者見解，國家出台其中最主短線目的就是不願看見明日中國人壽首日掛牌升抵$40 (注：國內首日掛牌既股份係冇升停牌機制)，不願看見國民既血汗錢流到大戶及外國基構投資者裏。是故出三招，口術、增加存備率及十一日後才正式納國壽入指數，以冷卻明日有機會出現之正股及指數之瘋狂炒賣。當然長遠黎講，亦有助穩固樓市，進一步減少不良借貸。

是次調控對於中國地產股有影響，筆者認同，但其實以銀行股來講，則屬籍口為多。銀行股下滑，只因近來升得太急，引來回調壓力，及窩論市場相關操作所致。建行聖誕假後所形成之裂口為一眾中資銀行股之最，上星期回調時並未補完，今次借故回調，其實即使再次回落補裂口絕不為過。所以筆者成日話要谷底入貨，近日動盪可以處之泰然。明日回補裂口唔奇，但反彈又唔奇，根本作為散戶係捉唔準。出出入入，中者純屬好彩。手持正股，應該望遠些。

對上兩次調高存備金率都冇出現大幅回調，反而照升，今次唔同既係一眾基構「先知先覺」大叫擔心國內會進一步推行宏控。筆者並非唔同意佢地既講法，而係認為言之過早，黎緊出現既故事會係：大家好快又忘記，又再瘋狂過，然後國家真係出手果下，先至係真正出事之時。不過，依家鑊利離場絕對係良策，因為由依家開始係搏，搏響國家真正出手深化宏控之前走得切。明白自己冒緊咩險，筆者冇意見。

筆者維持之前對一月之預測，只是因受是次特發市件所影響，所測之走勢該會延遲發生。

圖表方面，依現時走勢看，筆者認為最危險係國企指數或恆指出現「島形頂」 (「島形底」既相反)，如果出現既話，筆者會執野走。

今日筆者入貨中國人壽(2628)，筆者認為國家唔希望佢見$40，但見$30唔奇。不過風險甚高，所以筆者唔會推介，更加唔建議聽日先黎追。

有推介過既，係地鐵(66)。今日地鐵雖未及一眾地產股表現出息，但此乃筆者上星期穩陣之選，在此動盪市中，未令捧場讀者失望，希望有人賺到喇。敢冒風險者可以繼續持有。

最後，美國未必會加息，但係唔多關我地事。

(利益伸佈：筆者持有建設銀行(939)及其衍生工具、中國人壽(2628)、及地鐵公司(66)。)

談建行，了解大戶

由於H股放左兩日聖誕假，A股既工、建兩行大升左兩日， 故假後開市建行大裂口高開 ($4.65 - $4.97)。裂口咁大，非常難處理，回補壓力好大，分幾次補走勢會好番覆。一次過補，跌勢好急，但係黎個裂口都係唔補唔舒服，一次過重好。

何以大裂口回補壓力大？
除非上升大裂口形成後，有實質數據支持，如實質溢利、簽左大定單、之前被低估等，否則裂口回補壓力會好大；因一個既念或憧境而裂口升既更甚。大戶炒股，左手交右手，右手交左手，股價跳升，有好彩裂口前入貨者，亦有唔好彩裂口前沽貨者。上升裂口形成後，好彩既會再乘勢炒高沽貨鑊利，唔好彩既等機會拖低股價補貨。所謂回補裂口，就係這兩者壓力底下，將走勢還原，重新其升勢。好彩者樂意咁做，因其鑊利後，又可以再黎多一浪；唔好彩者唔使講更加樂意啦。

重點係本身股價既基本因素，如果裂口出現後，好消息一個一個出現，隻股拋離個裂口越黎越遠，甚至再制造更多上升裂口，咁回補既壓力就會大大減低，例如玖龍紙業(2689)。裂口拋得越遠，「唔好彩大戶」要搵更大既籍口去補，黎D機會要等跌市、等業績倒退等。又如果個上升裂口根本冇實質基本因素支持，爆煲時，咁就唔係回補咁簡單，根本係向下跌時「經過」個裂口。

長線投資
深明當中操作既人，如畢菲特，只研究公司既業職、管理及潛力，唔理中間既上落。咁先叫做長線持有，唔貪一時急升，冇畏一時急跌。亂黎既散戶，急跌時，明明有實力有前境既，沽鬼左；慢慢跌，基本因素出左問題既，卻打死唔走。人既心態就係咁神奇。

散戶心態
一係叻到響建行升到$5.2-$5.3水平沽貨，然後回補裂口時撈底。之前冇鑊利，噙日唔沽，今日先沽既，阿姑也。噙日唔沽唔係出於堅持，今日先沽係無知。

窩輪游戲
好多散戶咬牙切齒吼道：「輪商狡猾！大戶贏晒！」
係，不得不承認，大戶係奸猾，但係畀著你係大戶，你都會咁玩。畀著你有地、開賭場，你都會咁玩。唔好自欺，大家香港人，人本質上其實冇分別，唔好憎人富貴。輸左唔儉討，只懂埋怨，不值得尊敬。

大戶、輪商，可以出術，但係有範圍，有限制，唔係鐘意點就點。D人覺得有錢大晒，大戶可以左手交右手，右手交左手，將隻股推高：右手持有$10既股，用$10.1賣畀左手，左手再用$10.2賣番畀右手，然後又$10.3賣番畀左手，又以$10.4去番右手。總結右手表面上係蝕$0.4，但係左手賺左$0.3。即係用$0.1可以無限量將股價推高。有冇咁開心呀？有冇諗過每個交易都有手續費？大手買賣唔講得笑。畀你推高左個股價，到大手沽貨鑊利既時候，股價會瀉番落黎。之前既成交，係左右手做成，到沽貨時，有冇番果個承接力先？未計燈油火蠟、人工、機會成本，錢唔係咁易賺架。好多「打工仔」覺得人地「做老板」好容易，完全唔明白人地經歷既風險同煩腦，真係咁容易，重打工？筆者打工見過好多「無能高層」就真係做得好容易喇。

唔明白游戲既玩法，自然係輸家，股票市場，短炒同玩Poker (話事啤) 冇兩樣，只係股票復雜得多。

點解炒輪會輸錢
以建行為例，聖誕假後返黎，股價急升，對輪商黎講，機會難得。股價急升，引黎散戶投機，股價升勢急上加急，因而所謂「引伸波幅」會加劇，隻輪升得更急，散戶更見瘋狂，隻輪分分鐘賺一兩倍。食個番尋味者，見朋友大賺者，當建行升到$5.2水平繼續追入窩輪，其實隻輪已經「好貴」，而輪商期間當然會積極派貨。然後正股大跌，大戶推波助瀾低下，隻輪價大跌，黎個時候輪商又積極收貨。當將來建行止跌回穩，股價穩步回升，但冇之前咁癲，所以「引伸波幅」已經大跌；即使正股股價升番家鄉$5.2水平，散戶手上既窩輪不單只未回本，重蝕一大截，因為「引伸波幅」大不如前，加上蝕埋時間值。當隻正股升到$5.6，以為會好高興，卻發現僅僅回本。之所以眾多散戶炒輪蝕到一仆一碌 (當然重有好多其他scenario)。

坊間講窩輪既書唔會同大家講黎D野。睇下出書果位響邊度打工自會明白。加添大家窩輪「知識」，推銷商品既行為也。早前「One Week」有文章大罵輪商，對錯差半，筆者唔能夠全都認同。咆吼者鬧既口吻熟口熟面：「明明睇晒D天書，背晒答案，點會出埋D咁既題目架！」筆者認為輪商冇罪，唔明整個游戲，將自己既血汗錢輸干輸淨先係大罪。

(利益申佈：筆者持有建設銀行(939)及其衍生工具，及玖龍紙業(2689))

大市Highlight - 連環沽

個市行得好急，將一日市當做兩日睇都不為過。恆恉星期三及星期四早上於20,400點掙扎，然後試20,000點支持，重穿下添。一切筆者於發生前已預告，且預期「一係唔跌，一跌都會幾急」。希望玩指數既朋友避過一劫。

星期三
雖然星期三早上升過上20,500水平，但其實係急抽後立即極速打回原形，黎種走勢熟口熟面，好友急急計數走人也。好友走人後，恆指一度倒跌，後卻回升20,400水平，皆因有一個炒國內A股開紅盤之概念。

星期四
概念既野，一早炒左，正式發生既時候就咩人都走晒 (除左師奶散戶)。星期四國內A股果然高開，10:30打後，恆指再次20,400點作掙扎，然後一直向下試支持。鑊利盤見你計數時，佢又計；散戶嚇親，又沽；A股跟H股跌，H股又再跟番A股跌，A股又跟H股跌多D，沽到失晒性。暫時20,000試到有支持。

筆者本認為20,000有支持，應該唔會再大跌，之不過陰陽燭圖形成左「黃昏之星」，難攪，難攪。筆者諗爆頭，眼下穿下20,000點，試下19,800，甚至19,500都唔奇，唔試又得。天日個市冇乜心水，硬要筆者講既話，天日有機會向下玩下，再震散戶，然後升番上黎。點都好，筆者唔認為黎個會係中期調整住，維持星期一既睇法。

小小建議
持「正當」股唔好咁快畀人拋走，過幾日又後悔。大市波幅將會好大，見保歷加通道擴大得好緊要 (成2,073點闊)，膽小者不宜。跟開建行，同大家交代埋：筆者未見有咩大問題住，故筆者繼續持有建行股份及其衍生工具。而且筆者覺得天日係入某些心水貨既時機，穩穩陣陣，地鐵(66)諗得過。

最後同大家玩下數字游戲
其實由筆者上月話一穿19,200就會一路殺到去20,300，都講緊1,100點升幅。家下叫做衝到20,400 (收市高位)，跌番38.2% (黃金比例)好合理，即恆指要回調至19,941，同今日最底位相差7點。

(利益伸報：筆者持有建設銀行(939)及其衍生工具，並持有地鐵公司(66)。)

網路勁suck！依家先後補番幅圖畀大家 [update: 2007 Jan 05 1:15am]：

大戶打眼色

自有黎個blog，筆者一直推介建行，亦不斷叫大家持有既忍住忍住，又有不斷為大家報道「大魔」動作，就算冇入過貨，大家都有機會見證大戶係點做野、圖表係點睇、投資賣買策略係點做。筆者甚至係一次調整入面，大膽叫大家追貨，真係有響筆者講既位追入 (冇$3.8，都$3.9，最保守都$4.0入左掛)，又忍到依家既 (今日收$5.28)，恭喜晒！今日亦見大戶非常古惑，黎幾日，日日一上$5.1X水平就急沽，每日日中重倒跌下添。今日臨收市先黎個勁抽。本漫畫係紀念整個歷程。Click黎睇好睇D，記住有兩部份click黎睇過喎。(最近開始睇既讀者：筆者一直把有關建行既文章標籤起左 (見右邊)，畀大家參考番。)

(利益伸報：筆者持有建設銀行(939)之股份及其衍生工具。)

展望2007年1月份大市

回顧
雖然近日網路大塞，筆者好少寫野，但係有捧開場既朋友都知，筆者一直維持一個月前對12月後半及1月初之大市走勢既預測。結果大家都睇到。

預測最後部份差不多全應驗，升勢持續至1月，20,300點都穿埋。下圖大家都睇到好熟：

黎幅圖，唔使筆者解釋太多喇掛。

如今一切預定目標已達，恆指重可以升幾多，筆者只能講到黎個地步要見步行步。

展望一月
一直以來，唔理有幾多人出黎唱話個市會回調，筆者都堅持大升勢未完及中型調整未會出現。但今次升勢完結後，筆者認為會有似樣D既調整出現。硬要猜測既話，筆者認為一月後半會出現跌市，淡友要狹番好友。恆指於20,400前要抖一抖 (天日差唔多喇)，然後試一試20,000點樓上既支持，再回頭試高位 (散戶到時心癢難耐，股火焚身)，然後才踏入筆者所講既跌市。一係唔跌，一跌都會幾急。筆者日後盡量同大家跟實D。

策略
依家其實應該係持貨者放緊風箏既時候，而唔係追貨既時候。

給長線投資者：莫急，雖然好些國企長期持有都冇乜問題，但係正正因為諗住長線持有，更加唔應該依家入市。筆者成日都話入貨係要響谷底入。

給短線投資者：短線其實可以，因為大戶派貨，股市會升。但係要知機走人，難度唔低。要留意減少資金以減低風險，可以買入心水股既鍋輪，目的係控制賭本，因為買入正股，跌起上黎，分分鐘輸突或做蟹民。有好多人覺得鍋輪罪大惡極，其實懂得運用，係非常好既投資工具。真係追正股都搵落後股。

恆指Call與Put皆不宜。

上期「官曹亂估」

續「精制失修 既 官曹亂估」：

多人提出手上未有筆者所提之「精制失修」(23 Dec - 29 Dec 2006)。筆者當然不能轉載，但能類似地將其內容模擬一下... 以下綠色部份為筆者加入之備注：

佢話：「...招金出現雙飛烏鴉利淡訊號。料短線既沽壓會持續...」(注：筆者原汁原味跟佢括錯)

佢又話：「... 恆地STC同14天RSI未現反彈訊號 ... 支持位係$42.6，阻力位同目標價都係$44.4。」


佢又話：「... 新濠明顯低於保歷加通道底部，料短線既沽壓會減，$17係初步支持位。」

另一位話：「... 港交所RSI出現背馳，建議沽左先，等落番$70先入番貨。」

港交所自此每日創新高，星期五收$85.5。死未！